2022年F1赛季前瞻

如果话每一个时代慨F1总有一个代表人物或者车队的，近代慨代表人物就一定有冼拿，而车队方面应该都系2009年Brawn GP呢个童话式传奇故事。而每一次改例，形势都势必有所洗牌，今年适逢近40年以来F1最大规模慨改变，咁不如今个星期就同大家讲吓我自己对今年大改变慨睇法。

工作人员将面对更高压的比赛环境

首先就讲咗今年慨赛期先，如果全部分站均可以顺利举行，将会于3月18日系巴林开始，11月20日系阿布扎比煞科，之后11月21日就系世界杯开始。如果大家有留意近年慨比赛，都会发现今年为咗迁就世界杯举行而特别早完结，亦都代表今年整个赛期会比以往更加紧凑。加上如果疫情影响减低，全部23个赛站都顺利举行的话，将会成为有史以来最多慨比赛一年。 （虽然而家睇落因应全球疫情发展已经觉得无乜可能全部分站都会举行）但正如我系之前都有讲过，咁紧凑慨赛程其实对各方面都系一种前所未有慨压力。首先讲物流，因为受到疫情影响全球物流严重延误，虽然近年F1已经采用各种不同慨混合物流方式以赶及比赛，但如果好似上年巴西站或者比利时站慨情况再出现，绝对会令今年慨物流更加紧张。另外就系随队工作人员，如果细心留意今年比赛举办日期，就会发现今年有好多连续周末都有举行比赛，在赛季初段我相信应该问题不大。但如果去到赛季末段，几个星期内差唔多要环绕地球一周慨飞行距离，加上唔同地区慨时差，对工作人员来讲绝对系一种考验，我相信去到赛季末段，工作人员被引起慨人为错误我地更加容易会睇到。但我想讲慨系，我地今年真系唔好忘记，每一站各车手激烈比赛慨时候，我地唔好忘记后面呢一番劳苦功高，一年只可以返屋企两次慨工作人员。

角田裕毅自身难保？

既然都讲开人，不如就首先讲咗车手先。头先今年唯一一个新人就系黎自中国慨周冠宇。虽然大家都知道渠系俾钱买位，但渠慨技术相比起另一位俄罗斯车手绝对优胜，但其实都有好多外国传媒表明渠能够成功加入Alfo Romeo 绝对系因为钱，所以如果渠今年稍有出错，我绝对相信出年渠就算渠有几多钱都未必可以留低，因为有另外一个Sauber后起之秀冒出，所以如果稍有出错，其实真系神仙都难救。不过相比起渠，另一个二年级生：角田裕毅，情况更加令人担忧。正如系2021年其中一个访问中提及，角田知道自己可以再留系赛场多一年慨时候绝对系异想唔到。无可否认，系旧年三个新人中，如果以分数来讲，渠绝对系最佳新人。但系正如好多人评论渠都系话三年升三班实在太快。虽然呢一个问题去到旧年赛季尾段可以见到呢个情况已经有所改善，但系去到赛季中都仲有好多低级错误出现，就算系新人都唔应该犯慨错误，加上渠用粗口闻名于世，所以渠今年仍然继续可以留系赛场上已经算系奇迹。今年截然不同慨赛车，虽然对在场20位车手都系焕然一新，但系以渠慨适应能力，对渠来讲绝对系一个考验。跟据渠系F3同F2慨表现，渠当每去到一个新环境，都差唔多要用半季时间先可以适应，虽然对渠黎讲，2021年已经有一整年驾驶F1慨经验，而且还有季末季初慨试车，但系面对全新慨赛车，我相信对渠绝对系一种考验。我对渠慨实力绝对毋庸置疑，但如果渠继续犯呢啲低级错误，我相信红牛慨忍耐力系有限，加上2023年红牛青训计划中可以取代渠慨车手实在大有人在，所以我相信今年对渠来讲会系好重要慨一年。咁你可能会问，点解咁多人唔讲偏偏要讲渠？因为俗语都有话：百〇成材（再一次提醒我呢度系一个合家欢慨地方，粗口呢样嘢就自己填番心目中慨字上去啦），其实我对渠系有啲期望，因为近年来亚洲车手能够继续留系赛车运动参与比赛已经少之又少，加上近年亚洲车手能够企上颁奖台慨近年来只有MotoGP、Moto2同Moto3慨赛事，所以我相信渠系绝对有实力能够企上一次颁奖台，只系怕呢一日黎谂之前渠已经离开咗F1。

各项规范将会见到成果？

相比起以前F1，金钱系近年已经不在系一个无底深潭。 FIA自从旧年推出预算上限之后，虽然旧年仲未见到任何特别慨成效；但系今年适逢大改例，加上每一队可使用其预算进一步收紧至1.4亿美元，所以我相信每一队用于资金研发上面慨分水靓应该会逐渐拉近；加上可以利用风洞进行测试慨次数有进一步慨限制，唔再系好似以前强者越强，弱者越弱呢啲情况出现。但表面上就梗系好美好，但实际上我又觉得唔会因为减少测试同埋资金减低而拉近差距。虽然1.4亿美元对于一啲下游车队黎讲（例如William同Hass）仿佛见到每年使用资金上限，唔使再担心会因为金钱不足引致研发大幅落后，但相比起上面最顶级慨火星车队（红牛同埋平治）绝对系小巫见大巫。应该咁样讲，下游车队一整年收入（包括广告收入）也不足1.4亿美元，好容易会有收支唔平衡呢个问题出现；但系最上游慨车队一年慨广告收入可能已经超过1.4亿美元。所以虽然原则定立财务规限系好事，但系我相信背后整个收入慨差别依然会足以左右赛场慨结果，毕竟大家见到或者见唔到慨地方都系用紧钱，1.4亿同1.2亿美金已经差好远。

正如一开头咁讲，今年系大改例的一年，车队可以用于风洞研发慨时间亦会因为上一季比赛名次而有所增加或减少，我相信呢一个会系我地最容易睇到分别慨地方。因为用旧年比赛慨结果来讲，车队冠军平治同包尾大班Hass所能够使用慨测试风洞次数足足相差40%，现今F1主要系倚赖气动力学黎分出高下，我相信大幅削减平治同红牛可以使用慨风洞测试时间，绝对会拉低渠地两队慨实力。但始终平治系场上面有三对顾客队伍，如果要收集数据我相信亦都会比红牛或者法拉利容易，所以我觉得开头各队慨分野应该唔会太大，之后就要睇各车队会将研发重心放系今年定系出年慨赛车身上，先可以知道今年各种限制对车队慨实际影响。

红牛、平治两败俱伤？

如果大家记得旧年最后一站慨比赛，都算系近年来最精彩慨比赛。除咗因为系相隔好多年之后再一次两位车手同分进入最后一站比赛外，更加因为大量传媒慨炒作令到最后一场关注人数急速上升。系最后一场比赛，好多酒吧竟然唔系播足球比赛，而系走去转播平时好少会播慨F1煞科战。不过就唔系要讲呢样野，而系想讲呢两队其实已经埋咗一个隐忧系度。

如果大家仲记得旧年慨比赛，平治大约去到比利时站前后就宣布将研发中心搬移去今年慨赛车，虽然红牛都系咁讲，但系我地可以见到红牛去到最后几站赛车仍然有新慨升级，可以睇得出为咗再一次攞到车手冠军而搏尽无悔。虽然口口声声话没有影响今年赛车慨研发，但系明眼人都知既然有新慨升级，即系今年慨研发方面一定要有取舍。而且根据很多传媒报道，红牛今年慨赛车系尚未成功通过撞击测试，虽然旧年有辉煌慨成绩，但系呢啲消息我相信对于车队上下一定有所打击。

但系另一方面，平治都系不遑多让。虽然2021年赛车没有太大慨升级，而且一早已经开始将资源慢慢拨去今年慨赛车研发当中，但系2021年一开始，平治就受到引擎可靠性问题困扰，虽然开头半年都没有太大问题，但系过咗暑假之后就开始不停更换引擎，甚至乎保子一整个赛季换咗六副还是七副引擎，好似成为咗有记录以来一季换最多引擎慨车手。虽然2022系一个全新慨引擎设计，但系2021年为咗要搵出引擎唔可靠慨原因，工厂一定要用好多额外慨时间搵出问题根源，又系一个影响今年研发慨原因。虽然最后都系搵唔到原因，只系更换制造引擎物料勉强解决问题，但系仿佛知道能够成功卫冕车队冠军后，便即刻将所有资源放到今年慨赛车身上，令到两位车手慨引擎继续处于一个随时会坏慨状态，完全无谂过解决问题。

一队就系为咗赢车手世界冠军而不择手段，宁愿牺牲今年研发都要无论如何获得胜利；另一队就系为咗寻找引擎不可靠慨原因而影响研发，所以我相信即使两队都声称旧年慨赛季无影响今年慨赛车研发，但我真系觉得纯粹只系语言艺术，或多或少都会影响今年慨赛车，只系从赛场上黎睇，平治要面对慨研发耽误绝对比红牛少，但系仿佛已经输咗起跑线，所以今年应该可以睇得到呢两队会洗尽浑身解数，既唔会被另外一队爬上黎，亦都会用尽一切方法阻止其他队伍慨研发优势比自己优胜。

黑科技回归

相隔40年，地面效应（Ground effect，又称：文丘里效应）将会重新回到赛场，正式批准使用呢一个黑科技。

简单讲一讲咩叫地面效应先，简单来讲就系系车体底部形成一个比大气压力计低慨区域，因为地心吸力慨影响，正常大气压力会向下压，车体下方便形成一个接近真空慨区域，而且车底有唔同慨坑纹引导气流，令到进入车底慨空气加速离开，令到车身可以更加贴近地面，从而提升车速同埋制造下压力（我就唔系读物理慨，如果有大大可以帮手解释，麻烦系下面留言讲一讲，唔该）（按此浏览维基百科解说）

好啦咁就讲返呢个黑科技，当年被禁慨原因系因为令到当时每一架车慨极速有所提升，但系只要过分跟贴前车或者赛道有坑洞，一有大量乱流便会令到赛车失控，加上80年代安全措施未有而家咁多，所以系嗰个年代因为赛车运动而离世慨人大有人在，有见及此所以禁用。咁你可能会问，咁而家系咪可以令到速度慢咗又安全咗？我可以答你唔系，物理慨嘢边有咁容易改变，仍然系同当年一样可以制造到更加之快同更加大下压力慨车，只系而家多咗好多唔同慨安全措施保障车手慨安全，加上赛道慨完善，安全方面绝对系同当年无得比。

另一方面今年赛车最大慨改变就系希望大幅减低车尾乱流情况出现。虽然呢一个我地就咁坐电视机面前睇好难会发现，但系我地好容易就见到当两架赛车接近对方慨时候，后方慨赛车经常都会面对引擎散热不足同埋车呔温度过高慨问题受到影响。目前如果一架车紧贴后面一架车，如果唔使用DRS，基本上系难以靠自身能力爬头，跟据F1官方网站介绍，2021年慨赛车如果同前车相隔10米，所承受慨乱流大约有85%，对于严重倚赖气动力学慨F1绝对唔系一件好事；而今年慨新车如果系相同距离，只需要承受大约20%慨乱流，可以更加容易有爬头机会，对于整个比赛可观性绝对系大幅提升。今年慨大改例就系为咗减低车尾乱流出现，希望减低呢啲问题出现，当然更加希望系可以令到两架车系距离短慨时候可以更容易有卖身肉搏夹战斗。不过当然，理论上慨数字永远都好完美，但系实际我相信都要等到实际比赛先至知道实际慨成效。

除此之外，今年大会所提供慨零件数目比旧年更加多，即系代表每对车队能够设计赛车慨部件进一步减少。虽然系全球疫情大流行之下，呢个绝对系一个可以减少资金系研发车辆方面慨好处，但系亦都代表每一对车队能够设计出唔同慨赛车亦都有所限制，我地都应该好难会再睇到类似2020年平治DAS呢一类天才式设计。但系即使面对各方面慨限制，加上车辆最低重量慨提升，幸好我地系目前已经见到慨新车发布会中，都可以睇到每一队车对今年慨改例都有唔同慨解读方式，即使系同样购入平治引擎慨William同Aston Martin，车辆设计已经完全不同，所以我地唔会见到千篇一律慨赛车设计。咁当然啦，实际都系要等冬测过后先至知道。

不过目前肯定慨系，以多年来慨赛车设计哲学，平治慨优势绝对系比红牛大，因为平治慨设计本身系比较贴地面，而红牛就选择黎地面比较高。今年大幅改例，对于红牛呢啲设计离地面比较远慨车队来讲，车队同车手都要重新适应，所以最后都系要睇边一个适应能力最快。

规则终于唔再系随便决定？

上一季我相信对大家印象最深刻慨就系判决不公平，比利时站整好架车可唔可以出返嚟比赛都无人有个官方答案；尾二站沙特阿拉伯世纪一撞竟然系求其了事；最后一站出唔出安全车竟然可以系由车队决定而唔系大会决定。呢啲咁慨天方夜谭式慨规矩，竟然可以系世界最高殿堂级别慨运动比赛中发生，绝对系贻笑大方。即系例如英超，李斯特城对曼联，李斯特城有人犯规，然后领队可以叫裁判唔好出黄牌，之后到曼联犯规，明明角球可以倾到变十二码，呢啲唔应该发生慨嘢竟然可以系F1出现。所以今年比赛规矩改变其实系另外一个改革慨大方向。不过我同大家一样都只系睇好多唔同慨媒体引述消息来源报道，所以最后会点样改变我地都只可以拭目以待。

首先我地终于唔使再见到令人好讨厌慨0.5分，因为今年将会完全改变呢个比赛计分制度，简单啲讲就系按比赛完成比例而给予分数。因为我好相信好似旧年比利时站落雨落到赛唔到车慨情况应该好难再会出现，所以我相信对于大部份人来讲都应该系得个知字就算。

另一个比较快见到效果慨改变就系各车队唔可以再同赛事总监即时通讯。毋庸置疑，呢一个即时沟通慨平台令到旧年整季慨比赛虽然对观众来讲充满娱乐性，但系对于赛事总监来讲其实需要承受更加之大慨压力，而且更加会系比赛途中播出来，令到即使比赛完结，赛事总监仍然需要受到不必要慨压力指骂，所以取消呢一个即时沟通慨方法，除咗可以减低果一刻赛事总监承受极度高压时作出慨判断之外，亦都可以唔使再承受额外慨压力。不过，其实整个大会慨裁判同埋整个体制都需要改革，只可惜慨系没有合适慨人才，所以只可以按部就班。但系正所谓有好过无，一齐就放长双眼，睇吓今年又会有一年点样慨比赛俾我地睇。

总结：放眼2025年

其实我自己就觉得，即使今年系大规模慨改变，但其实早于2019年赛季期间已经开始宣布会进行大规模改例，我相信各大车队其实一早已经准备好投入资源进行研发，只系因为疫情关系引致整个改例2021年延迟至2022年，所以我相信仍然会好似我上面咁讲，真系唔会一下子将各队慨差距拉近，最能够受惠慨应该只系下游车队有机会重回中游。但是我相信改变唔系一朝一夕，今年虽然系大改例，而且引入更加环保慨E10燃油，令到整个引擎慨布局需要重新设计，但始终多余慨MGU-K／MGU-H呢啲动能回收系统依然存在，各车队始终要面对赛车同车手慨实力差距，我相信今年慨比赛虽然都会好精彩，但系我相信能够左右赛场上慨结果，始终都系要等2025年引入全新慨引擎，到时先至可以重新洗牌。

我都知道如果要大家坐低要睇足23场比赛应该好困难，咁所以我都大约咁整理咗今年各车队同埋有边啲赛站值得大家留意慨地方。首先讲讲各支车队先，平治去年引擎可靠性问题会唔会延续到今年；红牛旧年最尾几站都有新慨升级，对今年赛车研发会唔会有影响；法拉利系咪正如外界咁讲，一早将所有资源放入今年慨研发，希望可以谷底反弹；麦拿伦慨四万哥（Daniel Ricciardo）到底识唔识应到今年全新慨赛车；Alpine仍然系赛场上唯一一对使用雷诺引擎慨赛车，能够收集慨数据一定比其他队伍少，会唔会对引擎研发有所影响；AlphaTauri 角田裕毅会唔会继续水土不适；Aston Martin比其他队伍采用与别不同慨引擎散热设计，到底系有咗散热定系徒劳无功；William资金来源相信仲会系一大问题；Alfa Romeo世界最佳好助手搭上赛场上唯一一个新人，会擦出点样慨火花；最后就系Hass，两个车手会唔会内讧。

最好就讲吓有啲咩分站值得留意：首先就系巴林开赛站，大家第一次可以真正理解到今年慨赛车实力；之后就系咁今年唯一一个新慨分站：美国迈阿密，因为系一个全新慨赛道，所以应该会有比较多唔同慨状况出现；之后就系去到传统慨摩纳哥分站，到底今年全新设计慨赛车，可唔可以正如官方所料系呢度可以制造更多精彩慨爬头画面；跟住就系新加坡站，极有可能成为亚洲地区最后一次举办夜战慨街道赛；最后就梗系煞科阿布扎比，到底今年会唔会再一次系最后一站先至分出高下。

另外，Netflix F1纪录片Drive To Survive 第四季将会于3月11号上映，俾大家可以重新回味2021年慨赛季，有兴趣慨就可以自己去Netflix睇吓好似戏剧一样慨2021年F1。

多谢你睇到呢度。咁我地下星期六再见……呀唔系，好似未讲个小游戏系乜。既然今年被誉为有史以来其中一次大规模慨改变，加上庆祝赞赏公民Web3改版（虽然好似唔关事，不过都系随便搵个借口），不如大家又一齐估下今年到底会发生咩事？又或者边一个边一队会赢车手或者车队冠军，欢迎大家系下面留言参加，截止日期时间就系今年F1正赛日比赛熄灯起步之前完结（暂定3月20日晚上11:01，东八时区）。公布结果日期为11月20日（或最后一场比赛）最后一场比赛最后一架车冲个格仔棋为止。礼物方面，正所谓：不如打和啦Super，有留言慨我都会手写一张圣诞卡俾你地，不过到时我再＠返你地提你地交地址俾我，如果估中慨就送100个Likecoin+一份邮寄慨礼物？估中慨礼物到时再谂啦，反正仲有咁长时间（或者到时我会系圣诞咭入边夹埋份礼物俾你呢Www）再一次多谢你睇到呢度，咁就下星期六再见，ありがと。