世上沒有無緣無故嘅愛

竹馬の友［ちくばのとも］

日本諺語 由細玩到大嘅朋友，即係我哋成日係尐膠劇聽到嘅＂青梅竹馬＂

見到青梅竹馬呢個詞語真係面都紅哂，點開口同人講係隻巴西龜，一隻我外公養咗十幾年嘅烏龜。佢到今日仍然有一個不解之謎，就係點解一隻巴西龜可以養到成兩隻手掌咁大。（或者佢根本唔係一隻巴西龜）

小學嘅時候，放學就會係外公屋企食飯，夜晚等呀媽接我走。平日無所事事，就係捉隻龜出嚟玩，佢應該算係我人生第一隻寵物。再養寵物嘅時候已經係20歲，養咗一隻狗女。因為好多原因， 未夠20歲已經搬咗出來一個人住，平日要讀書同賺外快，基本上冇乜時間有社交活動。當時想養隻狗希望係屋企除咗鬼之外，有其他生物走來走去，或者係無聊時可以陪我自言自語。

到大學畢業後，工作都是晚出早歸，而且經常需要到外國工作。每次回港最掛念的，就是小狗在門口歡迎我嗰一刻，而唔係幫我照顧小狗嘅前度。

之後嘅日子，我和小狗經歷咗好多事。她陪着我在人生中不同的高低起跌、離離合合。而我亦陪着她由一隻健康的為食狗，變成每天需要食心臟藥去水丸嘅老狗。

曾經聽人講過動物嘅世界，主人就是他的唯一！但反而我會覺得我哋嘅關係似青梅竹馬嚟得更加貼切。我哋係依靠大家而互相成長，所以我不太喜歡用＂主人＂這個字形容我和她的關係。係天下太平嘅日子，我哋似互相鼓勵嘅夥伴；當我帶其他人返屋企嘅時候，佢吠到拆天嘅聲，我哋就好似有血海深仇一樣咁！到了她年紀大多病痛時，我哋嘅關係就好似《淪落人》中嘅黃秋生同Crisel Consunji，當然我係做Evelyn呢個菲傭角色啦！

最後大家走過十二年嘅歲月，小狗喺睡夢中因心臟病發而離開，來得突然、走得匆匆。雖然在腦海至今仍然有數十個問號，但在她生命盡頭時仍能在旁邊守護，至少算沒有一絲遺憾！

人對地方、物件、人或事均有專屬的情意結！有人深信是一見鍾情；有人相信是矢志不渝；

當年因為嗰一吓對望就帶咗小狗返屋企！因為帶咗返屋企就要承諾照顧她一生一世！亦因為情意結，每次喺街見到好似小狗嘅擺設，我都好有衝動買返屋企。最後亦因為一生一世嘅承諾，我用咗八個鐘頭、痛到想死嘅情況下，將小狗紋咗係我左臂上。

所以希望各位朋友，你哋要有承擔嘅勇氣先好去有養寵物嘅念頭，因為呢個係一生一世嘅承諾。

P.S. 小狗係有名 全名叫史納莎妺妹 簡稱師妹 

https://button.like.co/wevet52294