2022年F1賽季前瞻

如果話每一個時代嘅F1總有一個代表人物或者車隊的，近代嘅代表人物就一定有冼拿，而車隊方面應該都係2009年Brawn GP呢個童話式傳奇故事。而每一次改例，形勢都勢必有所洗牌，今年適逢近40年以來F1最大規模嘅改變，咁不如今個星期就同大家講吓我自己對今年大改變嘅睇法。

工作人員將面對更高壓的比賽環境

首先就講咗今年嘅賽期先，如果全部分站均可以順利舉行，將會於3月18日係巴林開始，11月20日係阿布扎比煞科，之後11月21日就係世界盃開始。如果大家有留意近年嘅比賽，都會發現今年為咗遷就世界盃舉行而特別早完結，亦都代表今年整個賽期會比以往更加緊湊。加上如果疫情影響減低，全部23個賽站都順利舉行的話，將會成為有史以來最多嘅比賽一年。（雖然而家睇落因應全球疫情發展已經覺得無乜可能全部分站都會舉行）但正如我係之前都有講過，咁緊湊嘅賽程其實對各方面都係一種前所未有嘅壓力。首先講物流，因為受到疫情影響全球物流嚴重延誤，雖然近年F1已經採用各種不同嘅混合物流方式以趕及比賽，但如果好似上年巴西站或者比利時站嘅情況再出現，絕對會令今年嘅物流更加緊張。另外就係隨隊工作人員，如果細心留意今年比賽舉辦日期，就會發現今年有好多連續週末都有舉行比賽，在賽季初段我相信應該問題不大。但如果去到賽季末段，幾個星期內差唔多要環繞地球一周嘅飛行距離，加上唔同地區嘅時差，對工作人員來講絕對係一種考驗，我相信去到賽季末段，工作人員被引起嘅人為錯誤我地更加容易會睇到。但我想講嘅係，我地今年真係唔好忘記，每一站各車手激烈比賽嘅時候，我地唔好忘記後面呢一番勞苦功高，一年只可以返屋企兩次嘅工作人員。

角田裕毅自身難保？

既然都講開人，不如就首先講咗車手先。頭先今年唯一一個新人就係黎自中國嘅周冠宇。雖然大家都知道佢係俾錢買位，但佢嘅技術相比起另一位俄羅斯車手絕對優勝，但其實都有好多外國傳媒表明佢能夠成功加入Alfo Romeo 絕對係因為錢，所以如果佢今年稍有出錯，我絕對相信出年佢就算佢有幾多錢都未必可以留低，因為有另外一個Sauber後起之秀冒出，所以如果稍有出錯，其實真係神仙都難救。不過相比起佢，另一個二年級生：角田裕毅，情況更加令人擔憂。正如係2021年其中一個訪問中提及，角田知道自己可以再留係賽場多一年嘅時候絕對係異想唔到。無可否認，係舊年三個新人中，如果以分數來講，佢絕對係最佳新人。但係正如好多人評論佢都係話三年升三班實在太快。雖然呢一個問題去到舊年賽季尾段可以見到呢個情況已經有所改善，但係去到賽季中都仲有好多低級錯誤出現，就算係新人都唔應該犯嘅錯誤，加上佢用粗口聞名於世，所以佢今年仍然繼續可以留係賽場上已經算係奇蹟。今年截然不同嘅賽車，雖然對在場20位車手都係煥然一新，但係以佢嘅適應能力，對佢來講絕對係一個考驗。跟據佢係F3同F2嘅表現，佢當每去到一個新環境，都差唔多要用半季時間先可以適應，雖然對佢黎講，2021年已經有一整年駕駛F1嘅經驗，而且還有季末季初嘅試車，但係面對全新嘅賽車，我相信對佢絕對係一種考驗。我對佢嘅實力絕對毋庸置疑，但如果佢繼續犯呢啲低級錯誤，我相信紅牛嘅忍耐力係有限，加上2023年紅牛青訓計劃中可以取代佢嘅車手實在大有人在，所以我相信今年對佢來講會係好重要嘅一年。咁你可能會問，點解咁多人唔講偏偏要講佢？因為俗語都有話：百〇成材（再一次提醒我呢度係一個合家歡嘅地方，粗口呢樣嘢就自己填番心目中嘅字上去啦），其實我對佢係有啲期望，因為近年來亞洲車手能夠繼續留係賽車運動參與比賽已經少之又少，加上近年亞洲車手能夠企上頒獎枱嘅近年來只有MotoGP、Moto2同Moto3嘅賽事，所以我相信佢係絕對有實力能夠企上一次頒獎台，只係怕呢一日黎諗之前佢已經離開咗F1。

各項規範將會見到成果？

相比起以前F1，金錢係近年已經不在係一個無底深潭。FIA自從舊年推出預算上限之後，雖然舊年仲未見到任何特別嘅成效；但係今年適逢大改例，加上每一隊可使用其預算進一步收緊至1.4億美元，所以我相信每一隊用於資金研發上面嘅分水靚應該會逐漸拉近；加上可以利用風洞進行測試嘅次數有進一步嘅限制，唔再係好似以前強者越強，弱者越弱呢啲情況出現。但表面上就梗係好美好，但實際上我又覺得唔會因為減少測試同埋資金減低而拉近差距。雖然1.4億美元對於一啲下游車隊黎講（例如William同Hass）彷彿見到每年使用資金上限，唔使再擔心會因為金錢不足引致研發大幅落後，但相比起上面最頂級嘅火星車隊（紅牛同埋平治）絕對係小巫見大巫。應該咁樣講，下游車隊一整年收入（包括廣告收入）也不足1.4億美元，好容易會有收支唔平衡呢個問題出現；但係最上游嘅車隊一年嘅廣告收入可能已經超過1.4億美元。所以雖然原則定立財務規限係好事，但係我相信背後整個收入嘅差別依然會足以左右賽場嘅結果，畢竟大家見到或者見唔到嘅地方都係用緊錢，1.4億同1.2億美金已經差好遠。

正如一開頭咁講，今年係大改例的一年，車隊可以用於風洞研發嘅時間亦會因為上一季比賽名次而有所增加或減少，我相信呢一個會係我地最容易睇到分別嘅地方。因為用舊年比賽嘅結果來講，車隊冠軍平治同包尾大班Hass所能夠使用嘅測試風洞次數足足相差40%，現今F1主要係倚賴氣動力學黎分出高下，我相信大幅削減平治同紅牛可以使用嘅風洞測試時間，絕對會拉低佢地兩隊嘅實力。但始終平治係場上面有三對顧客隊伍，如果要收集數據我相信亦都會比紅牛或者法拉利容易，所以我覺得開頭各隊嘅分野應該唔會太大，之後就要睇各車隊會將研發重心放係今年定係出年嘅賽車身上，先可以知道今年各種限制對車隊嘅實際影響。

紅牛、平治兩敗俱傷？

如果大家記得舊年最後一站嘅比賽，都算係近年來最精彩嘅比賽。除咗因為係相隔好多年之後再一次兩位車手同分進入最後一站比賽外，更加因為大量傳媒嘅炒作令到最後一場關注人數急速上升。係最後一場比賽，好多酒吧竟然唔係播足球比賽，而係走去轉播平時好少會播嘅F1煞科戰。不過就唔係要講呢樣野，而係想講呢兩隊其實已經埋咗一個隱憂係度。

如果大家仲記得舊年嘅比賽，平治大約去到比利時站前後就宣佈將研發中心搬移去今年嘅賽車，雖然紅牛都係咁講，但係我地可以見到紅牛去到最後幾站賽車仍然有新嘅升級，可以睇得出為咗再一次攞到車手冠軍而搏盡無悔。雖然口口聲聲話沒有影響今年賽車嘅研發，但係明眼人都知既然有新嘅升級，即係今年嘅研發方面一定要有取捨。而且根據很多傳媒報道，紅牛今年嘅賽車係尚未成功通過撞擊測試，雖然舊年有輝煌嘅成績，但係呢啲消息我相信對於車隊上下一定有所打擊。

但係另一方面，平治都係不遑多讓。雖然2021年賽車沒有太大嘅升級，而且一早已經開始將資源慢慢撥去今年嘅賽車研發當中，但係2021年一開始，平治就受到引擎可靠性問題困擾，雖然開頭半年都沒有太大問題，但係過咗暑假之後就開始不停更換引擎，甚至乎保子一整個賽季換咗六副還是七副引擎，好似成為咗有記錄以來一季換最多引擎嘅車手。雖然2022係一個全新嘅引擎設計，但係2021年為咗要搵出引擎唔可靠嘅原因，工廠一定要用好多額外嘅時間搵出問題根源，又係一個影響今年研發嘅原因。雖然最後都係搵唔到原因，只係更換製造引擎物料勉強解決問題，但係彷彿知道能夠成功衛冕車隊冠軍後，便即刻將所有資源放到今年嘅賽車身上，令到兩位車手嘅引擎繼續處於一個隨時會壞嘅狀態，完全無諗過解決問題。

一隊就係為咗贏車手世界冠軍而不擇手段，寧願犧牲今年研發都要無論如何獲得勝利；另一隊就係為咗尋找引擎不可靠嘅原因而影響研發，所以我相信即使兩隊都聲稱舊年嘅賽季無影響今年嘅賽車研發，但我真係覺得純粹只係語言藝術，或多或少都會影響今年嘅賽車，只係從賽場上黎睇，平治要面對嘅研發耽誤絕對比紅牛少，但係彷彿已經輸咗起跑線，所以今年應該可以睇得到呢兩隊會洗盡渾身解數，既唔會被另外一隊爬上黎，亦都會用盡一切方法阻止其他隊伍嘅研發優勢比自己優勝。

黑科技回歸

相隔40年，地面效應（Ground effect，又稱：文丘里效應）將會重新回到賽場，正式批准使用呢一個黑科技。

簡單講一講咩叫地面效應先，簡單來講就係係車體底部形成一個比大氣壓力計低嘅區域，因為地心吸力嘅影響，正常大氣壓力會向下壓，車體下方便形成一個接近真空嘅區域，而且車底有唔同嘅坑紋引導氣流，令到進入車底嘅空氣加速離開，令到車身可以更加貼近地面，從而提升車速同埋製造下壓力（我就唔係讀物理嘅，如果有大大可以幫手解釋，麻煩係下面留言講一講，唔該）（按此瀏覽維基百科解說）

好啦咁就講返呢個黑科技，當年被禁嘅原因係因為令到當時每一架車嘅極速有所提升，但係只要過分跟貼前車或者賽道有坑洞，一有大量亂流便會令到賽車失控，加上80年代安全措施未有而家咁多，所以係嗰個年代因為賽車運動而離世嘅人大有人在，有見及此所以禁用。咁你可能會問，咁而家係咪可以令到速度慢咗又安全咗？我可以答你唔係，物理嘅嘢邊有咁容易改變，仍然係同當年一樣可以製造到更加之快同更加大下壓力嘅車，只係而家多咗好多唔同嘅安全措施保障車手嘅安全，加上賽道嘅完善，安全方面絕對係同當年無得比。

另一方面今年賽車最大嘅改變就係希望大幅減低車尾亂流情況出現。雖然呢一個我地就咁坐電視機面前睇好難會發現，但係我地好容易就見到當兩架賽車接近對方嘅時候，後方嘅賽車經常都會面對引擎散熱不足同埋車呔溫度過高嘅問題受到影響。目前如果一架車緊貼後面一架車，如果唔使用DRS，基本上係難以靠自身能力爬頭，跟據F1官方網站介紹，2021年嘅賽車如果同前車相隔10米，所承受嘅亂流大約有85%，對於嚴重倚賴氣動力學嘅F1絕對唔係一件好事；而今年嘅新車如果係相同距離，只需要承受大約20%嘅亂流，可以更加容易有爬頭機會，對於整個比賽可觀性絕對係大幅提升。今年嘅大改例就係為咗減低車尾亂流出現，希望減低呢啲問題出現，當然更加希望係可以令到兩架車係距離短嘅時候可以更容易有賣身肉搏夾戰鬥。不過當然，理論上嘅數字永遠都好完美，但係實際我相信都要等到實際比賽先至知道實際嘅成效。

除此之外，今年大會所提供嘅零件數目比舊年更加多，即係代表每對車隊能夠設計賽車嘅部件進一步減少。雖然係全球疫情大流行之下，呢個絕對係一個可以減少資金係研發車輛方面嘅好處，但係亦都代表每一對車隊能夠設計出唔同嘅賽車亦都有所限制，我地都應該好難會再睇到類似2020年平治DAS呢一類天才式設計。但係即使面對各方面嘅限制，加上車輛最低重量嘅提升，幸好我地係目前已經見到嘅新車發佈會中，都可以睇到每一隊車對今年嘅改例都有唔同嘅解讀方式，即使係同樣購入平治引擎嘅William同 Aston Martin，車輛設計已經完全不同，所以我地唔會見到千篇一律嘅賽車設計。咁當然啦，實際都係要等冬測過後先至知道。

不過目前肯定嘅係，以多年來嘅賽車設計哲學，平治嘅優勢絕對係比紅牛大，因為平治嘅設計本身係比較貼地面，而紅牛就選擇黎地面比較高。今年大幅改例，對於紅牛呢啲設計離地面比較遠嘅車隊來講，車隊同車手都要重新適應，所以最後都係要睇邊一個適應能力最快。

規則終於唔再係隨便決定？

上一季我相信對大家印象最深刻嘅就係判決不公平，比利時站整好架車可唔可以出返嚟比賽都無人有個官方答案；尾二站沙特阿拉伯世紀一撞竟然係求其了事；最後一站出唔出安全車竟然可以係由車隊決定而唔係大會決定。呢啲咁嘅天方夜譚式嘅規矩，竟然可以係世界最高殿堂級別嘅運動比賽中發生，絕對係貽笑大方。即係例如英超，李斯特城對曼聯，李斯特城有人犯規，然後領隊可以叫裁判唔好出黃牌，之後到曼聯犯規，明明角球可以傾到變十二碼，呢啲唔應該發生嘅嘢竟然可以係F1出現。所以今年比賽規矩改變其實係另外一個改革嘅大方向。不過我同大家一樣都只係睇好多唔同嘅媒體引述消息來源報道，所以最後會點樣改變我地都只可以拭目以待。

首先我地終於唔使再見到令人好討厭嘅0.5分，因為今年將會完全改變呢個比賽計分制度，簡單啲講就係按比賽完成比例而給予分數。因為我好相信好似舊年比利時站落雨落到賽唔到車嘅情況應該好難再會出現，所以我相信對於大部份人來講都應該係得個知字就算。

另一個比較快見到效果嘅改變就係各車隊唔可以再同賽事總監即時通訊。毋庸置疑，呢一個即時溝通嘅平台令到舊年整季嘅比賽雖然對觀眾來講充滿娛樂性，但係對於賽事總監來講其實需要承受更加之大嘅壓力，而且更加會係比賽途中播出來，令到即使比賽完結，賽事總監仍然需要受到不必要嘅壓力指罵，所以取消呢一個即時溝通嘅方法，除咗可以減低果一刻賽事總監承受極度高壓時作出嘅判斷之外，亦都可以唔使再承受額外嘅壓力。不過，其實整個大會嘅裁判同埋整個體制都需要改革，只可惜嘅係沒有合適嘅人才，所以只可以按部就班。但係正所謂有好過無，一齊就放長雙眼，睇吓今年又會有一年點樣嘅比賽俾我地睇。

總結：放眼2025年

其實我自己就覺得，即使今年係大規模嘅改變，但其實早於2019年賽季期間已經開始宣布會進行大規模改例，我相信各大車隊其實一早已經準備好投入資源進行研發，只係因為疫情關係引致整個改例2021年延遲至2022年，所以我相信仍然會好似我上面咁講，真係唔會一下子將各隊嘅差距拉近，最能夠受惠嘅應該只係下游車隊有機會重回中游。但是我相信改變唔係一朝一夕，今年雖然係大改例，而且引入更加環保嘅E10燃油，令到整個引擎嘅佈局需要重新設計，但始終多餘嘅MGU-K／MGU-H呢啲動能回收系統依然存在，各車隊始終要面對賽車同車手嘅實力差距，我相信今年嘅比賽雖然都會好精彩，但係我相信能夠左右賽場上嘅結果，始終都係要等2025年引入全新嘅引擎，到時先至可以重新洗牌。

我都知道如果要大家坐低要睇足23場比賽應該好困難，咁所以我都大約咁整理咗今年各車隊同埋有邊啲賽站值得大家留意嘅地方。首先講講各支車隊先，平治去年引擎可靠性問題會唔會延續到今年；紅牛舊年最尾幾站都有新嘅升級，對今年賽車研發會唔會有影響；法拉利係咪正如外界咁講，一早將所有資源放入今年嘅研發，希望可以谷底反彈；麥拿倫嘅四萬哥（Daniel Ricciardo）到底識唔識應到今年全新嘅賽車；Alpine仍然係賽場上唯一一對使用雷諾引擎嘅賽車，能夠收集嘅數據一定比其他隊伍少，會唔會對引擎研發有所影響；AlphaTauri 角田裕毅會唔會繼續水土不適；Aston Martin比其他隊伍採用與別不同嘅引擎散熱設計，到底係有咗散熱定係徒勞無功；William資金來源相信仲會係一大問題；Alfa Romeo世界最佳好助手搭上賽場上唯一一個新人，會擦出點樣嘅火花；最後就係Hass，兩個車手會唔會內訌。

最好就講吓有啲咩分站值得留意：首先就係巴林開賽站，大家第一次可以真正理解到今年嘅賽車實力；之後就係咁今年唯一一個新嘅分站：美國邁阿密，因為係一個全新嘅賽道，所以應該會有比較多唔同嘅狀況出現；之後就係去到傳統嘅摩納哥分站，到底今年全新設計嘅賽車，可唔可以正如官方所料係呢度可以製造更多精彩嘅爬頭畫面；跟住就係新加坡站，極有可能成為亞洲地區最後一次舉辦夜戰嘅街道賽；最後就梗係煞科阿布扎比，到底今年會唔會再一次係最後一站先至分出高下。

另外，Netflix F1紀錄片Drive To Survive 第四季將會於3月11號上映，俾大家可以重新回味2021年嘅賽季，有興趣嘅就可以自己去Netflix睇吓好似戲劇一樣嘅2021年F1。

多謝你睇到呢度。咁我地下星期六再見……呀唔係，好似未講個小遊戲係乜。既然今年被譽為有史以來其中一次大規模嘅改變，加上慶祝讚賞公民 Web3改版（雖然好似唔關事，不過都係隨便搵個藉口），不如大家又一齊估下今年到底會發生咩事？又或者邊一個邊一隊會贏車手或者車隊冠軍，歡迎大家係下面留言參加，截止日期時間就係今年F1正賽日比賽熄燈起步之前完結（暫定3月20日晚上11:01，東八時區）。公布結果日期為11月20日（或最後一場比賽）最後一場比賽最後一架車衝個格仔棋為止。禮物方面，正所謂：不如打和啦Super，有留言嘅我都會手寫一張聖誕卡俾你地，不過到時我再＠返你地提你地交地址俾我，如果估中嘅就送100個Likecoin+一份郵寄嘅禮物？估中嘅禮物到時再諗啦，反正仲有咁長時間（或者到時我會係聖誕咭入邊夾埋份禮物俾你呢Www）再一次多謝你睇到呢度，咁就下星期六再見，ありがと。