水土不服

今時今日，重有人講「水土不服」真係令人O咀！佢係咪响古代跳到嚟現代？

真係唔肯定以前响邊度聽過人講水土不服，應該係六十年代啲偷渡潮，有啲甚麼親戚鄕里成功偷渡到香港，一些老人家便整個唔知乜嘢飲料，據說能克服水土不服。奇怪，去澳門，或者响澳門返嚟又唔使嘅，我只慶幸我唔駛飲！

後來慢慢冇人再提，到自己出國留學，亦冇人教路要食乜嘢去克服。我哋個輩係食漢堡包大嘅，麥當勞殺入香港，瞬息間改變咗飮食文化。如果有人話我去到外國要日日捱漢堡包薯條，我絕不會覺得是乜嘢憾事。反而見到嘅呃鬼佬的唐餐館，乜嘢雜碎，重唔開胃。

而慢慢大家都有啲錢，鍾意去旅行，加上航空技術越嚟越改良，試過有英國樂隊响廿四小時內，連續响三個洲（歐、非，北美）舉行三場演唱會，都算誇張。而普通人四處漂流，四海為家咁滯，都係等閒事。所以而家重提水土不服，真係食古不化。

之但係，佢係因為疫苗注射嘅疑慮而出此言。咁就更加好笑，可能佢覺得疫苗就好似維他命丸咁，喺製造出嚟，所以中國造嘅就可能有人參靈芝等成份，特別適合番中國人。鬼佬嗰啲就係外國嘅材料，唔啱中國人胃口。即喺疫苗點嚟都唔知，真係難以置信。

疫苗其實由原本細菌度嚟，通常喺淨化咗，唔會有咁大殺傷力，响實驗室內調校份量，經過無數試驗，最後至用喺人度。佢個作用就喺等你嘅抗疫系統接觸呢隻病毒，產生抗體，而且認住佢，下次有真嘅病毒入侵，就識得應付。呢個喺疫苗嘅基本原理，唔同藥廠有唔同技術，發展方法亦有不同。今次因為喺全球性，茲事體大，有好幾間藥廠出手，而家大家爭拗，其實主要喺大家對邊間嘅藥信任高啲，而副作用亦會因人而異，但絕對同水土不服無關！

事實上，訂購國貨最大嘅買家喺巴西，如果真喺會水土不服，咁佢地咪好大鑊？