My little detour - 《繼續hea爆身心靈 》

今朝7點幾8點已經聽到擺盤聲， 諗緊係咪佢地家庭早餐呢？ 因為我琴日聽到有一大棚人嚟左， 搞到好夜先瞓到。 其實8點出過去亮下相， 但又無人理我喎！ 咁我又返房hea到9點， 終於忍唔住出去望， 餐盤依然ready係到， 而我個碟亦都放好了。 咁我望入廚房， 但又無人望到我， 直至度門比我唔小心嘭埋左， 終於有人alert我嘅存在喇🤪。 原來係host個仔， 咁佢地開始幫我準備早餐， 包括有mango juice, black coffee, bun, 腸仔片， 西瓜同菠蘿...我只可以講， 討價還價回來的早餐係咁上下了🤣。

而到呢刻， 我終於知道琴日夜晚出現嘅人並唔係親友， 而係住客！ 咁我食完早時候就問host晚飯係咩， 佢講極我都唔明， 後來佢個仔話係crab呀， 咦！ 好吸引喎， 所以我又決定食呢個晚餐喇 （5cuc)！ 搞掂晒的嘢首先去睇賣日用品的地方睇下有無水賣， 好彩有不過係sparkling water，但都算正常價17.5cup。

比埋錢我又去viazul喇， 去到寫左名明天先比錢， 我揀左12:30pm車返Havana, fit晒！

既然都係諗住五點零先去游水， 咁我當然周圍行，好開心喎， 我幾鍾意呢到， 無咩人主動兜售d咩， 個個人都好nice。 我行行下仲有個妹妹無啦啦摘左自己屋企的茶花送比我， 好開心呀， u made my day!

本來諗住返去hea坐搖搖椅， 但新來的家庭們 （起碼兩個family坐左， 仲要係我門口勁嘈😭😭😭, 既然係咁， 我唯有帶埋mp3去前門坐搖搖椅避世喇！

不過好彩坐一陣佢地就揸車出左去， 都應該去沙灘無誤。 不過十一點幾十二點， 我真係難抵個太陽， 所以我又在房外搖搖椅搖左成粒鐘再返屋瞓陣。 4點零， 終於到左我復活的時間，我搽晒防曬心換晒衫， 首先出去買多枝水先 （17.5cup), 之後就返homestay攞野再去沙灘。 當途經隔離再隔離間屋時， 見返琴日的清潔房間嬸嬸， 佢琴日已經話佢有好多芒果， 我諗佢意思叫我去食， 咁今日經過佢真係叫我入去， 我話我去游水呀唔要住喇！ 但佢的好意令我覺得好sweet, 我地就kiss goodbye 了。 

果然係星期一， 沙灘唔多人， 我影左兩張相後就落水了， 夾埋我先得三個人係水， 但好似琴日的水靚d, 有個外國人仲問我點知有呢個beach, 我話因為我周圍騰所以發現架囉。咁我落到水又可以自如咁有， 仲見到少少魚添， 當然過膊頭的水深我無去啦！ 游左陣我就左上岸嘆coco water (1 cuc), 仲搵到個靚位， 就係建高左的木坐椅， 係到吹吹風嘆椰青真係不能言喻的爽🤣 。

坐到差不多7點我就動身回homestay了， 嘩， 沿途的風光都很美， 啲雲又鑲有金邊， 靚到相機不斷 ‘chap chap chap’。

經過清潔嬸嬸屋企， 我純粹望下諗住打個招呼， 點知佢係屋入面見到， 佢走去揀左幾個芒果就出嚟， 我睇至少揀左6-7個比我， 但我話要一個得喇， 真係so sweet ar!

返到homestay差唔多開飯， 擺盤已放好， 再隔多陣就上菜， 原來的蟹係拆肉上碟， 仲有煎香蕉片、粟米茸餅， 粟米炒飯， 蒸南瓜同埋西瓜芒果併盤， 個飯同粟米餅好食， 但蟹肉有點兒過咸， 勁過琴日的魚， 唔通老人家都一樣， 味蕾開始退化？

食得太飽， 所以衫都未換就走左出去行個圈， 嘩， 個紅霞好靚呀！ 

今日共用： 33.85 cuc+25cup

20cup 找0.1 cuc water

5 cuc dinner

20 cup 找0.1 cuc water

25 cup coco water