北角演義（三十二）

當有新同事返工嘅時候，大家會點對待呢位「新人」呢？

同事們點對待新同事，好多時都牽涉到嗰間公司嘅「文化」。有啲公司，好願意去協助新入職嘅員工去融入，等佢快啲進入狀態做嘢。有啲公司呢，就話之你死，入咗嚟就入咗嚟，點融入點適應係新員工自己嘅事，冇人會幫你「破冰」。

我呢份工同對上嗰份工就係後者。唔好睇Rachel好似同我好好感情，當初我入職嗰陣，佢黑口黑面對足我一個月，先開始有返啲笑容。不過後來我知道，佢嘅「黑面」其實係佢嘅default position。

之但係，如果公司文化再加上辦公室政治嘅化學作用，撈埋一齊嚟做賴尿牛丸呢，咁成件事就唔同晒喇。

簡單而言，就係新入職呢個，係「自己人」定係「人哋嘅人」，你一定要清楚 — 唔一定要攬頭攬頸或者惡言相向，但你一定要搞清楚，究竟呢位新同事，係邊個嘅人。

星期三早上，細會議室。

Richard、Yvonne同我開緊會。嚴格上嚟講，唔係咩開會；其實係佢召見我哋，講解聽日上工嘅新senior consultant嘅安排，但係就唔係一次過講，而係逐個召見逐個講。

Richard好鍾意玩呢啲咁屎忽鬼嘅嘢，要我哋每個人都聽唔同嘅說話，每個人都有啲秘密要保守；我哋嘅薪酬福利就係其一。喺入職嗰陣，佢同我講明，唔可以向其他同事透露自己嘅remuneration package；如果俾佢知道的話，就會即時解僱。後來，我喺其他同事口中，都聽見類似呢啲咁嘅「秘密」。

而家又係咁，人哋聽日都返工，你今日仲玩咩神秘、要個別接見我哋去講呢單嘢呢？

口蜜腹劍、攻心計、鍾意搞小動作玩分化；好明顯我已經上錯賊船。如果我早知佢係個咁嘅人的話，我根本就唔會轉過嚟呢邊做。

「新同事Cordelia係個好有經驗嘅PR；」Richard同我講解緊佢嘅人事變動計劃。「佢之前喺Daehwa做過、跟過Gruoch，亦都喺體院做過，呢啲都係好unique嘅經驗……」

由惡家婆轉返出嚟做慘家嫂？佢真係咁生無可戀咩？

「由於Cordelia嘅要求，我哋唔會放返去落去Daehwa account；」Richard繼續。梗係啦， 食過屎又點會想再食多次。「所以，佢會同你一齊睇S記嘅education同corporate citizenship programs。」

「咁我同佢，邊個係corp comm account lead？」我問Richard。

坦白講，我唔介意一人睇一瓣，甚至全部俾佢睇晒；但我一定要知邊個係揸fit人。

「我冇諗住邊個係account lead住；」Richard笑一笑，但個笑容有啲陰險。「反正S記個account都係Ophilia負責，你同Cordelia兩個都算新人，一齊合作做好佢咪幾好。」

大家睇到未？呢一點就係Richard最令我反感嘅一點：佢係唔係都要你哋去競爭、令到你哋有心病、咁就易於管理；如果冇situation令你哋去競爭，佢甚至唔介意去製造一個situation俾你。呢啲咁嘅低層次power play手段，我做intern嗰陣就已經有得出賣。

我甚至覺得，Renee同Yvonne多年嘅鬥爭，其實都係佢有意無意之間由佢哋繼續玩落去，以便互相制衡。否則，以佢嘅絕對權力，只要做少少嘢就可以平息嘅權鬥，點解會延續咁多年？

「Richard，大家都識咗咁多年，有咩唔怕攤開講；」我望住佢。「如果你對我有咩不滿，可以攞出嚟拆掂佢。如果拆唔掂的話，我都係一個知情識趣嘅人，唔會阻住你發達；真係冇必要玩啲咁嘢。」

「點解你會咁諗呢？」佢有少少詫異，但係好快就回復正常，講完之後微笑望住我；坦白講，佢嘅城府可能比我想像中深。

「我唔介意俾佢做account lead，但我希望我哋兩個之中，有一個負責人，而唔係兩個分唔出莊閒。」我答佢。

「我唔同意，」Richard答返我，面上仍然掛住一個有啲陰濕嘅笑容。「我希望睇完你哋嘅表現先決定。」

「不過你放心，」佢補多句。「我咁做並唔係針對你。」

係唔係針對我到時先知；不過，我唔會就咁如你所願、喺你面前上演一場大廝殺，等你漁人得利。

星期四，Cordelia正式上工。

我應該點形容眼前嘅Cordelia呢？年紀應該比我大幾年，身高同身形同Winnie差唔多，都係偏細粒同瘦，戴住副膠眼鏡；同公關呢個身份最唔匹配嘅，係佢有一份唔屬於呢行嘅親和力，就好似……一個媽媽咁。

琴日Richard同Yvonne brief我嗰陣都透露過，Cordelia係一個有家庭有細路嘅公關。

問題係，媽媽唔應該喺一間公關公司度出現，公關就算有親和力，都應該係一種比較假同表面嘅親和力；我只係暗暗希望，佢嘅工作表現唔似一個媽媽，否則後果堪虞……

Richard安排咗佢坐喺Renee之前嘅位置，即係我同Winnie呢組檯嘅其中一張，就喺Winnie隔籬。

之前同幾個熟嘅同事溝通過，除咗Eric嘅睇法比較負面、認為Cordelia喺Richard請嚟整頓我哋呢班管理層之外（佢睇嘢不嬲都係咁負面），其他同事都係抱住一個觀望嘅態度嚟對待Cordelia。

其實咁都好嘅，最怕嗰啲係唔係有新同事入職就「起晒弶」，將人哋當正二奶入門咁對待。講真，你咁做，即係迫人同你企喺個對立面嗰度，明明係中立嘅，都變咗對家嘅人。

十一點，大家check email都check得七七八八，於是兩個AD、我同Winnie就同埋Cordelia入咗會議室，brief一吓佢，我哋手頭上有啲咩on going嘅project同點樣分工。

短短一個鐘嘅briefing，我覺得情況比想像中好— 雖然Cordelia有個媽媽咁嘅外表，但係話頭醒尾，對於我哋brief佢嘅project，佢都有適當嘅互動，問題應問則問，同時亦唔會有太aggressive嘅表現 — 你知啦，有好多新入職嘅同事，有時真係好唔知埞，事事想搏表現、乜都上攬上身、show off一吓自己嘅能力。好彩，Cordelia唔似係啲咁嘅傻仔/婆。

午飯過後，繼續喺位度寫news letter。當我好集中咁發揮緊我腦海中嘅想像力嗰陣，一把女聲喺我背後響起：

「阿仔呀，你而家得唔得閒呀？」叫我嘅係Cordelia；阿仔？

「好呀，媽媽。」我唔知係掛住寫嘢定係點，好順口咁答佢。答完後，我聽到partition後面嘅Winnie「kit」一聲笑咗出嚟。

Cordelia笑一笑，然後拉咗Philip張櫈（佢出咗去做嘢）坐咗喺我隔籬。

「阿仔呀，我啱啱睇緊S記今個年度嘅year plan，」Cordelia拎咗份文件出嚟，然後壓低把聲繼續講。「佢哋啲project啲代碼好似賣機票啲航空公司code咁，我唔係好明呀，你可唔可以解釋吓俾我聽呀？」

「你知啦，」佢繼續。「師奶仔記性唔好呀！咁多唔『啦更』嘅密碼，點記呀？！都唔知點解呢啲IT公司，係都要諗埋晒啲咁繑口嘅project name……」

佢好古惑咁笑咗一笑，我回以一笑，然後開始解釋嗰堆Da Vinci Code……

我不得不佩服呢個女人嘅親和力；只不過短短半晝，佢已經成功咁解除我嘅「武裝」，令我對佢嘅戒心減低。

都好嘅，起碼我最擔心嘅「Gladiator」場面，睇嚟應該唔會發生住。畢竟，應付一條戰線已經夠手忙腳亂，我同當年嘅俾斯麥一樣，實在非常唔想喺呢啲咁嘅時候兩面作戰。

（待續）

本故事人物及情節如有雷同，實屬巧合。