「孤獨感使人擱淺，連結是救贖，我們都是命運共同體」閱讀｜電影｜歷史｜語學｜生活｜流行文化｜國際時事 https://ko-fi.com/sarenechan 如你願意支持我繼續努力，可以請我一杯茶🍵 Patreon, Medium, 方格子同步更新 @sarenechan14

和你寫電影 (狂舞派3)

2021 年 3 月 2 日（编辑过）

無力的日子最適合寫信和時代日記。累得不想寫影評甚至不想看電影，又不願荒廢光陰，就跟手足談電影吧，算是給自己下一條頹廢的底線。

手足你好：

願你一切安好，保重身體。

近期上映《狂舞派3》，都想同你分享下。本身冇睇過《狂舞派》，預期會講下青春、熱血、夢想之類嘅野啦，但都聽過人地講少少，會提到地產霸權、年輕人嘅困境，知道套戲都唔係咁輕鬆嘅。

咁電影一開始就係話一班熱愛跳舞、紮根「龍城」區工廈嘅年輕artists （主要係dancer同rapper）係拍完《狂舞派》1同2之後，開始多左知名度同工作機會，更引尼「城市優化辦公室」嘅注意，邀請佢地推廣區內所謂活化計劃。整個「狂舞街」出尼，然後整啲graffiti塗鴉啊，不時現身跳舞表演啊，拍好多宣傳片去推廣所謂活化。

接呢單工作嘅負責人本身同成員講，要隱藏左自己嘅立場先（即係捍衛「龍城」社區同artists），有咩唔妥咪隨時走人囉。通過呢單工作賺到錢，幫返社區同其他artists咪得。

但好快，佢地就發覺參與係「優化計劃」所帶尼嘅傷害，遠遠多於想幫助到社區同artists嘅力量。所謂活化，只不過令更多artists被迫遷，冇辦法繼續工作同生活。而artists亦都冇可以做街頭表演嘅空間（係被劃分嘅區域做表演，根本就失去公共空間、同街頭互動嘅意義）。為左錢、為左Like，佢地漸漸失去初衷、夢想、熱忱同真誠。而當佢地「良心發現」，唔想再做地產霸權嘅幫兇，卻礙於城優辦嘅權力、地位，只能夠屈服，唔可以做自己。

電影最後，係其中一個半途消失、忍受唔到繼續做幫兇嘅成員，係活化項目嘅動土儀式上「搶咪」霸佔舞台，盡訴霸權嘅不公，一心捍衛自己嘅社區、自己嘅屋企。而在場嘅保安就不斷阻撓、撲上去表演者度，甚至粗暴地整傷小學生，場面係一片混亂中結束。

睇完套戲，都令我反思好多，到底咩至係「兩全其美」嘅方法？又或者，其實有冇可能真正做到「兩全其美」？如果唔做幫兇，又真係冇乜機會搵到錢，亦因此唔會有充足資源去做想做嘅野。（香港地，肯支持藝術創作嘅人太少啦。）但做幫兇，失去嘅野、令人地失去嘅可能仲多。只係，我地可能成世就係咁，餓就未必餓死嘅，但都冇改善自己同他人生活嘅計劃。而呢樣野，同改變唔到嘅現實，又好唔公平。

套戲睇到最尾都睇到眼濕濕，努力忍住唔喊，覺得睇跳舞、hip hop片都喊好奇怪咁。但同行朋友睇完出尼，都覺得傷感，亦見到隔離個觀眾抹眼。電影反映嘅野真實，先會令人動容；但都要有關心我城、關心社區，願意繼續思考、感受、批判嘅人，先會為電影而動容。

除左反思同傷感之外，其實我都好感動甚至雀躍可以透過電影去認識到一班舞者同rapper。平時冇乜留意rap方面嘅也，睇到套戲，驚嘆香港rapper都好高質，佢地對廣東話嘅運用同了解好正！電影一開始就講rapper睇曬本康熙字典，顯示佢地對詞彙嘅研究，亦都要諗點樣押韻腳，句子點樣表達得簡潔有力。原來rap都係一種保存、保育廣東話嘅方式呢。

有緣再傾。保重。

如你願意寫信支持手足 (和你自己)，可參考以下平台：

《燕子生命》的在囚手足網上筆友系統：