北角演義（二十九）

甩轆公關の日常（上）

當日轉呢份工嘅其中一個「初衷」，就係希望唔會好似喺上市公司咁，有開工冇收工，成日喺大陸「渡週末」。

雖然唔使返大陸，但係根據下面嘅故事嚟睇，呢個「初衷」，其實比較似「妄想」。

呢兩篇文，又名「公關卅六小時」。

六月初嘅某星期一。

8:00am，起身。

「잘가요 ！」我依依不捨咁同張床同埋枕頭道別。

8:45am，出門口返工。

9:15am，返到公司，見到檯面已經放好咗mocha同muffin；有女朋友的孩子像個寶。

9:30am，正式開工，跳入email海 — 當然，同其他同事一樣，我仍然開住個minimize咗嘅browser，睇緊《蘋果日報》；講真，唔傾偈還唔傾偈，真係個個都咁勤力咩。

當我睇得十零個email嗰陣，又有新email：係Richard。我睇一睇個recipient list，係主管only；呢類「主管限定」嘅email通常都有啲緊要嘢，所以我即刻開嚟睇。

Richard喺email度簡單咁講咗句：「我諗我哋要好好反省吓。」然後下面就係forwarded message；係我哋剛剛離職嘅「阿妹」 Nancy嘅email。

原來Richard喺人哋離職後，send email去問佢對呢份工嘅感覺；Nancy係一個fresh grad，所以亦都毫無保留咁講出佢嘅「意見」 — 嚴格嚟講，係串到Richard一棟都冇。

Nancy喺email中，力數公司嘅不是。其中最有代表性嘅case，就係某AE喺某星期五嘅黃昏時份，俾大約三百個S記嘅news clippings Nancy，要佢全部撮晒做synopsis，星期一朝早交。

老老實實，星期五收工前俾嘢人做，叫人星期一朝早交，即係叫人weekend喺屋企做嘢。三百條synopsis唔係少嘢，分分鐘成個weekend用晒嚟做都未必做得起。最過份嘅係，由於公司將我哋嘅contact俾咗客人（仲冇得你反對），所以Regan竟然喺星期日晚直接打電話俾Nancy捽clip！

Nancy嘅email以「如果你想知，點解咁多同事都做到苦口苦面、怨聲載道，你應該去望吓塊鏡。」結尾。

如果Nancy未辭職的話，我諗我會無條件請佢食一個月晏，銀碼不限、可以打包。喺香港地，個個都抑壓自己，呢啲咁嘅嘢就算發生咗都唔敢出聲，慌死會得罪老細、冇埋份工。Nancy嘅坦白，固然係因為佢已經走咗，但亦都為我哋呢班睇錢份上唔敢出聲嘅人，出咗一口氣。

香港職場好多奴隸獸，見到呢類case只會怨個𡃁妹「唔肯做」、「而家啲後生仔真係唔捱得」、「我以前咪又係咁捱出嚟」。講呢啲嘢嘅人，因為已經上咗位、兼且俾個社會馴服到乜火都冇晒，仲以為全世界都係要靠呢啲奴隸式嘅「努力」去上位；完全唔知道呢啲咁嘅要求，其實係欺壓嘅一種。

當成個社會都係仆街嘅時候，冇人會覺得做仆街去欺壓人，其實係好仆街嘅一件事；Richard都係時候俾啲年輕人屌醒一吓。

11:00am，睇完晒今日嘅無聊email，開始真正嘅工作。之前S記嗰個高科技政策project聽日deadline，我今日先有時間去聽返之前啲電話訪問，然後做transcript，再將佢節錄。四隻訪問每隻成個鐘，今次真係唔知點死。

11:05am，transcript咗第一隻訪問嘅第一分鐘內容，發現咁唔係辦法，於是我開返S記嘅「樹表」出嚟，睇吓我手下有邊個可以幫手「默書」；然後我見到Betsy呢個名（即係之前俾Winnie剷到上天棚嘅兩女之一）。

如果喺office搵人做嘢有preference同play favourite係常態的話，Betsy正好係我最唔鍾意嘅類型。條女係土生土長嘅馬拉妹（馬華），喺美國讀咗幾年大學，但係行為上就同一個完完全全一個唔臭米氣嘅鬼妹一樣，開口埋口就「Oh my God!」、「too bad!」、「Jesus!」咁大呼小叫，少少事就發晒雞瘟咁「Oh my God! Oh my God! Oh my God!」

我都唔明，喺大馬生活咗大半世嘅華人，幾年嘅美國大學，點解會將佢完完全全咁、變成咗個「鬼妹」呢？我喺美國住咗十多年都未變鬼佬啦！

我將兩個英文訪問嘅錄音交俾佢，佢想推job又冇藉口，扁晒嘴咁接咗。我見到佢檯面仲有缸金魚𠻹！Oh my God！

1:00pm，死吓死吓咁終於捱到食晏時間。

1:20pm，終於有兩三個同事應機，話想去食飯。於是我哋挾埋因為聽日有event、同樣做到天昏地暗嘅Winnie去食晏。雖然話同Winnie拍緊拖，但係我哋好少單獨兩個食晏；你知啦，費事俾人撞見嘛。Office romance呢啲嘢，都係小心駛得萬年船。

2:10pm，午飯完畢，繼續工作。我好撚憎黃定光議員 — 人講IT你講IT，唔識你就咪撚講咁多啦！你老味一粒鐘嘅廢話，講完等於冇講。最慘嘅係，我要不斷重複咁聽住堆廢話，然後默返出嚟。

3:00pm，Brainstorming。是咁的，公司由於經常需要新嘅event idea去提供俾客戶，所以不時都會call一啲brainstorming嘅會議，同事們可以自由參與。有啲同事唔鍾意參與呢啲會議，因為覺得嘥時間。但我就幾鍾意brainstorming，一來一班人閂埋門喺會議室鳩吹，其實點都好過坐喺個超靜嘅office齋做；二來有零食供應；三來Richard同Yvonne從來都唔會參與。對於我嚟講，呢個係唔使對住佢兩個嘅「唞氣位」。

所以，通常呢啲brainstorming會，我都會捧埋部laptop入去，一邊傾一邊做自己嘢，兼食snack。

3:45pm，brainstorming完畢。當我想埋位繼續做嘢嗰陣，Ophie截住我，要我陪佢去另外一個會議室，同Regan電話會議。我呢個阿姐好冇用，成日俾Regan搶白同擺上檯。佢冇講明，不過我覺得佢叫我一齊去conf call，其實係想我幫佢兜。

就係呢啲明明唔關我事、但係又無啦啦關我事嘅嘢，浪費我每日嘅時間，連正經嘢都冇時間做。

5:00pm，一個conf call足足搞咗我個幾鐘！唔怪得之做公關一日四十八小時都唔夠。傾到最後，Regan話要recap，我心諗：「死懶西！你冇drop notes嘅咩？連自己講過乜都唔記得呀？」點知Ophie答佢：「Alan會send俾你。」我頂你個肺咩！仲嫌我唔夠忙呀！？

6:00pm，終於完成一個電話訪問嘅transcript，我發誓以後都唔會訪問民建聯啲人（你估我想㗎？客要呀）。

6:30pm，Betsy交咗一隻transcript俾我，我問佢：「另外一隻呢？」佢答我：「我要去做yoga，唔得閒幫你做喇！」我同佢講：「但你啲嘢未做晒喎！」佢再答：「冇辦法，我趕住要走。」

Oh my God！做yoga？！我真係想將你啲手手腳腳，好似yoga咁扭埋一揪囉！你仲未做完你上司俾你嘅task㗎假鬼妹！

然後佢就同Estella兩隻嘢施施然放工去做yoga。我屌你老味，你兩個AC仲撚識嘆過我兩個AD，呢啲咪就係work life balance囉！呢間嘢真係做細好過做大。

7:00pm，Johnny托咗把風扇出嚟 — 話說當年太古坊嘅office七點就會閂冷氣，Richard由於要「節省資源」嘅關係，唔肯俾OT冷氣錢，於是我哋全公司七點後就冇冷氣，要成身汗咁焗住二氧化碳繼續做嘢。

Richard當然冇問題啦，佢通常七點前就拍吓籮柚收工走人。我？我咪晚晚OT都要食Panadol嚟對抗輕微缺氧嘅頭痛囉。

8:00pm，同事們開始傳閱附近茶記嘅餐單，準備開始叫晚飯外賣。

公司有個「規矩」，同事OT到夜晚八點的話，就可以claim返晚飯錢，上限為四十蚊；同事如果OT到晚上十點的話，就可以claim返返屋企嘅的士錢，不設上限。

你哋就咁聽落去，會以為係好嘅政策；但實則上，呢個亦都係公司奴役我哋嘅「蘿蔔」 — 當你做到七點幾個陣，你會諗：「不如做多半粒鐘啦，有飯錢喎！」然後，當你食完飯、九點鐘嗰陣，就會諗：「不如做多一粒鐘，然後打的返歸啦！」

就係咁，因為呢兩項「德政」，你呢世都唔會準時收工，仲越做越夜。咁當然，如果你嘅立論係「係唔係都要做㗎啦」的話，咁有飯錢有的士錢，都總好過冇嘅。

9:00pm，食完飯，同Winnie落街「煲煙」 — 我煲煙、佢陪我。如果我哋唔係放工一齊離開公司食飯的話，呢啲就係我哋寶貴嘅「拍拖」時間。

9:15pm，繼續埋頭苦幹。

午夜12:00am，終於完成另一隻transcript。我起身去斟咖啡，公司就剩返我同Winnie嘅一team人；我就默書趕deadline，佢哋就仲搞緊聽日（即係今日，過咗十二點喇）event嘅嘢。聽聞佢哋個客好麻煩、好micro managing；乜有客唔麻煩嘅咩？

1:00am，我聽錄音聽到喺個位瞓著咗，今日已經食咗太多煙，我驚「醉煙」所以唔敢再食，於是落咗七仔買嘢飲；順便買賣俾Winnie同佢嗰team嘅同事。

3:00am，我真係頂唔順喇！最後呢隻某電訊公司嘅澳洲鬼訪問，絕對係壓斷駱駝背嘅最後一條稻草；尤其是佢嗰口非常重嘅澳洲口音英文。如果我再繼續做落去的話，我驚我攰到唔識揸車返屋企。我問Winnie走得未，佢話未，於是我自己走先；返屋企再做埋個尾。

3:30am，返到屋企，當然全屋連姑姐隻狗都瞓埋啦。

我唔敢喺床做，因為一定會瞓著，但又唔想喺書檯做，坐咗成日office真係有啲腰痛。於是，我坐喺床邊嘅地下繼續默書。

6:00am，終於完成所有transcript同埋撮好晒。我將份文件email俾Regan、cc埋俾Richard同Ophie，等佢哋睇吓個time stamp。

我大約有個半鐘休息，因為八點半要去到Daehwa嘅office開monthly meeting — 死人韓國公司連做嘢都要跟返韓國timezone，迫我哋晨早開會。

唉，我好掛住珠海嘅日子呀……

（待續）

本故事人物及情節如有雷同，實屬巧合。