與孩童相處的矛盾心態

實驗證明，lunch time做生活紀錄係不切實際。上午忙完一輪，食埋個飯，其實係完全唔想做任何野。

今朝本身想紀錄既野，到宜家已經開始有啲唔記得，一忽一忽咁。

我記得老婆琴晚話個囝放學係公園玩既時候，俾同佢玩開果個同伴打，之後仲係到嬉皮笑面，令到佢嬲到要即刻走。然後老婆就係臨訓既傾心事時段同個囝傾返呢件事。

老婆有問，「打完人跟住嬉皮笑臉」呢個畫面好似好熟口面。阿囝又真係答得出係佢平時爆嬲出左手打住媽媽之後果個樣。老婆問，咁你當時係咩心情。阿囝答，好驚，唔知點算。老婆再問，咁你覺得今日你個朋友打完你之後有可能係咩心情。阿囝突然爆氣：「佢特登嫁！」

咦？epic fail喎。

不過佢地再傾多陣，阿囝自己話聽日會再果個朋友講話「如果你下次唔小心打到我，其實只要你同我講sorry，我地就可以做返朋友嫁啦。」一陣返到屋企一定要跟進返呢件事既後續先⋯

我既感想其實係有啲怪，咁我冇係現場啦，始終真係唔知對方係有心定冇心。如果人地真係冇心既話，都ok既，但由阿囝中途爆氣話對方特登黎諗，咁件事既真相到底係咩？其實我就真係好懷疑⋯

不過我當下冇問到老婆，今朝送個囝返工期間都冇問個囝。其實我都唔知點問，有啲怕一問就好似challenge緊咁⋯唉⋯

星期一至五，可以陪個囝既時間基本上得送返學果半個鐘，另加自己放工後至佢訓覺之間大約個半鐘。其實已經揀左份under pay既工，為左唔洗OT，陪屋企既時間可以多返啲，但原來都仲係得好少。

諗返起，個囝疫情果時，話日日都可以對住爸爸媽媽覺得好開心⋯⋯