加密貨幣走資賺息BB班
1. 大圍吹水篇
2. 銀包及找換店篇
3. 兌換加密貨幣篇
4. 穩定幣及找換店篇
5. 保守型存款生息篇（上）
6. 保守型存款生息篇（下）
7. 埋尾畢業篇

兌換加密貨幣篇

點樣用港幣買加密貨幣

大家已經有銀包及找換店戶口，之後就會講吓買幣嘅流程，以及點樣睇吓自己個銀包。無論係香港本土定係外國嘅找換店，買幣流程一般都不外乎三步曲：

1. 存錢入找換店（經信用咭或銀行過數）
2. 買加密貨幣
3. 將加密貨幣轉去自己銀包

亦有啲找換店可以直接用信用咭買，skip咗第一步，但要留意係計美金定計港幣。如果計美金，好多信用咭都要收手續費；如果計港幣，唔少信用咭可以免海外網站手續費，又或者用現金回贈抵銷返，但亦有啲係要收手續費，最好睇清楚銀行嘅收費條款或打去問吓。

以 MyEthShop 為例，呢三步就係：

1. 入港幣：MYETHSHOP港幣轉入詳細說明
2. 買加密貨幣：MYETHSHOP限價盤交易詳細說明（可以市限或限價）
3. 過落自己銀包：MYETHSHOP加密貨幣轉出詳細說明

作為學習嘗試，你可以買入少量ETH，因為將來一定會有用。 點解？下面就會解釋。

作為記帳手續費嘅ETH

第一、二堂講過，區塊鏈（Blockchain）係一本網絡數簿，由網絡上嘅無數使用者一齊去記錄及監察。有無諗過點解有人咁傻去做呢樣嘢？佢哋一啲都唔傻，因為佢哋就係啲人成日講嘅「礦工」（Miners）。當你要進行提款/存款/過數，要係呢啲網絡數簿上mark數，礦工就會幫你去核實條數，換黎嘅係佢會收到手續費（以及區塊鏈機制嘅獎勵）。手續費邊個俾？唔洗左望右望喇，就係你呀！

或者你會話，「吓乜用加密貨幣要俾手續費㗎？」係㗎，no free lunch嘛。其實你諗真啲，透過加密貨幣你可以即時俾錢世界上任何地方嘅人，可以投資係世界任何地方嘅DeFi projects，如果用傳統銀行，入場門檻又高、手續費又唔清𥇦，只會更加麻煩以及唔化算。

對於現時DeFi大部份嘅流行加密貨幣而言，俾手續費所用嘅貨幣就係ETH，因為呢啲流行加密貨幣都係建基於Etherum以太坊之上。以太坊係繼 BitCoin 之後嘅第二大加密貨幣，詳細嘅歷史我就唔講啦，Google大神幫到大家。簡而言之，佢嘅特點係區塊鏈上可以運行智能合約（Smart Contract），令其他人可以喺ETH之上再創造出其他加密貨幣，再創造出 Defi 嘅無限可能。總之將來你要喺加密貨幣上做投資、俾錢或任何交易，都要需要ETH，所以買定少少係無衰嘅。

用 wallet app 睇自己嘅銀包

若然大家已經買入少少ETH，咁當然想實際睇吓自己個銀包。MyEthShop固然有「銀包」介面，但係功能有限。例如當有人過數俾你，如果用 wallet app 就會彈出黎提醒你。而之後幾堂要做 DeFi 存款，亦需要用到 wallet app，所以係時候裝一個黎試吓。

揀 wallet app 要好小心，因為個 app 會讀你嘅十二個字 seed phrase，會知道你嘅 private key，所以一定要揀信得過嘅 app。作為入門，我推薦試吓 MetaMask。

下載 MetaMask： https://metamask.io/download.html

視乎你係用 PC、iOS 定係 Android，裝相應嘅 MetaMask 程式。然後，揀 Sync or Import Wallet （以Android為例），入返你嘅十二個字 seed phrase，就可以用 MetaMask 黎睇以及控制你嘅加密銀包啦！

嚟到呢步，我哋初步體驗到加密貨幣離地户口，將自己喺傳統銀行户嘅嘅港幣轉換成加密銀包入面嘅ETH加密貨幣。呢啲加密銀包入面嘅資產，無任何一個人或者政府可以凍結你或充公你，只有你先有能力控制入面嘅資產，因為你擁有呢個銀包嘅 private key！

下回再同大家介紹吓穩定幣，以及認識多幾個買賣加密貨幣嘅途徑。我哋又睇吓BB班嘅進度先：

1 準備功夫
1.1 咩嘢係key同address ✅
1.2 開找換店account ✅
1.3 開加密銀包 ✅
2 由港幣換加密貨幣
2.1 認識買幣流程 ✅
2.2 ETH以及數簿記帳 ✅
2.3 用 wallet app 查閱銀包 ✅
2.4 介紹幾種加密貨幣
2.5 介紹找換店/交易所
3 存款生息
3.1 認識 DApp
3.2 介紹幾種基礎存款生息渠道
3.3 嘗試用 DApp browser 存款
3.4 介紹幾種進階存款生息渠道
4 BB班畢業禮
4.1 檢視資產安全措施
4.2 認識硬件加密銀包
4.3 認識其他投資渠道
4.4 其他加密貨幣資訊拾遺

免責聲明：

此網頁所載僅為一般個人意見，並非專業投資建議，供讀者自行斟酌參考。任何投資均帶有風險，請詳細考慮閣下之財政狀況及願意承受之風險，以釐定合理資產分配及投資目標。作出投資決定之前，請確保自己清楚了解該產品之特質及風險，有需要時請諮詢專業意見。

原文刊於網誌： https://hkxforce.net/wordpress/7680