F1 2021 大事回顧
經歷咗目前史上最長嘅F1賽季之後,除咗用瘋狂黎形容都唔知有咩好講。不過係展望2022年新賽季之前,不如就等我哋回想一下今年完全瘋狂嘅賽季發生咗啲咩事,同埋一啲我個人嘅見解。如果想睇返每一站比賽嘅大約回顧,請稍移玉步去關聯文章。
首先就講吓今年新增嘅賽事:短途排位賽,或者叫衝刺排位賽。又係將原本係星期六嘅排位搬咗去星期五,然後原定星期六嘅時間就改為舉行不少於100公里的比賽,而且不用進行Pit Stop,純粹可以比較技術但其實係咪真係有需要呢?其實我就兩睇,好個方面就係三日都可以欣賞到精彩嘅比賽,不過除咗呢樣係好處之外我諗唔到有乜其他,所以就直接跳去壞處。首先依家最令人垢病嘅係成個比賽有啲到喉唔到肺,依家好似將400公里嘅比賽先係星期六舉行100公里,之後剩低嗰啲擺到去星期日繼續,既無好似F2/F3咁樣倒轉排位,(容許我又唔任性少少講)大家亦都唔係用一樣規格嘅車,咁大會願意為咗就係想有一個公平嘅環境令到車手競爭,但係既然大家規格唔一樣甚至乎已經決定咗星期日嘅起步名次,咁其實仲係唔係公平?或者其實係唔係多餘呢?因為就同星期日正賽一樣,上游同下游車隊嘅分水嶺其實係無消失過,其實又係唔係真係有用呢?大會舉辦呢個短途排位賽目的就係想吸引一班新車迷觀看比賽,但係如果連一場300公里大約一個半小時嘅比賽都吸引唔到人嘅時候,咁點解可以覺得呢個100公里大約一個鐘左右嘅比賽可以吸引到更多人欣賞呢?
![](https://assets.matters.news/embed/06fc3b8b-97f3-473d-9c95-9d56f4eaf87c.jpeg)
講完短途排位又講吓今年嘅賽程,今年嘅賽程係有史以來最多分站嘅一年,雖然繼續因為受到疫情影響而取消咗一站,但係都有22場比賽。經歷咗兩個Double Header(連續兩星期比賽)同三個Triple Header(連續三星期比賽),無可否認嘅係作為車迷來講絕對係興奮啦,但係其實對於除隊嘅工作人員來講都可以話算係最辛苦嘅一年。其實運輸問題亦都開始浮現,係今年有史以來最長嘅比賽比利時站,因為比賽時間嚴重超時,導致到物流需要延遲開始,但幸好沒有影響下一站荷蘭站的比賽。需要知道F1在開始比賽之後便會開始打包物品運送前往下一站,在歐洲賽站,站與站之間平均需要連續不停24小時開車前往下一分站比賽場地,星期日正式比賽完結之後大約星期二左右大部份物資便會抵達下一站比賽場地;如果在非歐洲賽站,站與站之間移動主要是利用飛機進行運輸。原本理論上就好完美,但係今年巴西發生發生咗嚴重事故,因為天氣問題都是航班嚴重延誤,引致全部車隊也要通宵工作,在有限時間來砌好比賽用的戰車,加上嚴重嘅時差問題導致不少工作人員均表現出疲態。去到最後一站嘅時候,我哋可以睇到其到RUS同GIO 都因為車輛失去控制而先後退賽,雖然你可以話同工作人員無關,但係我哋可以睇到嘅係其實好多工作人員臉上已經有好嚴重嘅疲累情況出現。如果一切順利,明年開始將會有更加緊湊嘅賽季,作為觀眾雖然係好開心,但我相信明年去到季末嘅時候會有更多人有更疲累嘅表情出現,所以我相信大會應該係製造更多比賽嘅時候兼顧工作人員有適當嘅休息,否則我相信更多有人為因素嘅意外會更常出現。
之後就想講吓今年FIA判決呢個問題,其實都已經係不停搬龍門,甚至乎已經去到黑哨嘅程度。由季初巴林站,之後去到英國,暑假之後嘅比利時,意大利Monza,甚至乎去到最後兩站嘅沙特阿拉伯同埋阿布扎比,我哋都可以睇到FIA嘅判決其實都真係好難捉摸。今季係第一次會播放車隊同大會之間嘅通訊記錄,所以我哋當中亦都聽到好多以前未聽過嘅嘢,無可否認咁樣係可以增加成個賽事嘅樂趣,但亦都可以睇得出就係大會究竟有無偏幫邊一隊(不過呢個我覺得真係每一個分站都有唔同嘅睇法)。其實係第一站巴林嘅時候,我哋可以睇到HAM多次出界都無事,但MAX只係因為出界一次就要交還位置,雖然無可否認嘅係MAX的而且確係界外爬頭,但係如果記得嗰陣時大會同紅牛嘅溝通,係因為紅牛同大會講HAM跑出左賽道出邊29次,之後大會先至叫平治停止這種行為,有一種小學生看破不要過界的遊戲。去到比利時站,PER因為在維修區起步前往起點是意外炒車,需要進行緊急維修,但好彩因為比賽一直尚未開始,他和他們的工程團隊可以在4小時後完成緊急維修重新起步,但是大會卻一直沒有表明即使完成車輛維修仍可不可以回到賽道進行比賽,叫紅牛自己決定,可以睇得出FIA根本連出唔出得賽都唔知。去到巴西同埋沙特阿拉伯,兩次HAM同MAX嘅意外,大會都係話Let them race,但相比起英國同埋意大利嘅判決,可以睇得出原來只要無人因意外退出比賽,就可以隨便佢哋Let them race?呢一個已經係去到有啲唔公平嘅問題,因為如果根據F1 Sporting Regulations 寫明,如果其中一方故意迫對手出賽道外面,就必須接受調查甚至懲罰,正如奧地利站PER迫LEC出賽到外面碎石對面要接受懲罰,但現在卻決定讓他們繼續比賽,是不是代表規矩只是用來參考?去到最後一站阿布扎比,其實我諗全世界目光都係最後一個圈,無可否認其實大會當時絕對可以出示紅旗,讓兩位大哥都可以進Pit換胎好好地比賽,或者決定提早讓車爬頭會到隊未起步,又或者決定安全車引領到比賽終結,唔會導致現在MAX即使贏了世界冠軍,但仍是被各種不同的妖魔化,而且也令到很多人覺得他現在根本上是不值得既這個世界冠軍,因為某程度上咁樣完結仲係唔係一個公平嘅比賽呢?不過又容許我咁樣講,MAX今季表現絕對係值得攞世界冠軍,只係而家贏得好唔光彩。我相信如果大會出年都仲係有呢啲問題出現,或者甚至乎懲罰可以同車隊私下談判解決嘅話(詳情請參考沙特阿拉伯集第二次紅旗期間),我諗長遠對F1發展應該唔係好事,甚至乎如果呢啲黑哨嘅情況繼續出現,甚至會有可能令到現有車隊考慮退出比賽,因為係一個唔公平嘅環境之下進行比賽,咁仲有啲咩意義?
![](https://assets.matters.news/embed/664fc8e0-1e49-4ada-9afd-413413031100.jpeg)
之後就講吓三個新人表現,首先當然係最受矚目嘅角田裕毅,老實講,相比起上半季,下半季嘅表現相對比較穩定,甚至乎最後一站去到第四名完賽,雖然佢未能完賽嘅次數比MSC多一場,但係可以睇得出佢開始對AlphaTauri戰車有信心,雖然無可否認佢上半季嘅成績比下半季優勝好多,但我相信經過今年嘅體驗之後,明年應該可以交出一張比今年更好嘅成績表,如果唔係我諗出年可能就係佢最後一年。至於HAAS兩名新人,MSC和MAZ,先講MSC,雖然佢長時間也是在最後陪跑,但可以睇得出佢表現十分穩定,不過也像在F3/F2時期一樣,一年比賽有啲慢熱,希望出年就可以見到佢有能力同角田角田裕毅競爭。至於最後一名新人:MAZ,其實都唔使講,今年每一站嘅排位賽其實都係得19個位,因為最後一個大部份賽站都係佢包底,今年合共22站比賽,合共Spins咗22.5次,如果有最佳冬甩王,我諗都非佢莫屬。佢大部份比賽長時間都係包底,甚至乎激嬲晒賽上面其他19位車手,而且又多次無視藍旗和車手之間的君子協定,絕對是一個最佳的反派角色。不過,我諗除非有大風大浪,否則未來幾年我哋都應該繼續可以係賽上面見到冬甩王喺度做冬甩。
最後,容許我離題少少,因為要講嘅係一件全亞洲車迷都比較傷感嘅事。我諗呢件事相比起今年啲比賽有幾精彩都好,呢一件事絕對係一件遺憾嘅事,就係營運咗30年嘅FOX Sport Asia宣布終止廣播。我諗對於好多人來講,當初會留意唔同嘅體育運動,當然絕對唔止係因為睇到FOX Sport,最主要都係因為有當地語言嘅旁述,先至令到更多人去了解甚至乎入坑。我自己當初就係因為聽到有廣東話評述F1同MotoGP先至開始了解同埋留意呢兩項賽車運動。我諗喺係依家呢個年代,即使現在大家都用自己嘅方法去觀賞唔同嘅體育賽事,當然我自己就係課金買咗F1TV Pro同 MotoGP Video Pass,但係總係感覺失色不少,因為缺少咗耳熟能詳嘅廣東話旁述,彷彿就好似缺少咗一啲嘢,失色不少。係香港呢一個缺乏汽車工業嘅地方,要推薦賽車運動從來唔係一件容易嘅事,雖然而家NOW繼續播放F1比賽和設有廣東話評述,但MotoGP仍然未有消息,所以我相信將來要繼續推廣賽車運動只會難上加難。如果他朝有一日,丹尼爾陳恩能或者邢安邦有機會睇到呢一段,我衷心、發自內心感謝你哋兩個教識咗我如何睇F1同MotoGP,希望他朝有一日可以再一次聽到兩個一齊評述唔同嘅賽車比賽。
![](https://assets.matters.news/embed/16665dd9-82b5-4749-a13d-0bf5c81dbafc.png)
再一次衷心多謝你睇晒成篇文章,希望大家可以慷慨解囊係下面拍五吓手,作為繼續支持我創作嘅原動力(土下座 當然亦都歡迎大家喺下面留言討論
P.S. 下一次再講F1應該就係出年2-3月新車發佈之後或者冬季測試前後,希望大家到時亦都可以繼續支持