如果要将第三颗未命名一等星命名的话，我会命她做：恋爱小行星

一讲起芳文社，相信大家一定会第一时间谂起一大班萌妹子系虚度日常；咁一讲起动漫工房，相信大家一定会第一时间谂起一大班萌妹子系度百合。如果两间公司合作制作动漫，当中最出名慨梗系New Game。如果话New Game系职场废萌日常番，咁恋する小惑星（下称：恋爱小行星）可以话系高中废萌日常番。

恋爱小行星讲述，女主角之一木之幡米菈在小时候参加露营时遇到了一位年纪相仿的男孩，并与他在观察星空时做下了约定，要找到新的小行星并以男孩的名字取名（其实呢啲嘢你自己上维基百科都睇到⋯⋯咁我就梗系唔讲呢啲啦。）

作为一个动画党，睇呢套之前，梗系无补返原作先。当初会追呢套，梗系、绝对唔系因为芳文社同百合工房合作（谜之音：Ao好可爱）Www

一开始睇，头果几分钟，点解会有男人出现架？我明明应该系睇到一大班可爱萌妹子，点解会有异性架？妈呀，我不能接受！当然啦，之后好快讲返渠系女性黎，只系个名同埋嗰阵相遇时装扮好似男性。

可能因为中学时期我主修系地理，虽然最后系考到5**，（不过最后因为某啲原因所以选择咗出嚟做嘢）所以我第一次见到呢套介绍慨时候其实我系好有兴趣，加上因为用天文同地理做题材慨动画真系少之又少。正所谓：上至天文，下至地理，所以睇完一集之后我对呢一套番其实系好有兴趣，好有冲动想追落去，能够将一样咁学术性慨事用咁轻松慨方法介绍慨时候其实都系一件几好慨事。

虽然每一集慨推进都可以话系好轻松，完全放空个脑睇都无问题，不过呢个我谂就系芳文社同百合工房合作成功慨地方，放工、放学之后俾你轻轻松松抖下，唔会有啲咩异世界争夺，更加唔会有啲咩世界大战毁灭地球之类，完全系心灵鸡汤，完全可以化解一日慨疲劳（呢个世界欠芳文社一个诺贝尔和平奖）

第六集之后有一集慨总集篇总结第一至第六集，咁我亦都趁嗰个空档走去补返原本个漫画，睇完之后发现其实动画个时间表上推进系有啲怪，中间有啲重要慨嘢或者好多学术性慨嘢都系只系轻轻带过什至无讲，所以其实动画睇落去有啲怪系正常，如果有机会，真系值得花少少时间去睇返漫画原作。

第一至第六集因为中间牵涉太多学术慨嘢，我觉得如果我讲落去应该会好多人咁上一页离开，所以就唔讲（虽然铃完全系用嚟打酱油，不过每一次有渠出场我都觉得好好笑）

第八集结尾讲到Ao因为屋企理由要搬家，之后应该会成为成套漫画又好动画都好慨转折点，但系好遗憾动画只系好表面带过。原作漫画渠呢一部份其实真系写得好好，嗰种细腻慨人设同埋嗰种起承转合解决问题慨方法，其实就真系已经跨越渠哋搵唔搵小行星个重点。 Ao用左咁耐时间终于可以同米拉重遇，但只系过咗一年之后就要分开，佢唔想面对嗰种唔想分开慨心情，一直收收埋埋，一直同身边慨人讲无事，但自己一早知道只是扮出黎，唔想身边慨朋友担心，其实呢一部份真系好容易令人身同感受，最少我系。

虽然之后Ao 同米拉顺利同居，但系中间经历慨嘢其实真系好值得令人反思：子女没有表达自己慨意思，无论仔女点样任性，都冇办法改变父母慨情况？父母一直为仔女准备最好慨环境，但系如果仔女一直挣扎，应该顺渠哋意定系继续一意孤行？好庆幸我系一个屋企唔会点理我慨环境长大，所以渠呢个问题系我屋企系会选择比我自己面对自己解决；反观而家香港好多新一辈家长，乜都要管渠哋，甚至乎连星期六、日慨休息时间都安排晒渠哋去晒唔同慨兴趣班补习班慨时候，先唔好话欢乐同想唔想，而系渠哋连休息慨时间都无，咁样真系好咩？喺恋爱小行星入边，Ao选择咗宁愿离开父母都唔想同米拉分开，咁样正正代表父母系适当慨时候亦都应该学识放手，但香港啲家长好似觉得一放手渠哋就会误入歧途，甚至会因为好少一两个兴趣班而影响将来，搞到啲仔女连挣扎都唔敢。正如恋爱小行星，你想去河边烧嘢食执石头或者夜晚去观星？发少阵梦啦你。

要获得父母认同系一件极度困难慨事，但系如果唔试过，又点知会成功定系失败？但系如果你连试慨勇气都无，咁样有乜意义？父母连你点样慨心意都唔知慨时候，又点会知道你谂紧乜。喺原作漫画中，Ao努力踏出第一步，虽然系果一刻渠都唔知道结果会系点，成功失败都未知，但系起码渠肯踏出第一步，起码肯去尝试。虽然最后都系成功（如果唔成功我谂成个故事应该会完结或者我会烧书），但Ao、米拉、铃，甚至乎两边慨家长，其实都系喺度改变紧。嚟到呢一度，其实我谂渠两个搵唔搵到小行星已经开始唔系咁重要，而系渠哋点样一齐面对将来先至系最重要。我谂可能连你睇你都觉得要搵到小行星系绝对无可能，不过更加令人值得反思慨系，梦想总系不切实际，但系如果有机会俾你实现梦想，就算周围慨人反对你都好，你应唔应该坚持呢一个机会，捉紧机会实现梦想，因为可能过咗呢次机会就以后都无机会，坦率地表露自己的感情，才能顺利成章做出行动和决策。

另外，主题曲搵咗东山嚟唱（东山大法好），真系几好听。不过我要讲唔系渠唱得几好，而系首主题曲啲词其实真系写得好好，细腻每一句歌词之后你都会发现成首歌所有歌词其实唔单止喺度讲点样搵小行星，而系点样去面对点样慨事。当中有一句：见たことのないもの见つけてゆきたいな，正如Ao最后都系选择咗同米拉同居，而选择唔同父母一齐搬屋；或者再后少少原作漫画讲到小行星寻找活动，米拉赢咗参加资格但Ao输咗。渠两个嗰转变其实同开头真系差好远，无论是挫折或者失落慨时候，Ao由原本好怕同人沟通变到有勇气去同人讲出自己慨目标；米拉则坚持自己梦想，呢个就系渠两个互相好好支持对方慨例子，呢个亦都系要一点一滴累积先会明白慨事。人生失落慨事总系十常八九，所以身边慨人支持先系最重要。

抱持远大目标和梦想慨两个人，渠哋选择咗自己将来慨步伐，咁你呢？

最后最后，希望大家可以按五下拍手，作为支持我创作的原动力（土下座