辣女X Cosplay = 《换装娃娃恋爱了》

其实近呢几年，以辣妹做题材慨漫画或者动画其实已经逐渐减少，甚至乎开始绝迹。无他慨，始终而家市场上一直对辣妹慨反应都系比较负面，甚至乎回到现实生活都系一样，所以好多作者都只可以为迎合市场需要而作出改变。至于另一个重点：Cosplay，其实近几年亦都大众开始慢慢接受呢一套文化。虽然依家仲有好多人唔明白当中慨乐趣或者点解要咁样做，但系有好多乐趣唔亲身体验过自己唔会知。呢两个大缆都扯唔埋慨元素，正所谓：不如沟埋一齐做濑了牛丸吖笨，既然无人做就我做，所以呢一套原作者福田晋一先生就决定创作呢一套漫画。

首先我想讲咗一样我由头到尾都接受唔到慨野先，就系个中文译名。无论系《恋上换装娃娃》定系《更衣人偶坠入爱河》，或者其他译名都好，总系感觉去唔到果种意境。日文原名《その着せ替え人形は恋をする》如果直接翻译就系成为《那个更衣公仔在恋爱》，但系呢个名实在太古怪，所以就有咗一开头果两个译名，但系始终去唔到果种感觉，所以之后我会用《着せ恋》称呼呢一套作品。

讲咗原作者先，福田晋一先生系2003年出道，作品有《シバラク》、《桃色メロイック》同今日要介绍慨《その着せ替え人形は恋をする》 。唔讲大家可能唔知，可能好多人听到个名同埋睇到呢一套慨标题，就以为个作者系男性。实际唔系，系市场上少见慨女性漫画家之一。其实一开头我睇原作漫画慨时候都以为系男性漫画家，因为大部份慨情节或者尺度都比较偏向男性化，但系睇完维基百科之后先知道原来系一个女性慨漫画家。而呢一套《着せ恋》其实本身虽然都系一套男性向慨漫画，但系睇到大约40话之后先至隐约发现偏向女性向漫画家风格。但系因为始终题材属于市场上比较罕见慨类型，加上女主角慨身材实在太好、漫画慨绘画实在太美丽，所以亦都深受大量女性喜爱。根据一项2021年慨调查，男女读者比例大约系70／30，当中细腻慨人物描写亦都成为咗好多女性会观看呢套漫画慨原因。加上福田先生善用Cosplay呢一个主题，令到无论系男性定女性都好容易代入其中，所以令到呢一套系宣布动画化之前已经轻松获得多个奖项，而且更于2022年3月宣布累计总发行量超过550万本，以一套2018年开始连载慨漫画黎讲，呢个成绩绝对实至名归。

故事就系讲述一个系学校婆受欢迎慨辣妹，喜多村海梦（喜多川海梦），因为对自己喜欢慨角色好有爱，所以就决定想Cosplay。但系基于自己技术欠佳，所以即使自己购入了衣服进行修改但系仍然相差甚远。与此同时，本套男主角五条新菜（五条新菜），屋企系经营人偶制作生意，顺理成章亦都希望将来成为一位人偶制作师傅。首先我想讲讲咩系人偶先，虽然系日文解释系公仔，但系呢度指慨人偶唔系我地平时见到毛绒绒那些公仔，而系传统日本女儿节摆出黎一个个好精美果种公仔。而系有一日，因为新菜屋企慨衣车坏了，所以就决定放学后留在学校家政室制作衣服。偏偏遇着刚刚，系有一日放学慨时候，新菜在家政室使用衣车慨时候，海梦突然入咗去，本来都系希望利用学校慨衣车制作衣服，但系见到同班同学新菜系度使用衣车，所以就问渠系唔系识得用。之后就即场穿上自己制作慨Cosplay衣服。但系始终还原度太低，结果遭到新菜吐槽，之后就决定邀请新菜帮她制作唔同慨Cosplay衣服。久而久之，经过几次制作之后，海梦慢慢发现自己逐渐爱上新菜，但系新菜却惘然不知（我都系要睇到呢度先至开始发现渠系一套比较偏向女性化慨作品，因为咁慨情节应该之后系女性漫画会出现。）故事大约就系咁啦，即使去到最新一话，海梦都仲未正式同新菜表白。希望最后就唔好好似隔离《拖稿女友》咁，啊打错唔好意思，系《出租女友》先啱，拖咗成40话先至叫做有啲眉目。

其实人偶呢一个传统手艺，系日本亦都出现青黄不接慨情况，毕竟日本人口老化同少子化问题系全亚洲数一数二，加上呢一种工艺主要系传俾自己人，甚少愿意传比外人，所以亦都令到呢一个行业成为夕阳行业。原作者福田先生曾经系一篇访问中表示，会使用呢一个题材系因为渠细个慨时候祖父亦都系从事呢一个行业，所以希望可以作一的纪念。加上系渠身边亦都有制作人偶同学同喜欢Cosplay慨同学，所以就将两样完全没有关连慨特性混合埋一齐，创作呢一套故事。而动画尚未播放之前，男主角新菜慨人偶工场其实亦都系真实存在，就系系埼玉县埼玉市慨「人形工房天祥（株式会社公司人形） 」。而顺理成章，亦都成为咗一个圣地，而且系动画播放之后，人气更加系急速上升，之后如果疫情完全过去可以回覆日常生活慨时候，我谂我都会花少少时间揸车过去参观，始终而家系日本仍然以全手工制作人偶慨店铺实在已经买少见少。

辣妹呢一样野其实正如我一开头咁讲，近几年已经开始绝迹。始终社会大众对呢一样野一直都有不良慨感觉。就算返到系二次元都好，始终辣妹系好多人慨心目中已经系偏向自我中心、令人讨厌慨角色，所以近几年有辣妹出现慨作文其实好似真系无乜。对上一套我有印象慨已经系2016年动画化慨《百无禁忌！女高中生私房话（おしえて！ ギャル子ちゃん）》 。反观呢一套，虽然都系用辣妺做主题，但系相对上渠系比较友善果种。 （容许我澄清一样野先，每种人都有好有坏，唔系话辣妹就等于唔好慨人，我相信当中亦都有好多好人系存在，只系因为社会慨约定俗成令到咁慨偏见出现）其实辣妹都只系一个普通人，钟意Cosplay亦都纯粹只系一个个人兴趣，但系正如动画第一集咁讲，明明只系对一的自己钟意慨野有兴趣，但系其他人就要用有色眼镜黎睇？其实就算系漫画或者动画都好，我地见到就算呢啲咁小圈子慨文化，但系只要搵到一班同好，有人愿意接纳自己，找到属于自己慨空间，当中慨喜悦先至系最大慨得益。

动漫已经开始进入大部份人慨生活入边，亦都有更多人开始尝试接触或者理解动漫呢一样野。 Cosplay呢一样野即使到咗今时今日，但系唔知点解普罗大众对于Cosplay呢一种副产品好多人都仲系唔钟意，甚至乎会觉得点解要咁样做。其实呢一套作品系未宣布动画化之前已经有咁高慨人气，系因为渠可以将Cosplay慨辛酸显示系大家眼前。作为一个Cosplay摄影师，其实大家可能以为净系系相机上面揿个快门咁简单，但系其实背后亦都系同Cosplayer 一样咁辛苦。唔讲大家可能唔知，由制作一套衣服到系唔同场合出现，除咗系金钱同时间慨消耗外，更加重要慨系心机。虽然依家大家上网揿个掣就已经可以买到Cosplay 衣服进行最简单慨Cosplay，但系正如动画入边咁讲一样，一套衣服如果唔进行改装，你买慨只系同个色一样慨衣服而唔系Cosplay。假如从零开始，制作衣服最保守最保守估计都最少20到30小时，然后到达会场更衣和化妆等等最少也要花1小时，然后仲要着住Cosplay衣服系场地不停走动和做出不同动作供人摄影（当然衣服有轻有重，最轻慨可能只系一套泳衣或者校服，重慨可能讲紧4-5KG），唔理系室内定系室外，咁样连续几个钟活动，唔冻死都热死，而且所有都系自愿，没有任何报酬，纯粹只系为咗兴趣，所以即使我身为摄影师，我一直都好佩服Cosplayer 慨耐性。而作为摄影师慨我，如果系大型动人活动，例如香港慨Rainbow Gala ，台湾慨CWT、Fancy Frontier，日本慨Comit Market，当然都系到处走动，所以都可能只系揿个快门影张相咁简单。但系有时会为咗朋友而进行私人摄影，果时候就会化身一个十项全能慨人。除咗要帮忙照顾同行者随身行李之外，有阵时仲要帮手化妆等等，而且大部份都系室外摄影，烈日当空慨辛苦程度绝对系大家难以想像，不过请容许我引用海梦其中一句：只要有爱就得。其实系呢个作品入边我地见到慨系，由制作到摄影整个过程其实都系环环相扣，虽然没有所谓慨deadline，但毕竟全部都系心机之作，愈投放放越多心机落去，出嚟慨成品当然系越好。即使面对困难同挑战，新菜每一次都可以完整还原为海梦制作的衣服。所以请容许我任性咁样讲，依家好多小朋友都只系喺淘X买套衣服，然后直系穿上就系当Cosplay，呢种咁慨态度其实真系好乞人憎，渠地绝对系侮辱咗个果角色。

另外一个唔同慨地方，就系相比起其他作品，即使系以一个偏向男性向慨作品，但系却用一个女主角慨角度出发；相比起大部份以男性主角作为主导慨作品，绝对系令人眼前一亮。虽然有好多作品都会用女性角度出发，但始终大部份作者都系男性；相比起呢一部作品系由女性创作，当中慨对话和心境仿佛就由一个女性角度出发，除咗比男性漫画家更为细致之外，更加准确地描写女孩子慨心境，系爱情漫画或者动画呢一方面绝对系比较少见。

其实呢一套系动画播放之前已经算系有些人气，系动画播放之后更加系人气急升。其实我谂最主要原因都系归功于尺度比较大有关。其实呢一个题材相比起其他类型题材，绝对系比较少见慨一种。如果话校园恋爱又完全称不上，但系如果纯粹恋爱喜剧又未达到果种程度，所以都算系令好多人眼前一亮，而动画慨第一集其实已经突显到海梦慨身材有几好。当然称得上辣妹，身材必然有返咁上下，但系渠果种身材正正就系以前日本最多辣妹慨标准身材。之后其实每一集都总有大尺度慨部份，我就唔多讲啦，不过当然，有大部份系动画自行加上，原作漫画只系轻轻带过。但系亦都因为咁大尺度（AT-X版本甚至有全裸出现），令到成个作品慨人气急速上升。相比起其他作品，呢一套慨动画制作相亦都系我之前介绍过制作《堀与宫村》慨CloverWorks，资金绝对唔系问题，制作亦都系水准保证。但系系第12集完结果一集，渠连同当日另外一套完结慨《明日同学水手服》，因为两套慨作画实在超乎想像，所以就即刻有相关人士在Twitter爆料声称呢两套最后一集慨总经费合共超过3亿日圆（现时已经不能再找到相关post），需要知道目前一集慨动画大约都只系1亿日元左右，一季十二集慨动画就大约12～13亿日元左右，而呢两套动画，单单系最后一集，花费已经系其他制造商可以制作两集甚至三集慨价钱，可见为咗成为霸权，无所不用其极。不过调返转咁讲，最后果一幕烟花场景真系好靓，无好似其他动画咁样草草了事，绝对值得一看。

总结来讲，女主角个心境变化其实真系好少女漫画咁，真系无乜特别；而男主角亦都比较似系一个工作狂，对于爱情极度迟钝。但系相比起异世界或者国王排名等等，呢一套作品仿佛就系令人了解不为人知慨Cosplay 一面，虽然剧情一直都系欢乐地渡过每一个情节，但系仿佛亦都可以令人明白Cosplay绝对唔系一般人可以了解慨辛酸。今次就讲到呢度先，星期六再见，88。