五年来，我们找到属于自己的【真物】吗？

随着不起眼女主角培育法（下称：路人女主）剧场版BD贩卖消息公布，亦都标志着呢一套陪伴咗好多人成长慨作品正式落幕。虽然原作者唔否定有大学篇慨可能，不过大家都知机会真系微乎其微。

我今日要讲慨唔系路人女主，而系要讲另外一套我印象中更加深刻慨作品，就系：果然我的青春恋爱喜剧搞错了（下称：果恋）。我记得以前睇嗰阵只系中三定中四左右，成日觉得呢套唔好睇，所以嗰阵时睇完其实真系无乜印象，我好记得果时系喺Animax 睇，之后网络开始发达先开始上网追番；如是者就算去到第二季，我每集都系好快睇完，不停飞过嚟睇就算，因为嗰阵时成个故事对我来讲实在太高深。当时作为一个中学生慨我，嗰阵时其实真系一啲都睇唔明，嗰阵时慨我绝对觉得呢一套系一套狗屎垃圾都不如慨动漫。

跟住过咗几年，我完全系忽略咗呢套。直至到上次去完冲绳旅行睇完路人女主剧场版之后。正当我睇完路人女主剧场版，跟住同行朋友讲到几好睇之际，我先突然醒起我原来我完全唔记得咗呢套。可能对渠嚟讲路人女主系陪渠长大慨小说，但果恋对我嚟讲先至系陪我长大慨小说。你可能会问，明明我上面都话我唔记得咗呢套，咁又点会陪你长大？咁样咪即系自打嘴巴？系，无错，虽然之前间唔中都系Facebook 都会见到果恋慨介绍，当中最多慨就梗系拖稿啦（最尾三本书拖咗几耐先出大家应该都记得好清楚），但系无独有偶，自从出嚟做嘢之后，我第一份人工就系拎咗去买果恋第一本轻小说（嗰阵明明知道自己唔会有时间拆嚟睇），但系之后得闲我都会慢慢慢慢咁样买返齐晒十三本，唔知点解每次行过书店，总系有种魔力吸引我想去买返齐一套（虽然买咗返嚟摆咗好耐，都系最近先至有时间拆包装开始睇）（谜之音：一路打我都觉得我自己真系一个怪人o(^▽^)o）

随着2019年年尾第三季制作决定消息推出同埋第十四卷小说推出慨时候，讲真嗰阵时我系无时间去重温呢一套。直到近期因为有机会尝试在家工作，所以就变咗有好多空闲时间重温动画第一二季同埋补返小说。

距离上一集果恋已经过咗1748日，不如我哋回想返两季动画讲过乜先。 （以下为节录）第一季主要系讲大老师入咗侍奉部之后，结衣跟住都入埋部，再出场慨就系有户冢，大约就系呢啲人物。过多几集，大老师同结衣慨误会就解开（唔记得就自己睇返原作），继续落去就系卷入学院祭同运动会慨侍奉部。大约咁样就完咗第一季；第二季一开头就讲修学旅行，之后就讲如何阻止雪乃做学生会会长同联校圣诞舞会。最后第二季第十三集，留低咗两个疑问：究竟大老师追求慨真物系咩？同埋雪乃最后慨委托系咩？

五年过去，相信当初追果恋慨人好多都已经出嚟社会做社畜，甚至乎可能已经有人已经有家庭。当初我记得我完全放弃呢套都系因为大老师讲慨嘢实在太深奥，俗啲咁讲大老师已经看破红尘，但嗰阵时慨我完全无办法代入去，直头连渠讲乜我都完全唔明白，（可能就系呢个原因间接搞到我开始要追萌系日常番安抚我日后生活烦恼慨心灵？）但系自从出咗嚟做嘢之后，当我再次有机会睇返转头，我就明白大老师渠慨每一个心情。可能对好多人来讲，睇一套作品又何必代入感情？虽然我都系，但系有阵时觉得唔代入就唔会明白渠当中慨意义。

如果话不起眼系白色相簿三，呢套绝对系白色相簿四。其实两季动画入面，第二季第八集大老师同平冢静嗰段对话真系讲得好好：如果感情可以电脑化计算慨话，咁一早就已经电脑化咗啦。无法通过计算得出慨答案，就系人慨情绪。就算嗰阵时读书好或者依家出嚟做嘢都好，我都系选择同大老师一样都系自己一个人去面对或者解决每一个问题，因为觉得咁样系最好。感情一定唔止系指男女之间慨爱情故事，亦都可以系自己朋友或者同事。回顾返我慨中学生活，我都系自己一个人，同大老师一样（谜之音：点解我中学无侍奉部，如果有我一定第一个加入Www）。人系会长大，性格亦都会随着环境改变。正如第十二卷小说入边亦都有一部份我觉得讲得好好，就系阳乃对住大老师讲：其实你同雪乃只系对方某种扭曲慨倚赖嚟到生存，大家内心深处都好享受依赖对方果种满足感，但总有一日呢个倚赖关系会结束（大约意思，因为我系睇日文版）。正如第二季动画下半部份讲联校圣诞舞会，两间学校慨人倚赖对方，如果出现问题，就可以轻松推卸责任唔使自己负责。呢样野正正就系依家慨社会成日出现慨问题，帮一班人太依赖另外一班人慨时候，出现问题除咗推卸责任之外，就咁。冇人谂住去解决个问题，但系出事慨时候，唔系应该首先要谂咗解决问题慨方法，然后先再追究？如果唔系又点可以及时纠正错误？

如果不起眼系讲同人社团活动，咁样果恋就系讲一个人慨成长，会因为自己性格而同朋友有分歧。因误会而结合，因了解而分开。其实有阵时睇返转头，发现大老师讲慨嘢其实都几中二病，不过调返转咁讲，与其话中二病，不如话究竟渡航系用咩心态去写呢一本小说，因为入边有好多唔系人会谂到或者讲慨说话，例如大老师一开始所讲：《野生动物的生态》同埋《回顾高中生活》。虽然结局都米已成炊，但依家睇返转头，发现人系会长大。五年前我因为一句都睇唔明所以放弃，五年后今日，回想返我长大慨经历，发现如果大老师讲慨嘢我早啲睇得透慨话，我谂我而家做人会截然不同。正如我之前咁讲，人系会长大，由小说第一本睇返转头，其实大家应该会隐约见到大老师同雪乃渠两个都系有成长紧。去到最后，大老师嗰种成长，其实同我地成长慨经历都系差唔多。虽然往事只能回味，但回味过后我哋仍然需要继续向前行，人系会长大，但系无一个绝对慨教科书可以教导或者指引，一定要亲身经历完先至知道。虽然果恋仿佛好似好深奥，但系对我黎讲就留下咗好深刻慨印象，绝对系我成长中留下咗一个烙印，或者呢啲就系我成长中慨遗憾？每个人都努力寻找自己在世生存的＂真物＂，但是不是每个人都会成功找到？例如22/7中西条和，为咗摆脱现状而参加选拔，每个人成长都系唔同，或者答えはいつも私の胸に，但都系要愿意踏出第一步去寻找属于自己的＂真物＂，虽然未必每个人都想系世界留下足迹，或者每个人寻找属于自己的＂真物＂途中都会有不同经歴，但希望可以系自己人生中留下属于自己的足迹，寻找属于自己的人生。

最后最后，希望大家可以按五下拍手，作为支持我创作的原动力（土下座

PS 今日系小弟生日，希望可以乞句お诞生日おめでとう~