北角演義（結局篇）II

馬遇空亡 終身奔走

作為打工仔，喺辦公室最開心嘅事，莫過於升職加人工。

升職都有好幾種，有啲「升職」係真升職，title 大咗人工高咗。有啲「升職」人工職位冇變，但係「孭飛」重咗，實際地位高咗；譬如話，公司最大個客由你去負責。有啲「升職」就係「明升實燉」，將你由一個有權有勢嘅位置「踢上層樓」，「升」你去一個冇權冇勢得個名嘅「神檯位置」（喺美國，通常呢啲位置叫 SVP/Senior Vice President）。

真升職固然開心，位冇變但孭飛重咗都唔係壞事，即係公司重用你，真升職指日可待。就算俾人踢上層樓都唔好咁灰，一來你個 title 真係好惡、嚇得吓鬼，二來神檯位景觀開揚，三來就算日後公司要踢你走，你都一定會有個「肥雞餐」，以示「好嚟好去」。

但係，職場上有啲「升遷」，表面上係重用你，實質上暗藏刀片；一個唔留神，可能會遍體鱗傷……

星期五中午，數碼港艾美酒店南坊中菜廳。

斟茶認錯嘅日子……

Richard 幾日前喺 email 撲出嚟認矮仔、承諾要同人「坐低飲杯茶食個飽慢慢傾」。所以，今日我哋就擺「和頭酒」，請咗 Sycorax、Regan 同埋佢哋嘅 director Matteo。至於我哋，除咗上次開會嘅三人組，當然仲有我哋「認錯最強」嘅老細啦。

坐低點咗菜之後，Sycorax 就率先開聲講嘢：「其實呢次都係小誤會啫，希望大家唔好放喺心度，日後繼續多多合作。」

小誤會？小誤會你使唔撚使喺個 email 度插得咁應咁大力呀？

「係啦，其實好少事啫！」Richard 慌死狗錯失良機咁，接住落。「可能我哋啲同事呢排實在太忙，先會唔小心犯上呢啲錯誤。既然 Sycorax 都明白，咁就最好啦！希望日後我哋可以幫到你手。」

佢仍然一口咬定係我哋嘅錯……我屌你老母死太監！

點解我咁好火？我份人係唔受得冤屈嘅，完全唔俾人屈得，就算係女朋友嗰啲「我唔理呀，總之係你唔啱」我都唔忍得，一定要講清講楚。對住呢兩個「指鹿為馬二人組」，我真係一萬個想擺低句「我屌你老母！」然後拍檯走。

但係唔得。就算我唔理後果、唔要份工，我都唔可以就咁拍檯走。人哋已經唔尊重我，我仲要唔尊重自己、喺大庭廣眾同你抓爛塊面？！我先唔會為咗你兩個閪人、搞到自己咁狼狽咁折墯囉！

「其實，我哋今年所欠缺嘅，只不過係兩三個 top stories；」Sycorax 接住 Richard 繼續講；家陣你兩個棟篤笑雙打呀？咁有默契出去打個車輪先返入嚟吖笨。「對我嚟講，份 white paper 先係最緊要嘅嘢，因為我仲想用嚟出 flyer 同埋做 case study。 至於《Linuxdriver》果邊，如果真係咁難搞的話，咁我哋都無謂勉強，反正香港電腦刊物多的是，我哋可以 explore 吓其他嘅 opportunity。」

哦。擺完我上檯、孭撚晒鑊、俾你生中出完，而家你就「如果真係咁難搞的話，咁我哋都無謂勉強」。咁即係擺明同我過唔去，過咗我一幢之後就打退堂鼓啦！我屌你老母個鴛鴦臭爛化西！

「難得 Sycorax 咁為我哋著想，」Richard 比我想像中更噁心，我好似睇緊套李華月打真軍嘅三仔咁。「但係我覺得，我哋可以再試探一吓《Linuxdriver》嗰邊嘅水溫，先至下決定都 no harm 吖！」

人地俾位你閃你唔閃，堅持要玩 mission impossible。梗係啦，又唔使你去問，我問之嘛，俾人串俾人屌嗰個係我唔係你，梗係 no harm 啦仆你個街。功就你領、錢就你袋、harm 就 harm 我吖嘛！

「好！一言為定！」Sycorax 打圓場。「嚟啦，大家起筷啦！」

起筷？我俾你哋兩個啲假惺惺整到我出世第一餐奶都嘔返晒出嚟啦！仲邊使食喎！

我實在再忍受唔到，呢間公司嘅「契弟文化」喇。

飯後，Richard 同 Ophelia 要去開另外一個會，我同 Eric 搭的士返公司。

「係咁㗎喇；」Eric 同我講，唔知算唔算開解我。「呢個世界有啲人，以為喱埋喺部電腦後面就冇人睇得到佢，email IM 講乜都唔使負責任，噴得就噴。出到嚟二口六面，佢哋就戴返副假面具扮紳士淑女。吹佢唔漲㗎！」

我只係覺得，就算公關真係一個以服務客人為本嘅行業，我哋係咪一定要好似 Richard 咁，一味打恭作揖；對住客人，就只靠阿諛奉承嚟為生呢？點解公關唔可以以專業嘅一面嚟協助客人解決問題呢？

星期一。

唔知點解，近期越嚟越唔想返工。

我知，打工仔有邊個想返工㗎？但係你亦要知道，打工仔個個都「口裏說不，身體卻很誠實」。個個死剩把口就話唔想返工，你試吓有啲咩打風落雨山泥傾瀉，咪又係個個自備開山刀、逢山開路遇水架橋咁死出去返工。香港人，最愛返工㗎嘛！

但係我呢期真心唔想返工。唔係厭倦，係疲倦。我已經再冇氣力喺呢個扭曲嘅空間裏面、繼續迎送生涯。

之所以我仲未遞信走人，純粹係因為兩樣嘢：第一，當日佢哋 buy-out 我嗰陣，條件係我必須做滿一年；第二，就係我女朋友仲喺度捱緊，我唔想掉低佢。

但係如果日子繼續咁落去，上述理由都唔會 keep 到我好耐。

大約十一點幾，Richard 召我入去佢房傾偈。我確定冇新鑊爆之後，就入咗去搵佢。

「Alan，我決定咗，由你接任 S 記 Corp Comm 嘅 account lead。」Richard 公佈呢個消息。

我同你呢期炒到啪啪聲，我又連孭咗兩隻鑊，無啦啦你會俾我睇個咁重要嘅 account？

「你意思係，俾我睇晒 corporate citizenship、academic、legal compliance、platform strategy 呢四個 cat？」我問佢。

「係，總之 product team 以外全部你睇晒。」佢微笑答我。

呢次輪到我大腦 hang 機。

呢段時間以來，我一直同 Richard 處於一個戰爭狀態。我每日都準備咗好多 case scenario，以防萬一佢搵起邊瓣嚟玩嘢，我就用邊瓣還擊。雖然我好討厭辦公室政治，但係作為曾經喺政圈搵食嘅人，其實我都有唔少自保嘅玩嘢嘅手段。但係我從來冇諗過，佢會無啦啦對我委以重任。

「你入咗嚟我哋公司半年，整體嚟講，你都係個做得嘢嘅人；」Richard 見我冇答佢，於是繼續講落去。「我希望之前嗰啲不快嘅旁騖，唔好影響我哋嘅合作關係。同時亦希望你會好好哋做落去。」

「咁我究竟要負責做啲乜？」我問佢。

「執行上嘅嘢，Ophelia一陣會同你傾；」Richard 放低手上面嘅 file。「其實你一直都處理緊呢幾個 cat 嘅嘢，應該好快就上手。Cordelia 走咗，我哋一時間仲未搵到人頂替佢個位置，所以你嘅工作量可能會大啲；希望你處理得嚟。」

當我同佢傾完出返去嗰陣，Eric 同 Philip 已經走埋嚟恭喜我。我埋位一睇，原來 Richard 已經出咗 email 公佈呢個「喜訊」；所有同事都 reply all，恭喜我做咗「揸 fit 人」。

但係我隱約覺得，事情冇咁簡單……

兩個星期後。

天將降大任於斯人也，必先苦其心志，勞其筋骨，餓其體膚，空乏其身……

我唔知將降嘅「大任」係乜，抑或個「pre 大任 warm up」本身，就已經足夠做到仆街。呢兩個星期，我做得仲金過做地盤。

S 記 corp comm 呢四個 cat，有兩個係唔使點做嘅（淨係俾人屌就得），但係其餘嗰兩個 cat 嘅工作量，就佔咗 S 記喺我哋公司嘅七成比重。之前未有 account lead，我同 Cordelia 喺 Ophie 治下，一人睇一個 cat，多嘢做嗰陣就 crossover，你幫吓我、我幫吓你；再加上 Philip 同 Eric 嘅幫手，雖然工作量大，但係勉強都頂得住。

但係兩個星期前，Richard「升」咗我做 corp comm 嘅 account lead 之後，成件事就唔同晒。佢好巧妙咁，將兩個細 cat（platform strategy 同 legal）重新分配咗俾 Philip 同 Eric，美其名係「分工合作」，實際上 S 記最大嘅兩個 cat，就落咗喺我一個人身上。

Corporate Citizenship 主要係做 NGO 有關嘅嘢，例如社區中心嘅 IT 支援、協助再培訓人士學習電腦應用嘅教學。而 Academic Program 就主要係學校電腦化嘅應用，同埋高科技教室。由於呢兩瓣都係香港近年政府主打嘅項目之一，所以有好多傳媒會有興趣 cover，top stories 嘅數量亦多，佔咗整個 S 記 account 嘅七成以上。

作為 account lead，我要負責晒所有傳媒採訪嘅每一步，由 pitching 開始、到採訪現場嘅 sit-in、post interview report 等等。S 記嘅合約訂明，只准 consultant 職級以上嘅 PR sit interview；所以，上述每一隻 interview 我都要參與。連埋訪問 demo 拍攝所有嘢，基本上半日冇走雞。

呢堆學校，有喺數碼港嘅、有喺大埔近教院嗰邊嘅、有喺粉嶺上水嘅、有喺荃灣嘅、亦都有喺中九龍嘅，總之港九新界都有，就係冇一間就腳；我呢期啲的士錢 load 到爆晒廠。

再加上做咗 account lead 之後，Ophelia 將佢手頭上嘅 PR plan、event plan 之類嘅嘢，下放晒俾我去做。每一日返到公司，我連原本嘅 check email 睇報紙時間都冇埋，要喺出去港九新界各間「S 記智能學校」sit interview 之前，趕起啲重要嘅 paperworks；然後去「充軍」。

我有諗過，呢啲係 Richard 想做我嘅手段。到時出咗事，無論係客人要求換人又好、佢自己換走我補鑊都好，要兜我出門口，已經唔成問題。莫講話搵律師，就算我老豆係律政司司長都攬我唔到；嚴重失職絕對係可以連代通知金都慳返嘅炒人理由。

但回心一諗，喺香港地要炒一個員工，使唔使耍咁多手段呢？佢咁玩法，唔單止係公司內部行政，甚至已經牽涉到客人嗰一方。玩辦公室政治玩到咁大，呢一著實在太險；我唔係好相信佢會落咁大嘅賭注。

我睇唔通佢玩緊乜。

但係有啲嘢，唔使睇得通，都會知個故事發展係點。見到棺材，你唔須要知道佢嘅構造同木質，你都知道會死人。

十一月廿一日，我生日。

熟悉我嘅讀者文友都知，我係一個中正「生日咒」嘅人。每逢生日，總會有啲嘢令我冇辦法好好哋過我嘅生日；莫講話慶祝咁奢侈嘅嘢，我咁多年嚟，連食件生日蛋糕嘅次數都寥寥可數。所以，今日亦都唔會例外。

我今日嘅外勤工作，基本上由四點鐘開始。我先要去教院 sit 一個 interview，然後湊個客去 dinner presentation。搞掂之後，仲要湊另外兩個 S 記嘅 Voice of Opinion Leader 去港台，上劉天賜個節目。呢一切完成後，已經係凌晨兩點；Winnie 想同我食餐生日飯都唔得。

不過，公司今日有個大圍嘅「生日會」俾所有十一月生日嘅同事；都好，起碼有件餅食吓。

下晝兩點五十分；距離生日會舉行仲有十分鐘。

「Alan，」Ophelia 擺咗份文件喺我檯面。「Regan 喺沙田開會，需要呢份 media plan，你去開嗰頭，早啲出去拎埋俾佢吖。」

「沙田大埔唔同路喎……」我好想攞起支筆、插盲佢對鬼祟眼。

「都係嗰頭啫，車行又唔係你行。」佢答我。「快啲出去啦！」你遲早夠要死咯，都係嗰頭啫，又唔見你今日死。

就係咁，我喺有生日餅食之前五分鐘，俾人趕咗出街食西北風。

神愛世人，不過就係唔撚愛我咁解啫，冇嘢嘅。

凌晨兩點，廣播道。

終於完成晒今日嘅 task。送咗兩個 VoOL 上的士之後，我先醒起，原來我今日除咗 lunch 之外，基本上冇食過嘢。生日晚上嘅凌晨，等住我嘅就只有八份我仲未有時間處理嘅 interview recap 同埋一堆 paperworks。

最後兩架的士都走埋，我行返出港台門口，諗住截車返屋企。但係出到去大閘嗰陣，我見到我個妹架車。

「做乜咁好嚟接我呀？」上咗車之後，我問佢。

「哥，生日快樂！」佢攞咗個二人份嘅小蛋糕出嚟，上面插咗一支蠟燭。兩兄妹就係咁，喺港台門外分咗個蛋糕食。

我同我個妹關係一直都有啲疏離，始終，我哋都分隔兩地生活咗好多年，直到兩年之前先再一齊住。估唔到，最了解我、知我需要乜嘅，仍然係佢。

（待續）

本故事人物及情節如有雷同，實屬巧合。