致豪華：天機 斷片 奇遇記

昔日經常到豪華睇劉華，當中嘅戲梗係唔少得籌備經年曠古爍今要食住爆谷睇嘅絕世大奇片...「天 機：富 春 山 居 圖 」「天 機：富 春 山 居 圖 」「天 機：富 春 山 居 圖 」，重要嘅要講三次，仲要較高聲量調慢音速。

話說當天早上特登齋戒，到豪華參悟這部點參都參唔透嘅奇疤絕片，當睇到片尾劉華大戰佟大為一段唔知邊個打邊個嘅決鬥，條片突然冇晒聲，起初以為套戲咁鬼馬要估你唔到玩吓花臣，但再隔半分鐘片都冇埋。噢！斷片。

一般嚟講，觀眾都會開始出聲甚至鼓燥，特別係豪華有唔少貌似燥底的大叔或煲煙陀地觀眾，奇怪嘅係全場一粒聲都冇。隔咗五分鐘，院方有職員來「耍冧」，並帶大家到票房作進一步處理。來到票房，大家依然一粒聲都冇，但在燈光充足的情況下看見大家的表情皆崩緊。這時候，戲院職員再次向大家致歉，並且每人派一張豪華戲院贈卷。這個時候大家仍然一粒聲都冇，面容依然崩緊，突然有人劃破沉默問職員一個重點，張贈卷係咪一定要睇番呢套天機？職員斬釘截鐵說「唔洗」！這時再看大家的反應和神情，有些不經意流露放下心頭大石的笑容，有些眼神曖昧，有些如我，掩著咀偷笑！

當我離開豪華，忍唔住回頭望望戲院上的電影壁幕，戲院抵死地將《天機》和《盲探》兩部戲放在一起。奧妙嘅係《盲探》海報中莊士頓的動作原來已暗藏玄機，豪華戲院果真鬼馬，而且用心良苦。

念豪華（1991年 - 2019年11月29日）
香港最後一間大戲院