2022年烏克蘭烽火再起，局勢惡化前寫幾點

2022年烏克蘭烽火再起，局勢惡化前寫幾點：

0. 2014年克里米亞衝突時，本人仲係一介無知RA。雖然每日返工都會刨新聞，mon實各大智庫有咩獻言，但其實都唔預會有咩insights，多數都係拾人牙慧。

1. 上年2月睇咗一本新書，We Are Bellingcat: An Intelligence Agency for the People，基本上係一班無專業資格但好專業地用open source做調查嘅人，一般稱為open source investigators，或者OSINT。當年敍利亞政權用化學武器攻擊平民，2014年馬航客機喺烏克蘭邊境被親俄民兵擊落，就係Bellingcats做早期調查，靠啲坦克車喺公路行嘅相搵到係邊啲人搞事。成本書講嘅嘢都好empowering，因為用open source data已經可以搵到好多嘢。咁啲收公帑嘅公務員做緊乜呢？

2. 話雖如此，但掌握嗰度【好多嘢】嘅其中一樣其實都好唔容易：由一張相嘅光線／影去判斷時間、喺個無人村落搵一棟建築物或者一個公路廣告牌去搵返個準確地點，淨係geolocation都好難。

3. 如是者呢幾年來儲到一班人，佢哋收集資訊、調查、核實、喺Twitter 實時發布。呢班人仲癲到會設計遊戲，定期出張相，訓練啲OSINT義工嘅geolocation能力。

4. Discord有個叫做「Project Owl: The OSINT」嘅群組（我最近開始蒲，起身同臨訓之前都會追po），將全世界分成各個地區，每區都可以將啲lead放上嚟，就會有堆人埋位同你一齊factcheck。

例如而家烏克蘭衝突，每當Twitter有啲俄羅斯／親俄民兵組織有官方公布，呢班人就會做factcheck判官，將啲metadata抄出嚟分析；做geolocation（CLS只係用咗10分鐘LOL）；或者用bot直接將啲俄文tweet同telegram譯做英文。

5. 用最簡單嘅方式講佢哋嘅workflow：

a. 有人報料，有lead，例如公路上影到一堆軍車經過嘅片；

b. OSINT分析條片嘅Metadata搵時間、睇電纜／公路指示牌去搵確實地點；睇車牌搵架「軍車」由邊度調派；

c. 有人Mon住衛星地圖同埋flightradar24；

d. 慢慢每日都出到張地圖講俄羅斯今日調動兵力去咗邊，反駁普京話撤軍嘅消息。

或者

i. 有條片話烏克蘭入侵頓涅茨克；

ii. 條片出咗一個鐘都無已經被踢爆個實際地點其實係頓涅茨克接壤俄邊境，烏克蘭軍無可能去到 LOL

6. 呢種民間情報分析自然快過官方，而呢個Factcheck過程，去到華郵／紐時報道，已經係D verified Tweets廣傳一日後嘅事。隔住mon都感受到呢班OSINT做mythbuster嗰團火，Bellingcat個founder今日仲好寸咁講，'I hope Russia keeps being this lazy with their disinformation when they start denying their war crimes.'。

7. 咁Decentralized intelligence 有無意義呢？可能都有，但似乎唔係促進世界和平，而係戰爭或者軍事衝突升級嘅速度快咗。俄羅斯08年攻南奧塞梯同埋14年克里米亞時，外界多視為「偷襲/突襲」，但呢個「偷」嘅印象或者係由於當時科技可見嘅情報有限，又或者分析情報需時；今次俄方調動軍隊個模式無大變，改變嘅可能只係多咗「網絡觀察員」實時睇住呢啲事情。

8. 俄羅斯出假新聞呢招嘅效果大減，歐洲相對係買多咗時間（分析情報時間速度提升，啲外交paperwork做得快咗）。問題係，多出嚟嘅時間係咪有用？有幾多係用嚟緩和局面？對俄羅斯嚟講Fake News又無咩成本，反正倉底貨舊片就照樣可以倒出街（好似隧道嗰㗎解放軍車圖都傳咗咁多年），普京其實都唔care大家點諗，只不過係大家拆面具個速度快咗咁解。

9. 檯面上歐洲呢幾日外交會議好多，但暫時除咗叫吓外都唔覺有咩效用：慕尼克峰會最(un)scripted嘅一幕就係烏克蘭總統走出嚟指責北約領袖，大意係話烏克蘭唔係老奉做歐洲同俄羅斯之間嘅沙包；歐安組織 (OSCE) 觀察員喺呢件事上發揮唔到作用，有啲衝突地區入唔到去；

10. 法國嘗試衝出嚟做和事佬，宣稱1日之內拉攏到美俄雙方有條件進行會談。但衝突無停過，俄羅斯同白羅斯「軍演」繼續（之前聽過一個爛gag，話拜登寧願得罪法國，Cut咗原本個潛艇Deal都要同英澳聯盟組成AUKUS，費是畀人叫做FUKUS）。

11. 大約2個鐘前RT直播俄羅斯國安會議，普京「今日內」會決定是否承認頓涅茨克和盧甘斯克地區的地位，頓涅茨克晚上已經不斷傳出爆炸聲。有記者眼利發現其中一個官員手錶顯示緊5個鐘前嘅時間，質疑係預錄會議（不過領土咁大，剛剛落機唔記得較返手錶啫係咪？）

12. 宣戰（對好多人嚟講開戰喺好耐之前已經發生）在即，今次係好機會調整接收資訊嘅習慣。一個消息由發布一刻開始，調查、核實，確認消息；左右決策，改變部署；到成為新聞，再影響公眾輿論。如果自己仲係用FB link去新聞，就會發覺睇緊嘅可能已經係一日後嘅事。