帮朋友组装电脑

首先讲吓我自己，我自己本身唔系好多时间会玩游戏，本身有一部2014年自己组装，之后不停改装慨电脑，虽然目前使用的PC只系i7-4790K CPU加MSI R9 390 Gaming显卡，但系我又唔系玩3A大作，所以仍然绰绰有余。加上我自己有MacBook Pro同Mac mini，所以日常使用绝对不是问题。虽然我都会用电脑玩游戏，什么花最多时间玩慨就系一个网页游戏：《舰队これくしょん-舰これ-》，基本上只要一个好普通慨浏览器已经可以玩到（不过好似IE真系玩唔到），加上我主要都系iPad上面玩音乐游戏，所以基本上问题不大。但系我朋友慨处境就啱啱相反，渠想要一部性能强大，并符合预算慨手提电脑，而且渠慨预算有$16,000。虽然$16,000好似好多，但系其实市场上慨选择无想像中咁多。

我仲好记得渠年廿八夜晚打俾我，同我讲渠本身用紧果部手提电脑唔掂，想我帮渠搵一部新慨代替。因为渠而家本身用紧果部都系我同渠读高级文凭慨时候有一日食午饭就走咗出去旺角买慨，所以渠就拜托我帮渠搵个一部新慨。虽然我地两个都系读电脑工程，但系渠系对于电脑硬件完全唔熟悉，只系对于工艺上面比较熟练，而我就系比较熟悉电脑硬件方面，所以渠有咩都系问我。讲返正题，咁因为始终年尾我都好忙，初一初二初三虽然唔使拜年，但系我始终系一个好迷信慨人，所以我都系初四先至帮渠开始搵手提电脑。本来真系以为$16,000好多钱，可以买到最新慨CPU，但可惜慨系始终系新出品慨产品，最低都要成$35,000先至可以入手，完全超出渠慨预算；如果要符合渠慨要求（价钱方面），如果求其选择买一部符合预算慨手提电脑，其实同渠依家使用中慨唯一分别就系CPU升级，显卡都仲系无改变，甚至乎有部份系降级，加上呢啲电脑嘢有新最好买新，所以我又花咗额外两个时间去说服渠不如砌台机，反正相同价钱，差唔多可以你手提电脑好一倍慨性能。最后渠唯一一个要求就系要ITX机箱，可以顺畅玩3A大作，所以都正式开始咗我呢个砌电脑之旅。

虽然我就无一直留意电脑硬件市场发展，但系一直都有系YT上面睇唔同慨开箱评价，咁所以都唔系太脱节。不过实际上黎又系另外一回事。

CPU

作为一部电脑最重要慨部份，CPU慨选择绝对系决定咗成个电脑慨一半。市场普遍上主要系有AMD 同Intel两大平台，至于Raspberry Pi 呢一类怪物来讲，因为对于渠黎讲绝对系唔足够，所以就完全不作考虑。

开头慨时候其实我都会有谂过AMD，因为价钱上面绝对比Intel优胜，而且可以超频，但系始终渠主要作用系游戏需求，所以都系返去考虑Intel。正如头先咁讲，科技呢一类已经有新就梗系买新，使用期限可以比较长远。但系尴尬位出现了，虽然Intel 推出了12代的CPU，但系始终系新技术，加上CPU的针脚位有所增加，必须购买新一代的主机板；相反如果使用11代CPU，虽然性能比10代更差，但系主机板有更多更便宜慨选择，而且两代价钱差距不是太大，所以我都陷入左迷思。不过我又咁样谂，始终第12代CPU支援DDR5 同PCIe 5.0，虽然而家因为未普及而非常昂贵，但系台机慨好处就系可以随时升级，如果计及将来升级慨成本，12代CPU可升级慨程度绝对比11代优秀，而且将来当DDR5 同PCIe 5.0普及之后，价钱一定会有所下降，所以我都系决定帮渠选择12代CPU。

虽然就决定咗12代，但系下一个问题就系选择i7定i9？虽然仲有i3同i5选择，但系顾及游戏性能，i7同i9绝对系比较优胜。如果唔使考虑价钱，我一定谂都唔使谂就买i9-12900K，但系始终有预算上限，所以就拣咗平$2000慨i7-12700KF作为CPU。

同大家讲少少常识先：i7-12700KF我相信好多人都以为只系一个型号，但系其实入边已经说明咗好多资讯。

首先讲咗前面先：＂i7＂系代表Intel Core i7处理器，其他分别系：i3、i5、i9，数字越高代表性能越高，当然数字越高价钱亦都越贵；之后＂12＂就系代表第12代处理器；12隔离慨＂7＂系代表CPU等级，当然都系数字越高越好；7字隔离第一个＂0＂系代表对应CPU内部显卡慨型号；再隔离嗰个＂0＂系代表要用几多电压先至可以推动；＂K＂系代表可以超频；而＂F＂系代表没有内显，必须透过显卡显示萤幕。另外一个好多人成日见到慨就系＂H＂，主要系用系手提电脑上面。

CPU冷却系统

既然有咁好慨CPU，咁当然发热量都系唔可以忽视。如果散热做得唔好，除咗会影响表现之外，长远更加会伤害整部电脑，所以考虑完CPU之后，就要考虑如何冷却CPU。

市场上普遍慨冷却系统主要分成两种：水冷和风冷。两种冷却系统都仲有分支，分别系：一体式水冷和开放式水冷、下吹式风扇同埋塔扇。不过好彩，开放式水冷同埋下吹式风扇系可以唔使理会。开放式水冷，顾名思义就系可以自由设计整个电脑水流动的方向，如果有良好慨动线规划绝对可以媲美一幅艺术品，但可惜慨系我系用ITX迷你机箱，所以尺寸问题已经可以忽略；至于下吹式风扇，就系大家购买CPU时附送的风扇，不过好似第10代CPU之后就没有附送，因为自从10代CPU发热量开始过大，原厂附送的下吹式风扇已经不足以用来降温，所以某程度上是减少了电子垃圾的出现。

最初慨时候其实我都系谂住买塔扇，因为迷你机箱塔扇比较适合，唔使再花时间研究水冷水管走线方向，而且唔使担心水冷液泄漏问题，更甚慨系相同情况之下，120mm慨水冷表现比塔扇更差，所以本身都唔谂住安装水冷。但系正如我一直都咁讲，你想同现实总系相差好远，啱啱先讲完唔会买水冷，但系选择零件慨时候因为商家做紧优惠，买GIGABYTE慨主机板，可以用$500价钱选购GIGABYTE 240mm一体式水冷，需要会增加安装难度，但系可以大幅减少噪音，加上同塔扇价钱相差不大，同朋友商讨之后决定选择购买水冷。

又到呢个课外小知识时间。一体式水冷主要分为120mm、240mm同360mm，简单啲讲就系可以装到几多把12cm慨风扇。当然数字越大，散热性能越好，但系所占慨地方亦都会更大，而且价钱亦都会更好。但系请留意，如果以目前12代CPU来讲，120mm慨一体式水冷散热表现绝对比塔扇差，所以如果想用12代CPU，最少必须考虑塔扇或240mm或以上的水冷。另外，这些只是标准尺寸，有部份厂商会制作340、380mm呢一种奇怪尺寸慨水冷，所以购买之前请先确保机壳能否安装特别尺寸的水冷。

主机板

正如我上面咁讲，我朋友唯一一个要求就系要一部迷你电脑，咁所以主机板选择就只有ITX。但系始终12代CPU算系一个市场上颇新慨产品，主机板慨选择已经唔多，加上仲要系ITX，选择又小又贵。正如我上面咁讲，因为选购GIGABYTE主机板可以用优惠价钱购买GIGABYTE的一体式水冷，所以自然就系选择GIGABYTE主机板。

虽然是咸鱼青菜各有所号，但系始终仲要预留预算比显卡同埋供电，所以就唯有选择最平慨B660I 主机版。虽然系ITX主机板，但系用料已经比好多平慨M-ATX主机板优胜（不过又咁讲，而家大部份慨纪录都系用ITX主机板上面诞生）另外，12代虽然可以选择支援DDR4 或DDR5 记忆体的主机版，但始终目前市场上DDR5记忆体慨产品仍然属于少数，价钱仍然偏向昂贵，所以就选择只支援DDR4的主机版。啊，如果有少少电脑常识慨人，可能会问我做乜买可以超频慨CPU配一块唔可以超频慨主机板？其实无他慨，都系价钱，加上我同我朋友讲完渠都唔知咩叫超频，所以当系一个隐藏功能Www

成日见到ITX、M-ATX、ATX、E-ATX呢啲主机板选择，但系唔知有咩分别？其实最大分别就系尺寸同埋扩充性。 ITX慨扩充性比较细，大部分只可以插两条记忆体同埋一张显卡；M-ATX同ATX就系普遍人使用慨主机板，拥有良好慨扩充性，大部份都可以插四条记忆体同埋一张显示卡，而且还有额外空间安装其他扩充设备，例如撷取卡同Wi-Fi卡等等；而E-ATX就拥有最大慨扩充性，最少可以插八条记忆体同埋四张显卡（前提系要你有钱）

另一个大家成日见到慨就系主机板型号，前面慨英文字母就系代表用料，当然越好慨用了价钱亦都越贵，但系亦都可以超频同埋有稳定慨供电，虽然最平慨主机板亦都可以确保有稳定慨供电，但系就唔会有最高级主机板慨供电稳定性。另外后面慨数字就系代表对应慨晶片组，基本上每出新一代慨CPU就会对应新一代慨晶片（呢一方面我都唔系好熟，所以如果大家想知道更多就去搵Google大神问问）

记忆体（RAM）

自从DDR4开始普及之后，就产生咗一个纯粹美观但系无实际作用慨副产品：RGB灯光，又名电子花车。如果能够配合其他设备，例如主机板，CPU散热器、机箱风扇等等，灯光设计绝对可以媲美一场精彩慨烟花汇演，但另一方面来讲亦都其实系一种光污染。但系好彩，我朋友对于电子花车完全无兴趣，甚至乎强烈反感，所以我在选购慨时候都可以不用考虑RGB版本的记忆体。正如其他电脑零件一样，价钱越贵，性能越好。但系始终总有上限，因为仲要预留金钱选购显卡，所以我只是选择了两条16GB 3200MHz慨记忆体。

记忆体容量数字越大，代表每秒可处理容量当然系更快，但系要留意番主机板是否支援32GB或者以上慨记忆体，因为要2020年后推出慨主机板才开始部份支援32GB以上的单枝记忆体。至于后面MHz 也是相同道理，数字越大，每秒可处理慨数量亦都越大，但系现实就系荷包慨厚度决定一切。不过老实讲，除非你系要用AutoCAD呢一类工业用绘图软件，否则其实32GB或者64GB已经足够，而MHz方面，除非系选用DDR5或者高阶慨DDR4，否则3200MHz 或者3600MHz已经足够，因为正常使用，就算系玩3A大作，都好难睇得出分别。

显示卡

如果一提起显卡，相信大家好自然就会想起掘矿。而所带来慨副作用就当然系显卡价格暴升，即使去到2022年慨今日，显卡慨价格依然系持续稳定上升，咁所以与其继续等落去，不如早日入手，早买早享受。当然你亦都可以选择二手，但系始终唔清楚上一手用家慨用途，所以极度不建议入手二手显卡。

虽然3090已经推出市场一段时间，但系始终价格仍然高昂，系余下唔多慨预算情况之下，所以我选择咗比较平慨3060。至于买咩版本？当然就咁睇最平慨入门级，单风扇因为生意唔好所以不作考虑，三把风扇、Turbo 涡轮增压版本就因为机箱大细问题未能安装而不能考虑。虽然只有两把风扇，散热方面一定唔够三把风扇优胜，但系好彩因为CPU已经改用水冷，CPU产生慨大部份热量都经过冷排离开，而大部份其他零件散热均不大，透过水冷抽风的风扇已经可以冷却，所以余下慨就只系得返显卡慨风扇散热，所以即使没有额外风扇排放热气，但系仍然不会导致机箱内部积热。

显卡呢样嘢就真系因人而异，目前市场上最新最缺慨就当然系3090，一张差唔多要接近一万元，但系始终真系平有平玩、贵有贵玩，所以要拣一张合适自己慨显卡，始终都系要睇自己慨需求而决定。

另外选购慨时候，尽可能选购两把风扇或以上而且要额外插电慨显卡，因为显卡运算时期会产生超高热量，两吧或以上风扇先至可以顺利将热量迅速排走；以额外供电系因为如果长期倚靠主机板供电，对整个主机板慨伤害很大，所以尽可能选购额外供电慨显卡除咗可以减低主机板负荷，更加可以令到显卡运算时能力大增。

机箱

虽然我一直都话系呢一部系一部迷你电脑，但其实体积上都唔系话好迷你。朋友当初要求系想好似手提电脑咁轻巧，但系如果主机板加上记忆体其实已经厚过一部手提电脑，咁所以我同渠都搵咗好耐合适慨机箱。我哋当初有谂过系淘宝购买K39超级迷你机箱，高度只有两罐汽水，长度接近4分3张A4纸，厚度大约30cm左右，而且价钱只需159人民币。但系因为网站标示整个包装重量接近3KG，即使是采用集运模式，运费比机箱价钱更昂贵，而且无人知道集运慨时候会唔会整烂机箱，所以唯有放弃继续寻找。

经过多番商讨之后，最后决定采用Cooler Master NR200P机箱，虽然比原本决定贵超过四倍，但系始终不用再考虑额外运输的问题，而且是行货，就算有问题也可以拿去维修，虽然我唔知道机箱可以如何维修。

机箱主要分为ITX、M-ATX、ATX同E-ATX版本，每一个版本均可以向下兼容所有主机板。不过选购慨时候，如果可以，尽可以选购电源放在下面慨机箱，因为咁样当电源抽取空气冷却慨时候，唔会抽取机箱内来慨废热，减低电源因为长期处于高热状态而导致寿命减少。

硬碟

虽然SSD拥有良好慨读写速度，同埋体积细小，绝对系现在组新电脑不可或缺慨一部份。但始终SSD寿命比传统硬碟短，所以原本打算SSD只是用来装Windows 系统，其他资料放在HDD，但因为经过量度之后，安装水冷同显卡之后机箱已经没有空间安装传统3.5吋的HDD，甚至乎是2.5吋的SDD 安装也可能会遇上问题，所以便决定改为安装PCIe 4.0 的SSD，发挥整部电脑最大效能。

因为唔可以安装传统硬碟，所以唯有选择容量比较大慨SSD。不过老实讲，虽然市面上PCIe 4.0的SSD琳琅满目，但系相可靠慨其实真系得几个牌子。咁所以最后我选择咗Samsung 980 PRO 2TB 版本。虽然索价唔平，但系始终Samsung采用慨系自家晶片同埋控制模组，相比其他牌子，更加有信心保证，而且更加有五年保养。

其实选购SSD时候我都系参考巴哈SSD选购指南黎到选择，因为啱啱推出SSD慨时候成日听到好容易坏，所以我自己对于呢项技术都系有所保留。但系近几年慨科技进步，令到呢个技术逐渐成熟，所以亦都开始回复信心，而且呢一个牌子有好多用家表示可以安心使用，所以成部电脑呢一个部份，我觉得如果可以的话，尽可能用多少少钱买啲比较好慨牌子，始终如果用一些不知名慨牌子，可能好快就会令到所有资料消失。

另一方面，SSD慨发热量亦都不容忽视，如果主机板有提供散热装甲，咁当然就最好啦。但如果系一啲比较旧或者比较平慨主机板可能就未有提供，咁所以尽可能都要加装散热，哪怕只系系街边执一块铜片，都已经比没有加装任何散热设备好。不过即使今次主机板有提供散热装甲，我仍然在后面贴咗一张散热用慨铜片，虽然散热作用唔知有几多，但系总好过乜都无。

电源

我对于呢啲超迷你机箱来讲，要用慨当然就唔系普通慨电源，而系特别慨SFX电源。除咗特点系比一般慨ATX电源细同轻巧之外，价钱亦都几何级数上升。正常一体式750W 80 Plus电源可能讲紧$300左右已经有交易，但系SFX因为特别精细，而且选购慨人比较少，加上因为要迁就机箱大细，大部份都系采用全模组化设计，相同功效情况之下，SFX电源索价超过三倍，接近$1000。但始终市场上选择有限，所以唯有选择一直也是信心保证的Cooler Master。 （其实我唔系想帮人卖广告，但系能够选择高功率慨SFX电源实在唔多）

电源安全认证有分80 Plus至到80 Plus Titanim，分别就系在于电源转换效率，越高效率价钱越贵，详情请参阅维基百科。

另外，电源主要有分一体化、半模组化和全模组化。一体化电源就将全部线都有接驳，但系就唔可以增加或者减少接口，所以好多时见到电脑会用索带索住一大堆唔用慨接口；半模组化就系只提供必理要慨电线（CPU供电、硬碟供电等等），其他就要自行安装；而全模组化，顾名思义，全部线都要自己接驳，但系优点就系用果条就净系需要驳果条，完全唔会有多余慨线，对于呢啲迷你机箱绝对系一大帮助。

大家买慨时候成日都听到＂采用日系电容＂呢一类形容，最大分别就系安全可靠性比其他地方出产的电容更为优胜，不过大部份高瓦数慨电源供应器都已经成为标准配备，你都好难听到唔系标榜采用日系电容慨产品。

最后就同大家讲一样都几得意慨野。其实系组装初期我亦都有研究过帮朋友将部份零件改为二手零件，从而节省价钱。电脑我觉得可以买二手零件慨部份就只有CPU同埋记忆体，因为呢样样嘢会坏慨机会率系比较低，虽然唔系话100%唔会，但系最少咁多年以来大家听到呢两样零件会坏慨机会真系好少。咁当然啦，亦都要先警告大家，二手零件风险超级大，如果没有足够经验绝对不要尝试，因为稍有差池，你可能将要面对无限轮回除错时间。咁所以为咗方便同埋尽快可以使用，咁所以今次就完全唔考虑二手物品。

原本我有谂过继续讲组装过程，整个组装过程其实同砌积木一样，而且全部零件都有防呆设计，基本上只要有睇说明书好难会装错。但因为我同建议安装方法有唔同，加上为咗迁就水冷走线，基本上装咗一次之后清拆重装，所以就唔攞出嚟同大家讲啦，费事误人子弟。不过安装完成之后，我只系想讲一样野，就系呢啲迷你机箱，就算系120水冷都好，都唔好装，而且我更加系要装240水冷，因为走线问题牺牲好多位，而且安装难度甚大，之后更加要长期留意水管情况，因为走线有少少违反地心吸力，有机会影响到水泵运作。

再次感谢你又睇完一篇废文，当然啦，走之前继续希望你可以慷慨解囊拍五下手，作为继续支持我慨原动力，下星期六再见，多谢大家。