古錢幣收藏和垃圾佬的春秋大夢

今年古錢幣拍賣行Stack's Bowers & Ponterio Hong Kong 喺剛剛呢個星期完成網上拍賣活動。

機制幣嘅成交價格竟然比起早兩年創出新高，呢個係我估唔到嘅走勢

上年國內經濟開始轉差，我和朋友之前嘅估計是國內收藏家需要套現，所以成交價理論上係會漸趨下滑。

同時間由於經濟轉差，會有收藏家將心頭好割愛賣出套現。

可能由於大家都睇到現金唔值錢，而稀世珍品數量有限，難得有收藏家割愛賣出高質素藏品，競爭價格都比較激烈(當然任何拍賣行都一定會有打手做媒)

不過對於古幣嘅成交價格，我其實冇乜太大興趣。

反而我係好鍾意古錢幣背後嘅故事

其實由細到大，我對各國家嘅錢幣都有一種特別嘅喜好。以前去旅行同埋出國讀書，都會收起一啲特別嘅紙幣和硬幣

但係對古錢幣呢一科，我本身係一無所知的，直至到有一次新年聚會，一個細叔伯將佢嘅珍藏攞出嚟俾我睇，令我大開眼界。

佢拎左一盒非常唔起眼，誇張啲講，直頭好似喺垃圾站執到嘅木盒俾我睇

一打開，入邊竟然有6,70個超高質素嘅機制銀幣。

有宣統年造，有光緒年造，有袁世凱，有孫中山幣，有雙𣄃幣，有大日本明治鉑金幣，每一件都係稀世珍品。

我成日都話古董係會自己揀主人, 唔係你有錢就一定會買得到

我呢個細叔伯做開市政工程，會經常喺香港山卡罅地方開工。

呢啲古錢幣係佢呢四十幾年來，喺唔同嘅地方打拆或者掘地嘅時候發現的

當中有一部份係佢當年喺麗港城未填海嘅時候喺碼頭邊掘出來的。

相信係當年走難的有錢佬，上岸時為避免比官兵發現而埋藏喺地下的

相信有錢佬上岸後可能已遭遇不幸，令到呢批錢幣長埋咗喺地下，直至遇到好嘅主人先重見天日。

每一個錢幣，每一件古董都有佢嘅故事

由錢幣嘅誕生，中間經歷過嘅每一個交易，走過嘅每一片汪洋與大地，見證著每個人嘅樂與怒，霸權嘅盛與衰，穿梭著人類無止盡嘅欲望, 眾生嘅春秋大夢。 呢個先係引人入勝嘅地方

如果你只係着眼一件古董的現金價值，實在係有點俗不可擋

所以細叔伯老婆成日都掛喺口邊”我老公正一係垃圾佬, 日日開工都執爛銅爛鐵返嚟”

我絕對同意佢呢個講法

因為當時我上網搵到佢每一件收藏品嘅最新成交價格，但佢聽完之後都係嗤之以鼻，笑一笑就算。

就係正正因為細叔伯真係垃圾佬，佢對所有古幣，爛銅爛鐵係真心真意咁對待，耐唔時攞出嚟把玩一下。

佢對所有嘅收藏品嘅現金價值毫不在乎，呢個先係真正嘅大收藏家

人生匆匆幾十年，何為財富？人與人之間嘅每刻歡愉交流，智慧嘅傳承已經係無價之寶

希望大家可以做到北宋文學家范仲淹提及嘅境界 “ 不以物喜 不以己悲”

好好提升自己嘅內涵修養

#古幣收藏

#跌眼鏡

#垃圾佬的故事

#第時得返虛擬貨幣無得再收藏

本文轉載自 ‘智慧社區 Wise Community’ Facebook 2020年5月10日貼文