你哋真係咁憎我哋？

實不相瞞，第一次見到呢句嘢，我第一個感覺係，有一套青春愛情片，有個女仔喺公園 / 球場裡面，追住啊男主角，對眼谷住一公升嘅眼淚，最後講咗一句，「XX，我為你做咗咁多嘢，但係～但係你真係咁憎我？」

之後，我發現呢句嘢原來出自一個男人把口，仲要係一個當差嘅口中，我只能慨嘆，你喺學堂真係幸福，你出咗更咁多年都仲係好幸福。原來，咁多年嚟你都只係一個人番工。原來，咁多年嚟你都無試過同伯母一齊番工。

作為一個前紀律部隊散仔，我當日入學堂最大嘅得著，係我嘅抗D能力。每份工都要面對「客人」，而作為紀律部隊，我哋嘅「客人」一般都影響社會和諧甚至犯法，所以都唔需要更唔想要我哋嘅「服務」。所以，當事情發生嘅時候，「客人」可能會選擇逃跑，就算俾你捉到佢，佢亦好可能選擇「小狗懶刷鞋」你。關於呢個情況，基本上就避無可避，如果「客人」無打我，又或者無數我祖上十八代，其實已經係一個好好嘅客。

不過唔知點解，而家阿SIR好似對自己份工唔係太了解，導致到佢對「客人」有所誤解。喺呢一年，當你哋著住成套防暴衫，全部李小龍上身，不斷喃喃自語「曱甴曱甴」嘅時候，其實你哋已經假定咗你面前嘅係一班「客人」，而唔係路過行街嘅無辜市民。所以，當你無啦啦又好，有啦啦又好咁拉咗佢，佢身為一個正常嘅「客人」，佢DLLM，其實，真係非常合理嘅，亦係預期之內。

如果，阿SIR你真係唔想人哋憎你，或者，你可以選擇唔好成日「標童」玩李小龍上身。又或者，你哋可以去「盜香」飲茶，哪裡的盜賊都「香」了，十分平靜，也沒有人找你娘親。

希望我解答到你嘅疑問。