<角醒>是由大角咀街坊自發成立的社區報，由2020年起，每2個月發行一次。在大時代洪流下，我們選擇從小處出發，在角落處點一盞燈。如果你有興趣加入製作團體，請填妥以下資料，我們將於稍後聯絡你： https://forms.gle/Cp78YdYSs71bn4zu6 如果你是大角咀商戶，歡迎加入成為派發點： https://forms.gle/ZWCmSUYqwhEYiPR19

大角咀工廈奇觀

2022 年 8 月 20 日（编辑过）

「香港地」想搵個可以製造模型、改裝遙控車嘅空間相當困難:無論地區、鋪租、燈油火蠟，全部成本開支根本不成比例，所以好多人想圓夢都只留下殘夢。一場疫情事過境遷，香港人逐漸習慣到野外走一走，在家中煮兩味，跟小朋友也多做手作，碰巧這個時勢一名電影導演鄭英偉先生萌生了共享工場的念頭，在他Studio有限的空間內搭建一個讓年青人可以發揮無限創意的地方－「永動機地」。

記: 你點樣會諗到呢個idea去建立「永動機地」？

鄭: 其實我由細到大都好鍾意做手作，加上畢業後入了電影行業，有時候電影道具都係我親手製造出來，但就慢慢發現自己想做嘅嘢唔夠空間，主要因為之前公司有適合空間地方俾我去做，還會有固定位置同空間俾我去做，因為好多時候唔係一時三刻可以完成，所以更需要一個地方可以安置到，再加上公司有預算比我買道具及工具，以上種種原因就突然聯想到，如果我公司可以多功能運作，可能會俾大家發掘到更多意念出來，咁就毅然創造呢個「永動機地」。

記: 咁你建立「永動機地」時遇到有什麼困難？

鄭: 困難？超多！首先選地點，本來我電影廣告製作公司係柴灣，但如果佢係柴灣真係「“搵鬼嚟咩“」！，之後就打算搵返九龍區，但其實選擇都好局限，之後就自己走落街走樓梯，睇咗好多單位都劏到鬼五馬六，本來目標搵一個3000呎樓下的單位，一下子無奈降低要求去搵1000至2000呎，更無奈同所想空間係有出入，最後喺大角咀搵到個呢個單位，上晝睇下晝租。

記: 聽你咁講你係有心喺大角咀發展？

鄭: 起初無諗，不過自己行過就覺得呢到幾好，買手作材料嘅地方周圍都有，工具又喺度，晚上又多嘢食，好多時做創作晚上係黃金時間仲可能通宵達旦，補給好緊要加上好多時夜咗左走，嚟玩嘅朋友仔都好容易搵到車返屋企。

記: 不如你又講吓你哋有咩配備同埋有咩用嚟做啲乜嘢？

鄭: 而家暫時都係一啲朋友介紹來嘅新朋友，佢哋喺呢度都會有自己嘅工作枱，有啲志在參與就可能係中間長枱整佢哋嘅嘢，工具基本上有螺絲批、鑽、鋸、尺、夾、筆油都齊，另外有大型3D Print機，CNC，鑽床都會有。通常佢哋嚟都係改模型或者出版模型，另一班就玩下四驅車及改裝遙控車，我就指導性質係到幫佢哋。另外有電腦提供做圖，有班就會出圖做代工做版，以上呢啲工作可能就係而家香港最缺地方做，所以好多時一到夜晚放假，成班人就返晒嚟做佢哋想做嘅嘢。

記:嚟緊永動機地有咩發展方向？

鄭: 我哋而家正在籌備一個結合賽車同香港元素既project，用一個較細嘅比例還原香港被改建嘅街道，一方面出圖打版出來做擺件，另一方面就同玩具公司合作研發同推出配合比例、香港製造嘅遙控車，加上VR技術去實現在香港場景裏面賽車，以玩樂嘅比賽模式，去提醒下一代嘅人，香港原貌係點樣，繼而令到玩車呢班可以喺香港道場鬥車競技，畢竟香港賽車係連小型車場都容不下，到現在連玩玩具車嘅地方都所剩無己。

後記: 香港呢個石屎森林裏除了錢銀、金融，其實都有好多有心有力嘅人去拼搏一條圓夢嘅路，喺大角咀呢一區少少一個地方，就已經有不同嘅嘢俾我哋發掘，可能你由橋底嘅住宅區走過一條馬路，到了工業區，跟你身邊的人擦身而過，微不足道，但幾多耐人尋味嘅故事係我哋會知道呢？他們未必令人津津樂道，唯又有幾多人想過，呢一個神奇嘅地區，由人生到終結又有幾多微不足道嘅嘢俾我哋去發掘？