辣妹 X Cosplay ＝ 《その着せ替え人形は恋をする》

其實近呢幾年，以辣妹做題材嘅漫畫或者動畫其實已經逐漸減少，甚至乎開始絕跡。無他嘅，始終而家市場上一直對辣妹嘅反應都係比較負面，甚至乎回到現實生活都係一樣，所以好多作者都只可以為迎合市場需要而作出改變。至於另一個重點：Cosplay，其實近幾年亦都大眾開始慢慢接受呢一套文化。雖然依家仲有好多人唔明白當中嘅樂趣或者點解要咁樣做，但係有好多樂趣唔親身體驗過自己唔會知。呢兩個大纜都扯唔埋嘅元素，正所謂：不如溝埋一齊做瀨了牛丸吖笨，既然無人做就我做，所以呢一套原作者福田晉一先生就決定創作呢一套漫畫。

首先我想講咗一樣我由頭到尾都接受唔到嘅野先，就係個中文譯名。無論係《戀上換裝娃娃》定係《更衣人偶墜入愛河》，或者其他譯名都好，總係感覺去唔到果種意境。日文原名《その着せ替え人形は恋をする》如果直接翻譯就係成為《那個更衣公仔在戀愛》，但係呢個名實在太古怪，所以就有咗一開頭果兩個譯名，但係始終去唔到果種感覺，所以之後我會用《着せ恋》稱呼呢一套作品。

講咗原作者先，福田晉一先生係2003年出道，作品有《シバラク》、《桃色メロイック》同今日要介紹嘅《その着せ替え人形は恋をする》。唔講大家可能唔知，可能好多人聽到個名同埋睇到呢一套嘅標題，就以為個作者係男性。實際唔係，係市場上少見嘅女性漫畫家之一。其實一開頭我睇原作漫畫嘅時候都以為係男性漫畫家，因為大部份嘅情節或者尺度都比較偏向男性化，但係睇完維基百科之後先知道原來係一個女性嘅漫畫家。而呢一套《着せ恋》其實本身雖然都係一套男性向嘅漫畫，但係睇到大約40話之後先至隱約發現偏向女性向漫畫家風格。但係因為始終題材屬於市場上比較罕見嘅類型，加上女主角嘅身材實在太好、漫畫嘅繪畫實在太美麗，所以亦都深受大量女性喜愛。根據一項2021年嘅調查，男女讀者比例大約係70／30，當中細膩嘅人物描寫亦都成為咗好多女性會觀看呢套漫畫嘅原因。加上福田先生善用Cosplay呢一個主題，令到無論係男性定女性都好容易代入其中，所以令到呢一套係宣布動畫化之前已經輕鬆獲得多個獎項，而且更於2022年3月宣布累計總發行量超過550萬本，以一套2018年開始連載嘅漫畫黎講，呢個成績絕對實至名歸。

故事就係講述一個係學校婆受歡迎嘅辣妹，喜多村海夢（喜多川 海夢），因為對自己喜歡嘅角色好有愛，所以就決定想Cosplay。但係基於自己技術欠佳，所以即使自己購入了衣服進行修改但係仍然相差甚遠。與此同時，本套男主角五条新菜（五条 新菜），屋企係經營人偶製作生意，順理成章亦都希望將來成為一位人偶製作師傅。首先我想講講咩係人偶先，雖然係日文解釋係公仔，但係呢度指嘅人偶唔係我地平時見到毛絨絨那些公仔，而係傳統日本女兒節擺出黎一個個好精美果種公仔。而係有一日，因為新菜屋企嘅衣車壞了，所以就決定放學後留在學校家政室製作衣服。偏偏遇着剛剛，係有一日放學嘅時候，新菜在家政室使用衣車嘅時候，海夢突然入咗去，本來都係希望利用學校嘅衣車製作衣服，但係見到同班同學新菜係度使用衣車，所以就問佢係唔係識得用。之後就即場穿上自己製作嘅Cosplay衣服。但係始終還原度太低，結果遭到新菜吐槽，之後就決定邀請新菜幫她製作唔同嘅Cosplay衣服。久而久之，經過幾次製作之後，海夢慢慢發現自己逐漸愛上新菜，但係新菜卻惘然不知（我都係要睇到呢度先至開始發現佢係一套比較偏向女性化嘅作品，因為咁嘅情節應該之後係女性漫畫會出現。）故事大約就係咁啦，即使去到最新一話，海夢都仲未正式同新菜表白。希望最後就唔好好似隔離《拖稿女友》咁，啊打錯唔好意思，係《出租女友》先啱，拖咗成40話先至叫做有啲眉目。

其實人偶呢一個傳統手藝，係日本亦都出現青黃不接嘅情況，畢竟日本人口老化同少子化問題係全亞洲數一數二，加上呢一種工藝主要係傳俾自己人，甚少願意傳比外人，所以亦都令到呢一個行業成為夕陽行業。原作者福田先生曾經係一篇訪問中表示，會使用呢一個題材係因為佢細個嘅時候祖父亦都係從事呢一個行業，所以希望可以作一的紀念。加上係佢身邊亦都有製作人偶同學同喜歡Cosplay嘅同學，所以就將兩樣完全沒有關連嘅特性混合埋一齊，創作呢一套故事。而動畫尚未播放之前，男主角新菜嘅人偶工場其實亦都係真實存在，就係係埼玉縣埼玉市嘅「人形工房 天祥（株式会社公司人形）」。而順理成章，亦都成為咗一個聖地，而且係動畫播放之後，人氣更加係急速上升，之後如果疫情完全過去可以回覆日常生活嘅時候，我諗我都會花少少時間揸車過去參觀，始終而家係日本仍然以全手工製作人偶嘅店舖實在已經買少見少。

辣妹呢一樣野其實正如我一開頭咁講，近幾年已經開始絕跡。始終社會大眾對呢一樣野一直都有不良嘅感覺。就算返到係二次元都好，始終辣妹係好多人嘅心目中已經係偏向自我中心、令人討厭嘅角色，所以近幾年有辣妹出現嘅作文其實好似真係無乜。對上一套我有印象嘅已經係2016年動畫化嘅《百無禁忌！女高中生私房話（おしえて！ ギャル子ちゃん）》。反觀呢一套，雖然都係用辣妺做主題，但係相對上佢係比較友善果種。（容許我澄清一樣野先，每種人都有好有壞，唔係話辣妹就等於唔好嘅人，我相信當中亦都有好多好人係存在，只係因為社會嘅約定俗成令到咁嘅偏見出現）其實辣妹都只係一個普通人，鍾意Cosplay亦都純粹只係一個個人興趣，但係正如動畫第一集咁講，明明只係對一的自己鍾意嘅野有興趣，但係其他人就要用有色眼鏡黎睇？其實就算係漫畫或者動畫都好，我地見到就算呢啲咁小圈子嘅文化，但係只要搵到一班同好，有人願意接納自己，找到屬於自己嘅空間，當中嘅喜悅先至係最大嘅得益。

動漫已經開始進入大部份人嘅生活入邊，亦都有更多人開始嘗試接觸或者理解動漫呢一樣野。Cosplay呢一樣野即使到咗今時今日，但係唔知點解普羅大眾對於Cosplay呢一種副產品好多人都仲係唔鍾意，甚至乎會覺得點解要咁樣做。其實呢一套作品係未宣布動畫化之前已經有咁高嘅人氣，係因為佢可以將Cosplay嘅辛酸顯示係大家眼前。作為一個Cosplay攝影師，其實大家可能以為淨係係相機上面撳個快門咁簡單，但係其實背後亦都係同 Cosplayer 一樣咁辛苦。唔講大家可能唔知，由製作一套衣服到係唔同場合出現，除咗係金錢同時間嘅消耗外，更加重要嘅係心機。雖然依家大家上網撳個掣就已經可以買到 Cosplay 衣服進行最簡單嘅Cosplay，但係正如動畫入邊咁講一樣，一套衣服如果唔進行改裝，你買嘅只係同個色一樣嘅衣服而唔係 Cosplay。假如從零開始，製作衣服最保守最保守估計都最少20到30小時，然後到達會場更衣和化妝等等最少也要花1小時，然後仲要着住Cosplay衣服係場地不停走動和做出不同動作供人攝影（當然衣服有輕有重，最輕嘅可能只係一套泳衣或者校服，重嘅可能講緊4-5KG），唔理係室內定係室外，咁樣連續幾個鐘活動，唔凍死都熱死，而且所有都係自願，沒有任何報酬，純粹只係為咗興趣，所以即使我身為攝影師，我一直都好佩服Cosplayer 嘅耐性。而作為攝影師嘅我，如果係大型動人活動，例如香港嘅Rainbow Gala ，台灣嘅C.W.T、Fancy Frontier，日本嘅Comit Market，當然都係到處走動，所以都可能只係撳個快門影張相咁簡單。但係有時會為咗朋友而進行私人攝影，果時候就會化身一個十項全能嘅人。除咗要幫忙照顧同行者隨身行李之外，有陣時仲要幫手化妝等等，而且大部份都係室外攝影，烈日當空嘅辛苦程度絕對係大家難以想像，不過請容許我引用海夢其中一句：只要有愛就得。其實係呢個作品入邊我地見到嘅係，由製作到攝影整個過程其實都係環環相扣，雖然沒有所謂嘅deadline，但畢竟全部都係心機之作，愈投放放越多心機落去，出嚟嘅成品當然係越好。即使面對困難同挑戰，新菜每一次都可以完整還原為海夢製作的衣服。所以請容許我任性咁樣講，依家好多小朋友都只係喺淘X買套衣服，然後直係穿上就係當Cosplay，呢種咁嘅態度其實真係好乞人憎，佢地絕對係侮辱咗個果角色。

另外一個唔同嘅地方，就係相比起其他作品，即使係以一個偏向男性向嘅作品，但係卻用一個女主角嘅角度出發；相比起大部份以男性主角作為主導嘅作品，絕對係令人眼前一亮。雖然有好多作品都會用女性角度出發，但始終大部份作者都係男性；相比起呢一部作品係由女性創作，當中嘅對話和心境彷彿就由一個女性角度出發，除咗比男性漫畫家更為細緻之外，更加準確地描寫女孩子嘅心境，係愛情漫畫或者動畫呢一方面絕對係比較少見。

其實呢一套係動畫播放之前已經算係有些人氣，係動畫播放之後更加係人氣急升。其實我諗最主要原因都係歸功於尺度比較大有關。其實呢一個題材相比起其他類型題材，絕對係比較少見嘅一種。如果話校園戀愛又完全稱不上，但係如果純粹戀愛喜劇又未達到果種程度，所以都算係令好多人眼前一亮，而動畫嘅第一集其實已經突顯到海夢嘅身材有幾好。當然稱得上辣妹，身材必然有返咁上下，但係佢果種身材正正就係以前日本最多辣妹嘅標準身材。之後其實每一集都總有大尺度嘅部份，我就唔多講啦，不過當然，有大部份係動畫自行加上，原作漫畫只係輕輕帶過。但係亦都因為咁大尺度（AT-X版本甚至有全裸出現），令到成個作品嘅人氣急速上升。相比起其他作品，呢一套嘅動畫製作相亦都係我之前介紹過製作《堀與宮村》嘅CloverWorks，資金絕對唔係問題，製作亦都係水準保證。但係係第12集完結果一集，佢連同當日另外一套完結嘅《明日同學水手服》，因為兩套嘅作畫實在超乎想像，所以就即刻有相關人士在Twitter爆料聲稱呢兩套最後一集嘅總經費合共超過3億日圓（現時已經不能再找到相關post），需要知道目前一集嘅動畫大約都只係1億日元左右，一季十二集嘅動畫就大約12～13億日元左右，而呢兩套動畫，單單係最後一集，花費已經係其他製造商可以製作兩集甚至三集嘅價錢，可見為咗成為霸權，無所不用其極。不過調返轉咁講，最後果一幕煙花場景真係好靚，無好似其他動畫咁樣草草了事，絕對值得一看。

總結來講，女主角個心境變化其實真係好少女漫畫咁，真係無乜特別；而男主角亦都比較似係一個工作狂，對於愛情極度遲鈍。但係相比起異世界或者國王排名等等，呢一套作品彷彿就係令人了解不為人知嘅 Cosplay 一面，雖然劇情一直都係歡樂地渡過每一個情節，但係彷彿亦都可以令人明白Cosplay絕對唔係一般人可以了解嘅辛酸。今次就講到呢度先，星期六再見，88。