Batapas Kain Kafan

Kisah Palui Batapas Kain Kafan

LAGI bahari Palui tinggal di kampung Loklua, kuta dudul, parak wan batang banyu rumah, jadi sagala kaparluan mandi cuci kakus (MCK) samuaan di batang.

”Kaiku Bus ai, lagi dahulu nitu manapas kain kafan di batang, inya napa nah?” takun Palui.

“Kada tahu aku Lui ai?” sahut Garbus.

“Tuan gurukah Lui kai ikam?” takun Tulamak.

“Kaiku bahari saminggu sabalum maninggal, sidin batapas kain kafan, kemudian babarasih halaman rumah, babarasih di dalam rumah, di kamar sidin saurang, diluar kabiasaan pang nitu?” lanjut Palui.

“Sidin nitu apa Lui?” takun lagi Tulamak.

“Sudah nitu sidin maninggal dunia buhannya ai?” Palui pina sadih mangganang aruah kainya.

“Tuan guru kalu kai ikam?” anyak Tulamak.

“Aku kada wani mamadahakan sidin tuan guru, karana biasa-biasa haja, salat bajamaah di langgar kada tatinggal waktu, berbuat baik kapada kuitan sidin, urang lain, anak cucu, rajin manuntut ilmu, nitu kasaharian sidin,” jalas Palui.

“Tapi aku ada mandangar Lui ai, lain kai ikam pang, sidin nitu tuan guru, tahu malaikat pancabut nyawa handak datang ka rumah, dibuka akan lawang, sudah nitu sidin minta waktu mangarjakan salat sunat dua rakaat, hanyar ambil nyawaku jar sidin. Habis nitu hanyar sidin maninggal dunia,” Garbus jua ada baisi kesah.

Sabuting lagi ada kesahku, sambung Garbus, ada tuang guru di Kandangan ne jua, sidin kadatangan tamu, nang mambari duit dua kabat, imbah tamunya bulikan, duit nitu dibanam sidin, karana hawas, bahwa duit pambariannya hasil kada halal, alias haram, aku mamburinjing bulu awak.

“Nitu ngarannya kasyaf Bus ai?” jawab Tulamak.

“Kalau kita ne apa Mak? Kakasyafan, iyakah…, Palui lihum saurangan. Artinya banyak luputnya pada kananya, isuk siapa nang bailang ka rumah kita, si fulan bin si fulan ujar kita dalam hati, sakalinya kadada saikung-ikung nang datang, nitu artinya kakasyafan haja, Palui bisa manambahi.

“Jangan ha kaya kita batalu ne handak jadi imam salat mun ilmu agama kada banyak lagi?” timpal Garbus.

“Bujur Bus ai, kada sanggup saku, aku jadi imam, kena bakaram urang jadi makmum, tahu aku jadi imamnya, maklum aku bahanu katuju malihat urang badumlah,” Palui maakui saurang.

“Jangan ha jadi imam di masjid mun kalakuan masih katuju basilawar handap ka luar rumah?” sindir Tulamak.

“Bujur Mak ai?” ucap Garbus, lihum Palui.

“Han jarku buhannyalah, kalau handak jadi imam di masjid, hibak-hibak dahulu ilmu agama, hanyar siap jadi imam, biar tuha mun bacaan kada fasih, kada usah, biar inya anum, kalau inya nitu qari, ayuha silahkan haja jadi imam ya?” Palui gagarunum.