Ahli Katik

BIAR hidup di kampung, Palui wan kakawalannya handak jua tahu parkambangan kuta. Makanya tiap baisukan, mun kadada gawian, bubuhannya tulakan ka kantur kapala desa umpat mambaca kuran. Imbah mambaca barita, bubuhannya tuhuk maitihi iklan tamasuk iklan luwungan bagawi.

Karna nang dicari adalah urang-urang nang baisian kaahlian, Palui wan kakawannya hanya kawa mamandirakannya.

“Meski bangaran profesional, kaahliannya tatap tarbatas,” ujar Garbus.

“Bujur haja tabatas tapi sudah ahli banar,” sahut Tulamak.

“Kalu kaya itu kaya apa pandapat ikam badua, apakah baik ahli tapi tabatas kabiasaan atawa bisa saraba sadikit tapi banyak nang bisa digawinya,” ujar Palui manyurung pander.

“Parlu dipikir wan dijawab Mak ai susurungan Palui itu, kaduduanya pasti ada untung ruginya,” ujar Tulamak.

“Manurut pandapatku baik bujur-bujur ahli, walaupun nang dikuasainya hanya samacam haja. Cuntuhnya, ahli tanaman husus rumbia. Puhun rumbia itu adalah tanaman serba guna. Batang, sagu, palapah wan daunnya samunyaan tapakai. Bila kaahliannya tanaman rumbia maka kada mungkin inya manguasai tanaman puhun gatah,” ujar Tulamak bapander panjang lebar.

“Nah, hebat si Tulamak ahli rumbia. Inya tahu banar rumbia karna saban baisukan bahira di jamban di higa puhun rumbia,” ujar Palui.

“Ikam pang Lui mana nang baik apakah ahli banar tapi sabuting haja atawa saraba sadikit tapi banyak nang bisa digawi,” ujar Garbus manakuni Palui.

“Pangalamanku, justru gawian itu kada parlu ahli banar tapi saraba bisa biarpun cuma sadikit-sadikit,” ujar Palui.

“Napa cuntuhnya Lui?” ujar Tulamak karna bida pandapat wan inya.

“Samalam ikam malamar gawian tukang kalu. Urang mancari ahli masin lalu ikam umpat tes. Ikam kada ditarima karna kada bisa mambaiki masin listrik kalu. Bujur haja ikam bapangalaman maurusi masin tapi masin jahit karna mamarina ikam tukang jahit wan ikam umpat mangganii sidin mamasang kima baju wan maobras,” ujar Palui manumpalak.

“Palui sama haja jua, bapadah saraba bisa. Bulan tadi Palui malamar gawian juru ketik di kantur kabupaten. Inya bapadah ahli mangetik. Tapi nyatanya imbah dites akhirnya takipai jua kada ditarima,” ujar Garbus malawanakan.

“Napa sababnya kada ditarima Bus?” ujar Tulamak.

“Eee….sakalinya kaahlian Palui kada juru ketik tapi tukang katik karna hari-hari gawiannya mangatik burung di pahumaan,” ujar Garbus mamacah rahasia kaahlian Palui. (emhati/ful)