殷商甲骨文真係無「夏」字？

楊穎宇、趙善軒等都仲講緊甲骨文無「夏」字，有必要翻一翻案，普及一下比較合理嘅知識。

將出土甲骨文、金文、戰國璽印等同其他文獻比較，下圖應該就係甲骨文嘅「夏」字。但呢個字係一個人名，同方、邦、邑、國、朝等通通無關。

第二，眾所周知，佔相當部份嘅甲骨文內容，係商人祭祖或同祖先嘅對答，但差唔多成百年嘅甲骨文研究，都見唔到有歌頌「成唐滅夏」嘅內容。「成湯滅夏」（按：殷商甲骨文只有「成唐」，「成湯」來自現存古文獻）實際上來自周人，春秋戰國再慢慢成形。

當考慮到青海喇家遺址顯示4000年前曾發生過嘅毁滅性大洪水，影響廣及河套地區，周作為西方嘅一員，有同「夏」相連嘅水災、治水等共同記憶，就比東方嘅商來得合理。事實上，商應付水患嘅方法係遷都，亦同「夏禹治水」傳說有距離。

順帶一提，夏禹治水 嘅「禹」，金文係一個類似龜、龍嘅爬蟲類圖騰，顧頡剛指出，西周嘅文獻中，「禹」最初只係開闢之神，年代最久遠嘅詩經中，「禹」同「夏」完全無關。

相關：殷商到底有沒有滅夏？｜野蠻小邦周