根太教你煮架胸

▍那星救地球

从前从前从前从前，有个电视台讽刺时弊慨节目，每一集都会令我笑到趴喺地。乜都唔怕讲慨题材内容，透过嘻笑怒骂慨对白同埋夸张慨肢体动作演译得啱啱好。唔过火位，更加唔似家阵咁，乜到船头惊鬼又怕草绳，系咪都人人斩定脚趾戴定头盔先。

八婆消息曾经传到好响，话第一师奶个老爷一早就已经架空咗渠㗎啦咁喎。呢啲马后炮讲唔讲都冇乜分别。教咗煮餸咁耐，我好少会做「架胸」呢一道菜，全因为无论系材料或者时间上都需要好多，而且要得架胸，必先有架両。

既然讲开，咁就等根太我攞定鸡蛋六只同埋糖两茶匙出嚟，简单教大家煮呢个「架胸」先：

 ① 拣啲够重手慨「架両」，够斤两够重秤至系好嘢。睇清呢个系架両，official 好多慨，唔系民间常见慨炸两。
② 另外摷啲叠file 够厚慨慨「架两」，数量愈多愈好，多啲堆埋去先可以架得起。
③ 数量够多，又够重秤，就可以开炉，用多元慨大细文武火不停咁煲渠，啱滚就自然煲得出一碌「架梁」。表面上系用嚟帮手撑住个饭煲盖，实则埋定闸等钟声一响一起起步，就插手伸脚撠渠卤味下马。加卤水汁唔净只系为咗整色整水㗎嗱。
④ 落晒成包花生，一边食就一边等渠煲到成烹嘢黐肺黐底燶晒。趁热，倒晒渠，一定要趁热。砍掉重练换新血，放喺旧酒新瓶里面嗰包三小辣辛血。

＊小心睇路睇火。一日唔熄火，睇唔紧慨话有机会喺不知不觉间推你去一齐打飞行棋飞机。三个六返大陆，重做第①步，转弯直入无限轮回。

「咁呢，就为之维妮骨啦。」我记得节目里面嗰个阿乜太系咁讲。

▍▍神奇福佳宝贝

隔离厂嗰部贵价抽气扇系咪坏咗？当室内温度酝酿得高到一个点，渠老爷拍紧嗰套《阿爷厨房煮意》就肯定会收返埋个笑容罢拍，转拍隔离台比较严肃慨《阿爷随访主意》。不过既然都系跟住食谱嚟煮，唔走得出咩花臣慨，嗱不过唔好又系家传户晓嗰碟「四字池鱼兜乱」好喎。

咁到时新嗰煲煮到咁上下，神奇福佳宝贝畀咭超连同一齐摆堆慨奇兽会唔会畀茅山寨版精灵葫芦所收服呢？

欲知后事如何，且看渠地下回点样被分解。未知，唔见有剧透。

唔知我讲繄乜？之唔系呢套不日放映但热度十足慨《神奇福佳宝贝畀咭超之勇闯茅山》老尴煮艺大比拼啰。有乜特别？无㗎，咪又系同一间制作公司，起用另一组都系搽晒厚颜慨班底，自我吹棉直至思觉失去调味，换汤不换药咁以三幅被炒炒埋埋嗰两碟大镬饭，再互相你煮下我煮下你咁啰。

免费入场，你唔系唔睇呀？温馨提示返先，上一场放映途中突然派嘢食派嘢饮，我呢种人谂住无死啦就梗系唔好蚀，原来系好难食，鲠唔落。之但系算啦世界上无free lunch 嘛又唔系队咸鱼。吖点乜知渠竟然秋后埋嚟收我钱，重要系贵到离晒谱，贵过晒所有食谱！自古以来，贪字真系得个贫！就算系暗地里改咗例，唔畀带嘢食进场都好，我下次宁愿唔食。

有下次慨话，小心下场呀。

▍▍▍有啲对白唔系人人都讲得起

琴日根太喺街市买餸，见到天真蕉，佢话个个都想有机会讲句「系咁先，唔系咩呀」慨对白，唔通个个都真系想讲咩？

一言惊唔惊醒到梦中人我唔敢讲，我至怕一语系成谶就阴功。冬阴功乃系外国势力架势菜式，我唔知，我唔识煮。我唔食得辣，净系知自己煮完然后食到阿妈都唔认，就系自食其异果。奇异果，我食咗会过敏，病症系噏臭口，病发时会乱讲廿四味。

我就系刚刚食完两个，所以先至谂到呢堆野芝麻。等阵揸车出去买餸，都系戴返个头盔好。唔知有冇用，你都知啦，近排流行防不胜防唔声唔声随时炒埋嚟，又唔系lime juice 喎，抵唔到颈睇唔过眼呢啲批豆呀我。

好彩我冇讲我系根叔个老婆根太吖，定系渠成日冲出嚟做架梁嗰条仔根太（ねだ）啫。