明史爆谷（1）——福王呢個敗家死肥仔

崇禎十四年（1641年），”浙江大旱，飛蝗蔽天，食草根幾盡，人飢且疫”；二月，時山東荒旱，寇盜益熾，徐德數千里白骨縱橫，父子相食，人跡斷絕。 （彭貽孫《平寇志》）

我地今集主角福王其實同晉惠帝一樣係一個何不食肉靡嘅二世祖，但同晉惠帝唔同嘅係佢親手將大明斷送，最後佢仲比李自成食埋，點解話佢斷送江山呢，咁就要由佢老竇開始講起啦，佢老竇係大名鼎鼎嘅萬曆皇帝，歷史學家黃仁宇就覺得1587年明朝就已經注定滅亡，但其實呢個世界真係有嘢係注定？應該係話所有人都有責任，包括呢個二世祖⋯⋯

雖然成個明朝王室都係廢人集團，點解佢地係廢人集團呢，呢個係後話，而呢個福王係一個被縱壞嘅人，佢個人本身無乜嘢，只係好食懶飛，有成三百六十磅，加上慈父多敗兒，當時萬曆實在太愛鄭貴妃，真正嘅萬千寵愛在一身，應該係真愛，愛到可以為立福做太子，十幾廿年唔上朝，後世就話佢懶，但其實佢根本就係粱山伯再世，愛屋及鳥先想立佢為太子，結果，萬曆即使係皇帝都敵不過制度，雖然期間佢為咗 朱常洵，已經炒咗四個首輔（申時行、王錫爵、王家屏、趙志皋），最後萬曆都係屈服咗，但神宗仍然用盡一切方法去補償福頭， 萬曆縱個仔縱到咩程度，根據 《萬曆會計錄》記載萬曆三十年（1602）政府全年收入四百七十萬兩，支出四百五十萬兩，盈餘二十萬兩，但呢舊錢都唔夠福王擺一次酒，一場婚禮就已經洗咗三十萬兩，幫福頭起個王府又洗廿八萬兩⋯⋯

到1614年福王去到洛陽之後，佢得到莊田一萬九千頃，而所得稅收，完全由佢王府自己決定點用，由呢幾個例子大家可以想像到呢個人嘅前半世到底有幾幸福，但佢屬地嘅百姓就真係苦過弟弟，所以，明史．福王傳有呢一段記載「崇禎時，常洵日閉閣飲醇酒，所好惟婦女倡樂。秦中流賊起，河南大旱蝗，人相食，民間藉藉，謂先帝耗天下以肥王，洛陽富於大內。」

但佢一生嘅大運，行到一六四一年就正式行完啦，當各地都戰火連天，百姓人食人嘅時候，佢仍然大魚大肉，最後，因為佢輕敵導致佢比李自成處決⋯⋯

其實當時佢有機會可以贏呢場仗，曾經做過南京南京兵部尚書嘅呂維祺就曾經提過福頭，拎錢出黎保住洛陽，但係佢無認真看待過，因為佢唔捨得洗錢，洛陽長期喺 “朱門酒肉臭，路有凍死骨”嘅社會環境底下，又點會有人想幫佢賣命，當佢以為可以收埋D私己錢過埋下半世嘅時候，福王府喺李自成抄府之後，就只係得返一個死剩種，朱由崧，即係後來嘅明安宗，而據說，如果當年洛陽守得住，根本就唔會有之後嘅大順政權，因為明朝未年連年大旱，原本李自成根本就無足夠嘅糧草，但福王府嘅錢同糧食就成為「闖王」嘅及時雨，所以如果真係要怪神宗，不如怪福王太智障，畢竟，縱仔縱女係人都會，唔通咁都有錯？如果真係錯，你就只能夠怪朱常洵呢個福頭，隔離無一隻叮噹幫佢執手尾⋯⋯最後將成個大明江山敗哂。