点样分辨警察系唔系「毅进仔」？前人早有解决方法！

（本文以香港粤文创作）

过去几年，香港警察慨水平屡创新低，不单单讲紧员佐级警员，就连理论上经过大学教育慨督宪级都一样。早几日先有一单法庭新闻，堂堂一个督察系庭上宣誓果时，连誓词「我谨以至诚……」都读唔掂[1]，仲讲到明自己唔识读个「谨」字，连一个高小学生都识慨字都读唔掂，实在贻笑大方。

讲翻香港警察慨水平，近年由于大规模招募只有中学学历甚至毅进文凭[2] 慨持有人，2019/20年度招募慨员佐级警员当中，更加有超级45%仅持有毅进文凭，其知识水平及执法能力可想而知。但系作为「纪律部队」，着同一套制服，戴同一款超稀有慨委任证[3]，就连言语方式都已经同化晒（望望上面果位连「谨」字都唔识读慨大学毕业督察~~），根本无从分辨企系你面对慨警员，渠慨实际学术水平去到边......

或者啦，对新一代嚟讲或者唔讲唔知，过去慨警察（皇家香港警察）曾经有项制度，明确、清晰咁令大众得知一个警员慨学术水平去到边。年几之前我亦曾经针对香港警察充斥「毅进仔」慨情况，写过一篇提议恢复用旧制度慨文章。

（无错，又系一篇旧文，原文刊于《辅仁文志》，并曾略作修改。）

[1] https://gongjyuhok.hk/articles/5021

[2] 毅进文凭持有人，其学历等同香港中学文凭（DSE）五科二级成绩（包括中、英文），即最最最最基本的「五科及格」。简言之（虽带点歧视），毅进文凭只有连DSE 都没有五科及格用以升学的人才会考虑。

[3] In case 大家不清楚，近年香港警察（特别是便衣警员）于执行职务，特别喺处理与反逃犯条例有关慨案件之时，大多拒绝戴上委任证，市民按法律权利要求警员出示时，下场大多惨烈。

早几日港台《视点31》节目入面，有个李姓退休警司讲出著名慨金句「警察份粮，有三份一值在比市民闹，有三份一值在比上司闹」，全城市民无一不拍手叫好，大呼「咁样先系警察慨价值」。不过对我嚟讲，渠讲慨另一句反而更值得思考：「前面有个警察，你都唔知渠学历咩野，渠心口无写㗎麻，咁你点知渠毅进（毕业）呢？」。

啊李Sir，你入职都应该距今有几十年，或者你唔记得咗，其实你当差果个年代，警察部早就有解决方法，用一项简单、清晰慨方式，比大众用嚟识别警察慨学识水平㗎……

无错，就系「红膊头」！

因应过去慨整体社会学识水平，能够成功中学毕业，识讲几句英文已经可以喺就业市场搵一份好工，对于要「好天晒、落雨湿」慨员佐级警察职位，实在难以吸引识英文慨人入职。亦因为咁，长期以嚟皇家香港警察都会同时招募识英文同唔识英文两批人。但系话晒香港当时系英国慨，市面唔少外国人（英国人）需要向警察求助，而且高级警官亦唔少系英国人，点去一眼分辨渠哋识唔识英文？

当时慨办法系，只要招募时系明确识英文慨（例如中学毕业），或者入职前后考过咗政府第四级英文试（系当时共计八级慨考试中，第四级大概等如中一慨英文水平，最高慨第八级等如中五英文水平），会转戴红色底慨警员号码肩章（即系所谓慨「红膊头」）以作识明，仲会有一笔一次性慨津贴（钱呀，系钱呀！），而且对于员佐级警员而言，考到第八级英文试，系渠哋获上级推荐投考督察慨必要条件，变相以升职作利诱鼓励员佐级警员去读书、学英文。

呢套制度，由五、六十年代，一路行到九十年代，直至大约主权移交前后，员佐级警察入职慨最低要求升左做会考5科及格（包括中、英文）之后，就唔再需要呢一套制度。不过观乎近年警察慨学识水平，似乎早已倒退回过去。

今时今日，有无办法将呢一套重现？有大学学历慨就戴「红膊头」，无慨就黑膊。不过老实讲，连「警察做野唔洗带委任证」都讲得出，想认渠系唔系真警察都无方法，仲话想认渠有无大学学历？明显我谂多咗啦……

（PS: 真心觉得旧时代慨警察型好多！无论制服定制度）