2020年度F1赛季回顾

首先同大家讲句唔好意思先，因为如果你系因为标题而想用一篇文章时间回顾整季F1的话，我只可以讲我无能为力。今次主要系同大家回顾今季我个人认为值得大家回顾/深入了解的事情，因为主要系我个人认为，所以可能会有大量主见和偏见，敬请原谅。

首先就讲下车队，有三队车队我觉得值得讲下，分别系：平治、法拉利同威廉士。

先讲平治，其实当赛季过咗一半慨时候，七届车厂世界冠军基本上已经毫无悬念；不过我想讲慨唔系车厂，而系有如瑞士钟表准确的pit crew。虽然今季赛事他们并没有好似Red Bull 咁做出2秒内慨pit stop，不过一直就什少出错，大部分时间都可以做到3秒内完成。不过，正如钟表也会有无电同需要抹油慨一刻，系今季第八站，即是意大利大奖赛，如果大家仲记得，我想讲慨就系咸美顿红灯入pit。虽然我唔系想讲系车手定pit crew要负责任，但呢种可以避免慨低级错误系唔应该会发生；另外我想讲就系尾二站巴林第二场比赛，当然，Russell慨表现绝对值得啰冠军，不过只可以算天意弄人，但人为因素也少不免。正所谓：均速转后追，一定唔会衰，虽然终于可以成功系F1生挨中第一次成功取得分数同最快圈速的额外一分，但赛后平治领队Toto Wolf 都话第二次pit stop 系可有可无。我个人觉得果刻入pit，我相信主要系想避免再一次发生类似今季英国银石第一场比赛爆軚慨情况出现，始终如果真系出现爆軚情况，我谂Russell 未必有咸美顿咁有经验可以挨到返pit stop。虽然最后都系因为爆軚问题而需要再次入pit换軚，不过今季由头到尾都真系有不少车手投诉今年Pirelli 所提供慨车軚有好多大大小小唔同慨问题。总括嚟讲，作为一支世界冠军车队，而且更加是七届世界冠军，车手和战车实力绝对高人一等，但竟然可以一季犯两次不会在其他队伍出现慨低级失误，我觉得系有少少自满，要犯过错才可以知道自己才是真正的百分百完美车队。

之后讲法拉利，如果你系一个法拉利迷，我相信你今季应该系绝对失望。无他慨，由上而下到见唔到法拉利有斗心。由排位赛到正赛，大家都睇得出已经系得过且过，入到Q3已经算系奇迹。当然，战车研发系一个好大慨问题，呢个系一个现场改变唔到慨事实，但正所讲：烂船都有三斤钉，车唔掂，人慨士气也可算是一种动力，但大家今季见到最多慨应该都系法拉利pit stop 破纪录，系破最慢慨记录慨时候，我相信大家都已经心灰意冷。当就算平治换軚失误都只系用咗30秒左右慨时候，法拉利今季竟然可以多次做出多次超过35秒慨pit stop，甚至60秒慨pit stop 都屡见不鲜，而且只是换軚，没有换其他物品；另外，如果大家今季有睇，其实就已经可以见到多次Vettel 问用Plan B 定Plan C，然后车队答转头覆你，之后Vettel 用大量四字真言回应，之后仲可以问返Vettel 转头你想用咩Plan，其实我相信大家都睇得出，法拉利今季由上到下都已经无心恋战。员工士气低落固然系一个好严重慨问题，但始终解铃还须系铃人，我哋作为局外人，当然无办法知道士气低落慨原因，不过希望慨系出年2021年可以见到有所改变。不过，连法拉利领队Mattia Binotto 都话最少要2022年F1大改先有机会重振雄风，我谂2021年我哋都只可以见到法拉利同今年情况差唔多。

最后就讲吓威廉士，由2014年开始就已经变成陪跑份子，而且今季车队连一分都无。不过我就唔系想讲今季威廉士车队表现，（当然今季DNF比率虽然比Hass低，但成绩比其他车厂差，而且失误情况又经常出现，不过呢啲都系后话。）我比较想讲慨系而系卖盘。一间曾拥有九次世界冠军车队，七次车手世界冠军，43年参加F1慨经典英国家族经营车队，而且曾经有过许多创新兼成功的F1发明，但最终都系因为经济问题而卖盘收场。作为一个车迷，我系觉得十分惋惜，不过正如人生一样，唔如意慨事十常八九，依家卖盘我相信点都好过结业收场。相信大家都知道F1绝对系一个无底深渊，如果不能胜出比赛，绝对系一个烧钱慨行为，以现时车队情况，基本上系没有任何财力同其他车队斗，现在唯有期待2021年F1引入Budget cap 财务支出上限之后威廉士车队有机会系F1赛事中有分。至于冠军，我相信缘份到了就自然有机会；不过又咁讲，大家对Russell 呢个年轻人慨表现有目共睹，如果2021年威廉士车队架战车有进步的话，Russell 有无可能可以为威廉士啰到分呢？我个人希望呢件事系会发生。

讲完车队，之后就讲下今季比赛。

今季赛事我相信对每一个工作人员黎讲都系近年黎最辛苦慨一季。今季赛事本应三月系澳洲开季，不过因为疫情而取消。本身取消比赛系无可口非，但大会公布取消慨日期系比赛前两日。其实咁样某程度上可见FIA 紧急应对方面出现问题，不过亦都有传闻系因为背后牵涉大量赔偿引致太迟公布，至于系咩原因引致当然我哋都系无从得知，不过我相信果刻每位工作人员失望慨感觉绝对比每位车迷大。

跟住去到意大利法拉利第一千场纪念赛事，系相隔1400日2016年巴西站之后再一次以出现两次红旗情况，仲要系一场内有两支红旗出现，当然呢个事件系极度唔寻常。 第一支红旗出现慨时候就系喺重新起步嗰阵后面四架车大炒，正如事后好多车手都有讲就系赛会越嚟越迟着绿灯，虽然咁样可以保留赛事可观性，但系另一方面呢个安全问题就越来越大，过去无发生主要系因为车手小心。但正所谓意外，意料之外，车手都只系一个人，都总会有一两次犯错／出错慨时候，结果就引致今次意外。虽然赛后大会表示无车手需要为呢个意外负上全部责任，但系我个人觉得要付上最大责任应该就系大会本身，始终赛事可观性同车手安全上面要取得平衡我相信系唔容易，但既然可以避免发生慨意外，点解要令到渠发生？ 至于另一个意外就只可以算系Stroll 唔好彩，始终机件故障唔系车手可以控制到慨范围。 至于今场作为纪念法拉利第一千场参加F1赛事慨比赛，虽然两架法拉利战车都攞唔到头三，但系以渠哋慨实力可以入到头十名有积分攞已经好好，我相信系好多法拉利车迷眼中，咁样慨成绩已经可以收货。

至于去到九月尾左右，有一单都几令人遗憾慨消息传出，就系Honda 于2022年后将会再一次退出F1引擎供应，系历史以来第四次宣布退出F1。 当然，2022年之后Red Blue 引擎供应到而家都仲系迷，不过亦都令人谂到就系自从2014年进入 V6 Turbo 混能引擎年代之后，一直就由平治夺冠到而家，基本上其他厂商都只系陪跑。 虽然2022年系F1大改之年，但Honda 决定提早离场，某程度上亦都代表 V6 Turbo 混能引擎只有极少数厂商可以驾轻就熟，简单啲讲即系只要成功研发，就可以垄断F1赛事。我个人当然系希望可以系有身之年见到Honda可以第五次回归F1，毕竟百花齐放总好过单打独斗，赛绩优秀。

之后就返到去阔别九年慨土耳其赛道，又系一场今季非常之精彩慨赛事，精彩慨地方除咗车手慨表现，更加重要慨就系赛道本身。如果大家仲记得，当时赛道管理局为咗迎合F1回归土耳其，专程系比赛四个星期重铺赛道，加上之后一直缺乏比赛，令到赛道上严重缺乏抓地力。 叧一方面，去到比赛之前工作人员不知道什么原因，在每天赛事开始前均会向赛道洒水，令到赛道慨抓地力变到得返零。最后亦都因为比赛周末落雨，正所谓：湿滑慨路面就有湿滑慨司机，所以由自由练习时段、排位赛到正赛，我哋见到慨系一次又一次赛车喺地面上画东甩，由咸美顿到Max Verstappe，基本上都无一避免。不过今场慨结果都有啲意外，首先就系一条半干湿軚可以行到超过50个圈已经算系一种创举，大家赛后都应该见到车軚已经变成光头軚，距离爆軚只系一步之隔；另一个意外就系法拉利慨Vettel 竟然可以喺离开法拉利之前重上颁奖台，而且仲要系九年前攞冠军慨地方，虽然今次渠攞唔到冠军，但我谂对渠来讲应该系离开法拉利之前最振奋人心慨一次。 

尾三巴林站，我只可以讲句：乜又系你呀Kvyat。两次意外，渠都有份；不过又咁讲，两次意外渠都避无可避。其实今站比赛，就算唔系F1车迷都好，我相信大家都只记得Grosjean 撞到防护墙爆炸着火，

呢个亦都系近年以来F1 最恐怖慨意外之一，我绝对唔系啲咩物理学家，而且我物理慨程度只系去到中三，所以我唔可能会揣测点解会发生咁大火，我只可以肯定油缸系元凶之一；不过我想讲慨系，现代F1慨安全设备已经比几十年前提升咗好多，但系点解架车仲会爆炸着火，同埋点解车手做足安全措施，手同脚都会二级烧伤。当然我唔系专家，答唔到呢啲问题，但系亦都不禁令人反思就系渠每一场车每个车手喺度比赛慨时候，其实渠哋每一次都系冒着生命危险出赛。今年慨F1赛车应该系有记录以来最快速度慨赛车，究竟系追求速度慨时候FIA要点样保障返车手安全，我谂呢个亦都会成为FIA未来几年重点改善慨方向，毕竟今次好彩，唔代表下一次会安然无恙，当然我哋更加唔希望见到又再多一次类似意外发生；至于第二场巴林赛事，正如我上面咁讲，只可以算系Russell 时辰未到。 

总结来讲，今季赛事真系令人又惊又喜，大量精彩慨爬头，亦都有唔少令人目定口呆慨意外，例如爆住軚赢冠军同赢完分站冠军之后下一场DNF。不过正如人生一样，凡事总有起有跌，机会黎到慨时候You cannot talk，但机会未到慨时候，只可以当时辰未到，唔系话车手唔够努力，只系运气都系比赛慨一部分。今季赛事同时亦都破咗好多记录，至于有啲咩记录被打破相信大家都已经知道，不过有一个记录依家都仲未被打破，就系车手领先最多圈数纪录，现时最高领先圈数系5111圈，由米高舒麦加保持；而咸美顿系5099圈，不过我相信呢个纪录下季开赛就会好快被打破。

最后，我相信好多人都想知道慨问题，就系Red Blue 慨Albon 2021年去留问题。好遗憾，直至到目前我写慨呢一刻为止（2020年12月18日下午四时五十六分）都仲未有任何正式消息公布，不过已经有外电报导最快将会于星期五公布由Perez 取代Albon 成为Reb Blue 2021年F1 比赛二号车手。

我相信Red Blue 手上有关Albon慨数据一定比我哋多（废话），不过亦都某程度上证实咗一个都市传说，就系：使用Honda 引擎一慨赛车绝对唔系个个可以轻易驾驭。 最佳例子就系今季慨MotoGP，卫冕冠军Marc Márquez 因伤而退出整季赛事；而队友兼细佬慨Álex Márquez 虽然都系驾驶由Honda 提供慨RC213V，但成绩截然不同，亦都令到今季Repsol Honda 失去最佳车队同最佳车厂。讲返Álex Márquez 今季表现，有两次DNF，三次完成比赛但未能得分，但可以连续两星期以亚军企上颁奖台。当然，每项运动运气当然唔少得，但人为因素都少不免，Honda 引擎其实系一副十分优质慨引擎，更加重要慨我相信系车辆与车手慨结合，简单啲讲即系人车合一。正所谓：硬净唔一定实得，软弱唔一定实唔得，如果可以驯服Honda 引擎，就可以系由人控制架车，例如Marc Márquez 同Max Verstappen，甚至可以啰到分站冠军；但如果唔可以驯服Honda 引擎，就变咗系由车控制返个人，例如Álex Márquez 同Albon，企上颁奖台又得，完成比赛但未能得分又有可能，甚至DNF都有可能，真正一面天堂一面地狱，力拼仅败，斗心损坏。我个人就当然希望Albon 明年可以继续上场，始终Albon 都仲系F1 二年生，如果继续努力，我相信系可见将来上颁奖台啰分站冠军系绝对有可能，不过前提系要改善比赛期间不稳定慨表现。

至于电视直播方面，到目前为止，FOX SPORT 亚洲地区F1 同F2 赛事直播合约到2021年赛季结束／年末，所以大家应该可以放心，不过就未知道会唔会继续有广东话评述。

最后最后，如果想讨论，欢迎大家一起留言讨论，之后希望可以大家拍五下手，支持下我继续创作慨原动力（土下座